Ena ika9 ni Epereli 2022, e kaya na mataveilewai na Neftekumskiy District Court of the Stavropol Territory mai Rusia, ni ratou cala o Aleksandr, Konstantin, kei Shamil. Rau totogitaki o Aleksandr kei Shamil me rau sauma e $6,055 na ilavo ni Merika. Ia ni laurai vata kei na gauna rau wawa veilewai tu kina, rau na sega ni totogitaki vakailavo. O Konstantin e vesu me vitu veimama na yabaki. Ni tau oti ga na lewa sa kau sara me lai vesu.

Aleksandr Akopov

• Sucu: 1992 (Neftekumsk)

• Me baleti koya: E cakacaka ena tarataravaki, wili kina o tamana kei tuakana. E dau taleitaka na qito soka, basketball kei na tennis. Dau taleitaka tale ga na sarava na veika bula kei na vakasaqa

  E papitaiso me iVakadinadina i Jiova ena 2007 ni se qai yabaki 14

Konstantin Samsonov

• Sucu: 1977 (Neftekumsk)

• Me baleti koya: Ni se itabagone, e dau taleitaka na qito chess, kei na veika me baleta na kompiuta. Gauna qo, e cakacaka ena tabana ni kompiuta e valenibula. Ena 1998, rau vulica vakaveiwatini na iVolatabu kei ira na iVakadinadina i Jiova. Rau papitaiso ena 2000. E dua na luvedrau tagane

Shamil Sultanov

• Sucu: 1977 (Mahmud-Mekteb, Yasayasa o Stavropol)

• Me baleti koya: Dau tarataravaki. Vulica na iVolatabu kei ira na iVakadinadina i Jiova ena 2000. Papitaiso ena 2003. Rau vakamau kei Elena ena 2004. E dua na luvena tagane o Elena, rau susuga vata tiko

Ena ika26 ni Okosita, 2017, era gole yani na ovisa vakaiyaragi vei ira e 18 na tacida era gade tiko ena yasa ni dua na drano volekati Neftekumsk. Era tiko tale ga kina na gone kei na itabaqase. Era vakavodoki ena basi, kau ena siteseni ni ovisa qai vakatarogi me tolu na aua. Oti era vaqaqai e levu na mataveitacini e Neftekumsk, qai caka na vaqaqara ena nodra vale. Ratou mani vesu tu me voleka ni dua na yabaki o Aleksandr, o Konstantin kei Shamil me ratou wawa veilewai.

E leqataka o Aleksandr na nona vesu ni dau tautauvimate, e tauvi koya tale ga na mate ni nuiqawaqawa. E kerei Jiova ena masu me vakaukauataki koya, me rawa ni vosota ena gauna ena vesu kina. E kaya: “Eso na gauna, au dau kaya vei Jiova niu sa sega ni rawa ni vosota na noqu vesu tiko. Ia me yacova mai qo au sega tu ga ni vakabauta niu vesu tu me [voleka] ni dua na yabaki.” E vakila o Aleksandr ni sauma o Jiova na nona masu ni vukei koya me vakasamataka mai eso na tikinivolatabu. E vola kece na tikinivolatabu qori, qai dau wilika e dua ena veimataka. E vakasamataka tale ga na sala ena rawa ni vukei koya kina. Qori e vukei koya me tiko ga vua na rai i Jiova.

E dau vakayaloqaqataki Konstantin vakalevu na ivola e dau vakauta vua o watina. E kaya: “Dua na gauna a vola mai meu raica noqu vesu me vaka ga au gole tu vagade. E lasa tale vei au, ia sa bau veivuke toka na ka e tukuna.”

E tukuna o Shamil ni dredre ga vua na imatai ni vica na vula na nona vesu. E kaya: “Toso na gauna sa qai vaka me vinaka mai. Au vakila tale ga ni tokoni au tiko o Jiova.” E vulica kina o Shamil me dau nuitaki Jiova, me kua tale ga ni leqataka vakalevu na veika e se bera ni yaco.

Ratou vakatatabutaki na tolu na tacida qori, e sega tale ga ni vakatarai me ratou vakayagataka na talevoni se internet. E sega ni rawa ni laurai kina vakavuniwai o Aleksandr, e vakadredretaka tale ga na nona cakacaka o Konstantin ni kenadau ena porokaramutaki ni kompiuta. Dina ni ratou sotava na ituvaki dredre na tacida, ia ratou vakadeitaka me ratou yalodina tiko ga vei Jiova.

Eda kila ni o Jiova ena vakalougatataka na nodratou vakararavi tiko ga vua.—Same 20:7.