Ena ika16 ni Tiseba 2021, e kaya na mataveilewai na Naberezhnye Chelny City Court of the Republic of Tatarstan mai Rusia, ni ratou cala o Brother Ilkham, Brother Konstantin, Brother Vladimir kei Brother Aydar. Rau vakatatabutaki o Ilkham kei Konstantin me rau ya 30 na vula. O Vladimir ena vakatatabutaki me 37 na vula, ia o Aydar ena vakatatabutaki me 33 na vula.

Ilkham Karimov

• Sucu: 1981 (Jomboy, Uzbekistan)

• Me baleti koya: Vulica na caka iloilo. Cakacaka ena levu na vanua e Uzbekistan me tokona kina nona vuvale. Toki i Rusia ena 2000. Dua na siga ena 2001, a masuta na Kalou me vukei koya. Ena siga tarava ga, e sotava e dua na iVakadinadina i Jiova qai vulica sara na iVolatabu. Papitaiso sara ena 2004, rau vakamau kei Yulia ena 2012

Konstantin Matrashov

• Sucu: 1988 (Prokopyevsk)

• Me baleti koya: Ni se gone, sa takali o tamana. E dau mekeniki o Konstantin. Ni se yabaki walu, e dau tokoni tinana ni dua na iVakadinadina i Jiova. Taleitaka na inuinui e tukuni ena iVolatabu. Papitaiso sara ena 2018

Vladimir Myakushin

• Sucu: 1987 (Nizhnekamsk)

• Me baleti koya: Tauri vola mai na rua na koronivuli ni vuli cakacaka, lai idinia sara ena dua na kabani ni livaliva. E taleitaka na donu kei na matata ni ivakavuvuli ena iVolatabu, e vakila tale ga kina na kena yaga. Papitaiso sara ena 2013, rau vakamau kei Svetlana ena 2017

Aydar Yulmetyev

• Sucu: 1993 (Nizhnekamsk)

• Me baleti koya: Vulica na ivakatagi kei na mekeniki. E kenadau ena caka misini, e mekeniki tale ga. Tekivu vulica na iVolatabu ni raica na kena yaga vei rau nona itubutubu. Papitaiso sara ena 2012, rau vakamau kei Albina ena 2013. E sega ni via curu ena mataivalu ena vuku ni nona vakabauta, qai kerea me vakaitavi ena veiqaravi raraba

Ena ika27 ni Me 2018, era curuma vakaukaua na vakailesilesi e Tatarstan e tini nodra vale na tacida. Ratou mani vesu o Ilkham, Konstantin, Vladimir, kei Aydar me sivia e 160 na siga. Oti ratou qai vakatatabutaki tu i vale.

Dina ni ratou sa sega ni vakatatabutaki e vale, ia e beitaki ratou na matanitu o Rusia ni ratou vakavuna na “tikoyavavala.” E lewa tale ga me ratou kua ni lako ina dua tale na vanua. E sega ni rawa ni ratou tauri ilavo mai na baqe, e dredre tale ga me ratou kunea e dua na cakacaka.

Ni vakasamataka lesu o Aydar na gauna e vesu tu kina, e kaya: “Au lai nanuma mai e levu na tikinivolatabu. . . . Au sega ni rawata qori ena noqu kaukaua ga, o Jiova ga e vukei au meu vakasamataka mai e levu na tikinivolatabu.”

Dua na ka nona rere o Konstantin ena gauna e vesu kina. Ia e sega ni via vakasamataka vakalevu, qai saga me wasea nona vakabauta vei ira na vakailesilesi ni mataveilewai, ira na yadra, kaivesu, ovisa kei ira na ovisa ni valeniveivesu. E kaya: “Noqu vesu qo e uqeti au meu vunau vakalevu. Me vaka ga e vola na yapositolo o Paula ena imatai ni senitiuri ena Filipai 1:12, 13: ‘Au vinakata moni kila raveitacini, ni ka kece e yacovi au e tete kina na itukutuku vinaka, e kilai levu gona vei ira na sotia ni Roma kei ira na kena vo niu vesu ena noqu muri Karisito.’”

E vakavinavinakataka o Vladimir na nodra veitokoni, kei na nodra veivuke na mataveitacini. E kaya: “E dau tukuna o watiqu nira dau vukei koya vakailavo na tacida me volia kina na ka au vinakata, qai dau vakauta mai. E vakaiyalayala ga na ka e rawa ni vakau mai i valeniveivesu. Ia eso na gauna e sivia tale na ka e vakau mai vei au.”

E vakamacalataka o Ilkham na sala sa qai qaqaco tiko ga kina nona veiwekani kei Jiova. E kaya: “Au sa qai volekata ga na Tamada vakalomalagi ena gauna au vesu tu kina. Au nuitaki koya vakalevu, qai vakararavi vakatabakidua vua. Sa qai wasoma na noqu dau masu vei Jiova, e balavu qai vakaibalebale tale ga.”

Eda kila ni ratou na vakalougatataki na tacida qo kei na nodratou vuvale, ni ratou ‘qaravi Jiova mai vu ni lomadratou, qai yalodina tiko ga’ ena ituvaki dredre ratou sotava.—1 Timoci 2:2.