Ena ika16 ni Tiseba 2021, e sega ni vakadonuya na mataveilewai na Court of the Jewish Autonomous Region mai Rusia, nona kerekere o Tatyana.

Ena ika25 ni June 2021, e kaya na Birobidzhan District Court of the Jewish Autonomous Region mai Rusia, ni cala o Tatyana. Ena vakatatabutaki me 30 na vula.

Tatyana Sholner

• Sucu: 1993 (Birobidzhan)

• Me baleti koya: Ni se gone, a mate vakaloloma o tamana qai susugi koya kei ganena o tinana. E cakacaka ena kemesi. E dau taleitaka na vakasisisi ena waicevata, vodo basikeli kei na qito volleyball

  E via kila na iVolatabu ena gauna a vuli culacula tiko kina. E taleitaka na nona itovo e dua rau vuli vata e iVakadinadina i Jiova tale ga. E vakacegui koya na inuinui ni veivakaturi ena gauna e takali kina e dua na wekana e yabaki 12 ena 2014. Papitaiso sara ena 2017

Ena ika6 ni Feperueri, 2020, ratou vaqaqai vei ira na vakailesilesi e Birobidzhan e ono na tacida yalewa, wili kina o Tatyana e yabaki 27. Ratou beitaki ni vakavuna na “tikoyavavala,” na nodratou vakaitavi tiko ena sokalou. E rauta ni 19 na kisi era beitaki kina na mataveitacini ena Jewish Autonomous Region.

E vakila tu ga o Tatyana na veitokoni i Jiova ena gauna dredre qori. E kaya: “Dina ni vakaleqa noqu ituvatuva vakayalo na veika dredre au sotava qo, ia e sega ni cegu noqu wili iVolatabu. Au talaucaka vei Jiova na lomaqu, kei na ka kece au leqataka. Au kerea na veivuke ni nona yalo tabu meu rawa ni vosota, qai yalodina tiko ga me yacova na icavacava. Au masulaka tale ga me solia vei au na yaloqaqa, kei na vuku meu rawa ni tutaka na yacana ena mataveilewai.”

E tomana: “E veivakacegui niu kila o Jiova ena tokoni ira tu ga na nona dauveiqaravi. E tuberi au tiko ena ligana imatau daudina. Qori e uqeti au meu nuitaki koya vakalevu, qai lomavakacegu niu tusaqati.”—Aisea 41:10.

Ni waraki tiko na macala ni veilewai, eda nuidei ni na “vosota na veivakacacani” o Tatyana ena veivuke i Jiova.—Roma 12:12.