Ena ika23 ni Okosita 2021, e sega ni vakadonuya na mataveilewai na Perm Territory Court mai Rusia, nodratou kerekere o Boris, Aleksandr, Viktor, Igor, kei Yuriy. Ratou na vakatatabutaki.

Ena ika12 ni Me 2021, e tauca na mataveilewai na Industrial District Court of the City of Perm mai Rusia, na lewa me baleti Boris, Aleksandr, Viktor, Igor, kei Yuriy. O Igor e vakatatabutaki me vitu na yabaki. Ratou vakatatabutaki na kena vo me rua veimama na yabaki.

Boris Burylov

• Sucu: 1941 (Sevastopol)

• Me baleti koya: Susu ena yasayasa o Perm. Vakoroi ena tabana ni iteitei. Ni se gone, e dau wilika vua o tinana eso na tikinivolatabu. E dua nona iVolatabu ena veiyabaki ni 1990. Papitaiso sara me iVakadinadina i Jiova ena 1996

Aleksandr Inozemtsev

• Sucu: 1972 (Kostanay)

• Me baleti koya: A lewena tu na mataivalu. E daunilivaliva, ripea motoka, e dau tara vale tale ga. Ni vulica oti na iVolatabu kei ira na iVakadinadina i Jiova, e vakacegui koya nona kila na vuna eda sotava tiko kina na veika tawadodonu kei na mate. Papitaiso sara ena 1996. Rau vakamau kei Olesya ena 2017. Rau susuga tiko e dua na luvedrau yalewa. E taleitaka na droini, qito hockey kei na siwa

Viktor Kuchkov

• Sucu: 1967 (Svetlitsa)

• Me baleti koya: Ni se gone e taleitaka na ceuceu (wood carving). Vulica qai cakacaka me dua na idinia ena vanua ni buli kaukamea. Taleitaka na siwa kei na qito volleyball. Rau vakamau kei Tanya ena 1988. Dua ga na luvedrau yalewa. E taleitaka me veivosakitaka na veika vakayalo. Papitaiso me iVakadinadina i Jiova ena 1993

Igor Turik

• Sucu: 1968 (Nelidovo)

• Me baleti koya: E dau veitaba, e daunipeleni tale ga. Tekivu vulica na iVolatabu kei ira na iVakadinadina i Jiova ena veiyabaki ni 1990. E taleitaka ni sega vakadua ni veicalati na kaya na iVolatabu. Papitaiso ena 1998. Vakamau ena 2002, e dua na luvena tagane, dua tale ga na luvena yalewa. E taleitaka na veitaba, caka vidio kei na ka vakalivaliva ni retio

Yuriy Vaag

• Sucu: 1975 (Lesosibirsk)

• Me baleti koya: Vulica me draivataka na misini ni usaiyaya lelevu (crane operator). Gauna qo, e daunilivaliva, e cakacaka tale ga vakamatai. Ni se sotia tu, a tukuna vua o ganena na veika mai na iVolatabu. Ni raica o Yuriy ni yaga vei ganena na ka e vulica ena iVolatabu, qori e uqeti koya me vulica tale ga. Papitaiso ena 1996. Rau vakamau kei Svetlana ena 1996. Dua na luvedrau tagane, dua tale ga na yalewa

Ena ika17 ni Seviteba 2018, era vaqaqara na ovisa na Federal Security Service (FSB), kei ira na sotia ena levu na vale ena yasayasa o Perm. E rauta ni tini nodra vale na tacida e caka kina na vaqaqara. Gauna vata qori, era taura na ovisa na nodra ilavo, talevoni kei na iyaya vakalivaliva. Rau mani vesu me vica na siga o Viktor kei Igor, oti rau vakatabui me rau biuta nodrau vale me rauta ni va na vula. Gauna qo, ratou sa vakatabui tiko ena so na ka na tacida tagane qo. Ratou okati tale ga ni ratou vakavuna na “tikoyavavala” e Rusia.

Dina ni ratou sotava e levu na ituvaki dredre, ia ratou yalodina qai marau tiko ga.

E kaya o Yuriy ni gauna qo sa qai wasoma ga nona masuti Jiova. E vakasamataka tale ga vakatitobu na sala e tokoni koya kina o Jiova, qai vakayaloqaqataki koya tiko ga. E kaya: “E vakacegui au, qai dusimaki au na ka e kaya na Josua 1:7. Au vakila kina nona veitokoni kei na nona veitaqomaki o Jiova.”

E kaya o Viktor ni vukei koya me lomavakacegu ena ituvaki dredre e sotava, na nona dau vakasamataka na isoqosoqo i Jiova. E kaya: “Au dau vakasamataka nona veikauaitaki vakayalololoma o Jiova, na nona isoqosoqo mai lomalagi kei vuravura, na noda veilomani vakaveitacini e veiyasa i vuravura, na cakacaka vakavunau e vuravura raraba kei na veika dina au mai vulica. Qori e vukei au meu kua ni kauaitaka vakalevu na ituvaki au sotava. Au vakila sara ga kina na lomavakacegu.”

Ni lesu i vale o Igor e nanuma lesu eso na ka lasa e sotava. E kaya: “Niu vesu tiko, a droinitaka mai o luvequ na vuravura vou me vakayaloqaqataki au. Era sega ni vakadonuya na ovisa meu raica na nona droini. E kaya o watiqu ni raica tu vakadede e dua na vakailesilesi ni valeniveivesu na droini qori qai solia lesu tale vua, qai kaya: ‘E sega ni vakatarai me kau i loma, qo e vaka e dua na mape ni dro.’” E kaya o Igor: “Io, e dina na ka e kaya, na vuravura vou e [noda] mape ni dro meda drovaka kina na ituvaki ca ni vuravura qo!”

Eda nuidei ni o Jiova ena vakayagataka tiko ga nona yalotabu, me vukei ratou na tacida tagane qo kei na nodratou vuvale. Eda kila ni o Jiova ena vakaukauataki ratou tiko ga.—Efeso 3:20.