Ena ika7 ni Seviteba 2021, e sega ni vakadonuya na Krasnoyarsk Territory Court mai Rusia, nona kerekere o Andrey. Ena sega tale ga ni veisau na kena itotogi.

Ena ika3 ni June 2021, e vakataulewataka na Zheleznodorozhny District Court of Krasnoyarsk mai Rusia, ni cala o Andrey. Sa vesu me ono na yabaki e valeniveivesu. Ni tau oti ga na kena itotogi sa kau sara me lai vesu.

Andrey Stupnikov

• Sucu: 1973 (Norilsk, Yasayasa o Krasnoyarsk)

• Me baleti koya: E idinia ena vanua ni keli waiwai, kei na kasi. Rau vakamau kei Olga ena 1993. Rau taleitaka me rau cakava vata eso na ka e tautuba, kei na droini

  Ni se itabagone, e dau via kila na Kalou. Ni se tiko i Chechnya e Rusia, e raica na itovo lolovira ena imatai ni valu e Chechen. E lomatarotarotaka na vuna e yaco kina na veika ca, qai via kila na sala me qara kina nona veitaqomaki na Kalou. Rau mani vulica vakaveiwatini na iVolatabu kei ira na iVakadinadina i Jiova. Rau taleitaka vakalevu na vakayacori ni parofisai ena iVolatabu. Rau vakadinadinataka ni iVolatabu ga ena vukei keda meda vosota na ituvaki dredre

Ena ika3 ni Julai 2018, era vesuki Brother Andrey Stupnikov na Federal Security Service (FSB) ena raraniwaqavuka na Krasnoyarsk International Airport. O koya na imatai ni tacida mai Krasnoyarsk me vesu, qai beitaki ni cala. Ena siga tarava e vakaroti koya na Zheleznodorozhny District Court of Krasnoyarsk me vesu tu vakawawa.

E vakayaloqaqataki koya na ivola e dau vola vua o watina. Ia toso na gauna, sa sega ni ciqoma o Andrey na nona ivola. Dua na ka nona lomaleqa, e kaya: “A lako mai dua na tagane qai tarogi au: ‘Sa vacava o watimu? Dua na irogo mai vua?’” Toso na gauna, e qai kila o Andrey nira sega ni via solia vua na vakailesilesi ni valeniveivesu na ivola nei watina. E kaya o Andrey: “Era tukuna vei au niu na lesu ga vei watiqu keu duavata ena ka era vinakata, se meu kaya niu cala.” Ia e yalodina tu ga o Andrey vei Jiova, kei ira na mataveitacini. Oti nona vesu me walu na vula, e sere qai vakatatabutaki i nona vale me va na vula.

Ena ika2 ni Julai 2019, sa sega ni vakatatabutaki o Andrey. Ia era vakatabui koya na vakailesilesi me vakauta, se ciqoma e dua na imeli ena internet. Era vakatabuya tale ga me kua ni veivosaki kei ira eso tale.

Ni waraka tiko na macala ni nona veilewai, e vakasamataka qai vakamareqeta vakalevu nona yalayala vei Jiova. E kaya ena nuidei: “Au marau niu mai kilai Jiova, kei na nona tokoni au tu ga e veigauna.”

Eda marautaka vakalevu na nona nuitaka tiko ga o Andrey na veivuke i Jiova.—Same 28:7.