16 TISEBA, 2021
RUSIA

IROGO VOU | E Vukei Ratou na Tacida na Wili iVolatabu e Veisiga

SARAVA/ROGOCA

Ena ika25 ni Okosita 2022, e kaya na mataveilewai na Leninskiy District Court of Saransk mai Rusia, ni ratou cala o Brother Denis Antonov, Brother Vladimir Atryakhin, Brother Aleksandr Korolev, Brother Georgiy Nikulin, Sister Yelena Nikulina, kei Brother Aleksandr Shevchuk. Ratou na vesu me rua na yabaki o Denis, Aleksandr Korolev, kei Aleksandr Shevchuk. O Georgiy kei Yelena rau na vesu me va na yabaki rua na vula. O Vladimir ena vesu me ono na yabaki. Ni tau oti ga na lewa, ratou sa kau me ratou lai vesu.

Veitaravi ni Gauna

11 June, 2021

Tekivu nodratou veilewai ena Leninskiy District Court of Saransk
2 Epereli, 2021

Beitaki o Yelena ni vakaitavi qai vakavulici ira tiko eso tale mera lewena na isoqosoqo e vakavuna na tikoyavavala
31 Maji, 2021

Beitaki o Vladimir ni tuvanaka tiko na cakacaka ni isoqosoqo e vakavuna na tikoyavavala
2 Julai, 2019

Sere mai o Aleksandr Shevchuk kei Georgiy ena nodrau vesu tu vakawawa, qai vakaroti me rau kua ni biuta na nodrau itikotiko
28 Maji , 2019

Sere o Vladimir qai vakaroti me kua ni biuta nona itikotiko
8 Feperueri, 2019

Vesu vakawawa o Aleksandr Shevchuk, Vladimir, kei Georgiy
4 Feperueri, 2019

Ratou vaqaqai vei ira na FSB o Yelena kei na lima na tacida tagane, ni ratou tuvanaka tiko na cakacaka ni isoqosoqo e vakavuna na tikoyavavala

Kedratou iTukutuku

Denis Antonov

Sucu: 1976 (Syktyvkar, Komi Republic)

Me baleti koya: Ni se gone, ratou dau toki vakavuvale ena vuku ni cakacaka nei tamana. Vulica ena koronivuli ni vuli cakacaka na veika vakalivaliva, kei na mekeniki

Lima na yabaki nona daunilivaliva tu ena qara ni koula. Taleitaka na veitaba, kei na qito chess

Dau lomatarotarotaka e levu na ka me baleta na Kalou, qai saga me kila na kedra isau ena ivola ni lotu kei na iVolatabu. Gauna e lewena kina na mataivalu, e sotava sara e dua na nona itokani e vuli iVolatabu tiko kei ira na iVakadinadina. E tarai koya sara ga na donu ni ka e tukuni ena iVolatabu, kei na yaca ni Kalou. Papitaiso sara me iVakadinadina i Jiova ena 1998. Rau vakamau kei Olga ena 2015

Ka e Tukuna

Na tikinivolatabu cava e vukei iko mo yaloqaqa qai vosota?

Dua na tikinivolatabu au taleitaka na Vakatekivu 15:1 . . . E votu tiko ga mai na noqu vakasama na tikinivolatabu qori ena yakavi au vesu kina, qai kau meu lai vakatarogi vei ira na FSB. . . . Au vakila niu lomavakacegu, e vukei au tale ga meu yalodina tiko.

Vladimir Atryakhin

Sucu: 1987 (Rozhdestveno, Republic of Mordovia)

Me baleti koya: Susu ena vuvale itubutubu le dua, qai dua tiko na tacina. Taleitaka na qito soka, volleyball kei na hockey. Vulica me kenadau ena porokaramutaki ni kompiuta, e cakacaka sara ena tabana ni kompiuta

Gauna se vuli tiko kina e taleitaka me kila na veika vakaivolatabu. Papitaiso sara me iVakadinadina i Jiova ena 2004. Rau vakamau kei Mariya ena 2009, qai rua na luvedrau. Dua na luvedrau sa vula ciwa tiko, dua tale e yabaki rua ena gauna e vesu kina o Vladimir

Ka e Tukuna

E vaqaqacotaka vacava nomu veiwekani kei Jiova na veika dredre qo?

Dua na ka noqu yalolailai, au rarawa tale ga niu yawaki ratou noqu veitinani. Niu kau meu lai vesu, au raica ni vola tiko e dua na tagane eso na ka vakaivola. E via kila na vuna au vesu kina. Au tukuna vua niu lomaleqataki ratou noqu vuvale. E kaya vei au: “Era na sega ni guilecavi ratou nomu vuvale o ira oni lotu vata.” . . . E vakadeitaka na tagane qori nira na tokoni ratou noqu vuvale na mataveitacini. . . Au kila sara ga ekea ni vakayagataki koya o Jiova me uqeti au meu nuitaki koya vakatabakidua. Niu sere mai, keirau veitalanoa kei watiqu, au qoroya tale ga na sala e taqomaki ratou kina noqu veitinani o Jiova ni vakayagataki ira na mataveitacini.

Aleksandr Korolev

Sucu: 1978 (Zemetchino, Yasayasa o Penza)

Me baleti koya: Susugi koya o tinana. Ni se gone, e taleitaka na siwa kei na qito soka. Oti nona vuli, e daunimisini qai draivataka na lori lelevu. E dau susu manumanu tale ga. Gauna qo, e cakacaka tiko vakamatai, e dau musu kau tale ga

Vica vata na yabaki nona lomatarotarotaka tu e levu na ka, ia e saumi kece qori ni vulica na iVolatabu kei ira na iVakadinadina i Jiova. Papitaiso sara ena 1998. Rau vakamau kei Natalya ena 2006, rau sa susuga tiko qo na luvei Natalya

Ka e Tukuna

E yaga vakacava vei iko nomu dau tikova na soqoni ena veimacawa?

E yaga vakalevu vei au na wili iVolatabu ena soqoni ena loma ni macawa. E uqeti au nodra ivakaraitaki ni yaloqaqa, kei na vakabauta na dauveiqaravi i Jiova ena veigauna sa oti. E vukei au tale ga me vinaka tiko ga na noqu itovo. Au dau masuti Jiova me vukei au meu vakatulewataka vakavuku na ka au cakava. Meu qarauna tale ga me kua ni vakarogorogocataki na yacana ena ka au cakava.

Georgiy Nikulin

Sucu: 1963 (Rovenky, Ukraine)

Me baleti koya: Vulica na draiva kei na mekeniki. E kenadau ena droini, e dau vakavinakataka na misini ni satelaite, kei na so tale na iyaya. E dau ceuceu tale ga

E taleitaka me vulica qai kila na veika vovou. E dau via kila na itekitekivu ni bula ni kawatamata. E saumi e levu nona taro ni vulica na iVolatabu kei ira na iVakadinadina i Jiova

Ka e Tukuna

Cava e vukei iko mo yalodina qai yaloqaqa ena gauna o vesu kina?

Na noqu dau vakasamataka vakatitobu na veika au wilika ena iVolatabu. E tu ena iVolatabu nodra ivakaraitaki ni vakabauta, kei na yaloqaqa na dauveiqaravi i Jiova ena veigauna sa oti. Au marau niu vakatotomuria na nodra ivakaraitaki.

E tu tale ga ena iVolatabu e levu na ivakaraitaki ni o Setani e vakayagataka tiko na lasu meda kua kina ni vosota. E vukei keda qori meda kua ni vakabauta nona lasu, kei na nona vakaucacataki keda. Ia meda yalodina tiko ga vei Jiova.

Yelena Nikulina

Sucu: 1968 (Monastyrskoe, Republic of Mordovia)

Me baleti koya: Ni se gone, e taleitaka na culacula kei na vakasisisi ena waicevata. Vakavulici sara me dau culacula. Toso na gauna e kenadau ena koti sulu (pattern cutter). Toki sara i Saransk kei Tolyatti ena vaqara cakacaka, e dauculacula sara. Gauna qo, sa dausasamaki tiko

Rau vakamau kei Georgiy ena 2016. Rau vulica tale ga na iVolatabu. E qai kila kina ni kauaitaka na Kalou na noda rarawa, e nanumi keda, qai lomani keda tale ga. Papitaiso sara me iVakadinadina i Jiova ena 2017

Ka e Tukuna

E yaga vakacava vei iko na nodra veivuke na mataveitacini?

A kama neirau vale ni oti e dua na yabaki nodra vaqaqara kina na ovisa. . . . Dua na ka nodra veivuke na mataveitacini, e lai uqeti ira sara ga na wekaqu. Gauna qo, eso era sa vuli iVolatabu era sa toso tale tiko ga vakayalo.

Aleksandr Shevchuk

Sucu: 1989 (Pyatigorsk, Yasayasa o Stavropol)

Me baleti koya: E vulica me qarava na itikotiko, e cakacaka vakamatai tale ga. Oti e toki sara i Saransk. E cakacaka ena vanua ni buli iyaya. Taleitaka na qito basketball kei na table tennis

Rau vakatalai i Siberia na tubuna vakarua ni rau iVakadinadina i Jiova. Rau qai sucu mai kea na nona itubutubu

Papitaiso ena 2006. E veiqaravi ena cakacaka raraba ni sega ni via curu ena mataivalu

Ka e Tukuna

Cava e vukei iko ena va na vula o vesu tu kina?

Niu se gone, dau neitou ivakarau me keitou dikeva vata na tikinivolatabu e veimataka ni bera na katalau. Gauna au vesu kina au saga meu muria tiko ga na ivakarau ni bula qori. Dina ni sega tu na noqu iVolatabu ena imatai ni vica na siga au vesu kina. Ia au dau saga meu vakasamataka eso na tikinivolatabu, se na nodra ivakaraitaki eso na dauveiqaravi yalodina i Jiova. E talei vei au na Aisea 40:26-31. E uqeti au meu vakasamataki Jiova na Dauveibuli, e veivakurabuitaki tale ga na nona kaukaua. E dau vakayagataka nona kaukaua me vukei keda meda vosota na veika dredre.

Eda nuidei ni o Jiova ena yalodina qai lomani ira tiko ga na tacida era vakacacani tiko e Rusia.—Vakatekivu 32:10.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU