2 NOVEBA, 2021
RUSIA

IROGO VOU | Ratou Nuitaki Jiova e Lima na Tacida

SARAVA/ROGOCA

Ena ika11 ni Me 2022, e sega ni vakadonuya na mataveilewai na Sakhalin Regional Court mai Rusia, nodratou kerekere o Brother Vyacheslav Ivanov, Brother Aleksandr Kozlitin, Brother Sergey Kulakov, Sister Tatyana Kulakova, kei Brother Yevgeniy Yelin. Ratou na sega ni biu e valeniveivesu ena gauna qo.

Ena ika31 ni Janueri 2022, e kaya na mataveilewai na Nevelskiy City Court of the Sakhalin Region mai Rusia, ni cala o Vyacheslav, Brother Aleksandr, Brother Sergey, Sister Tatyana, kei Brother Yevgeniy. Rau na vakatatabutaki o Sergey kei Yevgeniy me ono veimama na yabaki. O Vyacheslav, Aleksandr, kei Tatyana ratou na vakatatabutaki me rua na yabaki.

Veitaravi ni Gauna

Julai 2020

Vakatabui o Vyacheslav, Aleksandr, Sergey, kei Tatyana me ratou lako ina dua tale na vanua
2 Epereli, 2020

Vakatabui o Yevgeniy me lako ina dua tale na vanua
20 Janueri, 2019

Ratou curuma vakaukaua na ovisa vakalecaleca e Rusia e 11 na nodra vale era kasamitaki nira iVakadinadina i Jiova. E voravora na nodratou itovo na ovisa, era vakatarogi mada na gone lailai era lewenivuvale ya. E caka qo ni kacivaka oti ga o Vladimir Putin na Peresitedi kei Rusia ni na vaqaqa na nodra vakacacani tiko na tacida

Kena iTukutuku

Sergey Kulakov

Sucu: 1961 (Nevelsk, Yasayasa o Sakhalin)

Me baleti koya: E vuli ena koronivuli curu i bure ni yabaki 14. Ni se gone, e dau qito soka kei na chess. E tauri vola mai na koronivuli ni vuli tara. E vulica me dau vakavinakataka na waqa. Sa cegu mai na cakacaka ena gauna qo

Ena veiyabaki ni 2000, rau vulica na iVolatabu kei watina o Tatyana. E uqeti koya na nodra veilomani na mataveitacini, qai papitaiso ena 2008. E rua na luvedrau tagane

Ka e Tukuna

Cava eso na ka dredre e vukei iko kina o Jiova?

Au lomaocaoca qai sega ni vakila na marau, ia noqu gumatua ni vuli vakataki au qai yalodina tiko ga vei Jiova, au vakadinadinataka kina na tikinivolatabu qo: “Oni yalodina vei koya e yalodina vei kemuni.” (2 Samuela 22:26) Sa qai qaqaco ga na noqu lomani Jiova, au nuitaki koya tale ga vakalevu. Qori e vukei au meu kua ni leqataka na gauna se bera mai. Au kila se mani cava e yaco, ena taqomaki au o Jiova.

Tatyana Kulakova

Sucu: 1973 (Nevelsk, Yasayasa o Sakhalin)

Me baleti koya: Ni se gone e taleitaka na wiliwili, droini kei na ivakatagi. E dau boroboro, palasitataka tale ga na simede. Rau vakamau kei Sergey ena 1996, e rua na luvedrau tagane

E qoroya na ka e tukuna na iVolatabu me baleta na inaki ni vuravura, kei na kedra ituvaki na mate. Papitaiso sara ena 2003

Ka e Tukuna

Tikinivolatabu cava e vukei iko mo yaloqaqa se mo vosota tiko ga ena marau?

Au beitaki qai vinakati meu rairai vei ratou na ovisa, ni oti nodra vaqaqara e vale. Gauna qori, e vakayaloqaqataki au na ka e tukuna o Ilaisa vei nona dauveiqaravi: “Era lewe levu era tiko vata kei kedaru, era lewe lailai ga era tiko vata kei ira.” Au raitayaloyalotaka ni tu e yasaqu o Jiova, Jisu kei ira na agilosi. Qori e vukei au meu kua ni lomaleqa vakasivia, qai cakava ga na ka au rawata.

Yevgeniy Yelin

Sucu: 1974 (Yuzhno-Sakhalinsk, Yasayasa o Sakhalin)

Me baleti koya: Ni se gone, e taleitaka na droini. E dau ukutaka na vale. Ia gauna qo, sa dua tiko nona kabani ni vakavinakataki vale. E dau tara iyaya ni vale tale ga

Dau vakadikeva na iVolatabu ni se vuli ena sekeneri. E sotavi ira sara na iVakadinadina i Jiova ena 1990, qai qoroya na nodra muria vinaka na ivakavuvuli vakaivolatabu. Papitaiso sara ena 1992. Rau vakamau kei Anastasia ena 2017

Ka e Tukuna

Na ivakasala cava o via tukuna vei ira na rawa ni tusaqati?

Mera vakatawana vakalevu na lomadra kei na nodra vakasama ena veika vakayalo. E bibi meda talairawarawa ena veidusimaki ni isoqosoqo. Eda namaka tiko na kena vakayacori na parofisai me baleta na vuravura vou, ia ena yaco mada i liu na parofisai nida na vakacacani. Koya gona, nida tusaqati eda vakaitavi tiko ena vakayacori ni parofisai qori. Qo e dua dina na itavi dokai!

Eda kila ni o Jiova ena tokoni ira tiko ga na tacida, ra qai duavata kei na ka e tukuna na parofita o Aisea: “E noqu ivakabula na Kalou. Au na nuitaka, au na sega ni rere.”—Aisea 12:2.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU