Ena ika3 ni June 2022, e kaya na mataveilewai na Pervomayskiy District Court of Kirov, ni ratou cala o Brother Maksim Khalturin, Brother Vladimir Korobeynikov, Brother Andrzej Oniszczuk, Brother Andrey Suvorkov, Brother Yevgeniy Suvorkov, kei Brother Vladimir Vasilyev. Ratou na vakatatabutaki tiko ena loma ni rua veimama ina ono veimama na yabaki. E beitaki tale ga o Brother Yuriy Geraskov ena kisi qo, ia e takali ni bera ni macala na veilewai.

Yuriy Geraskov

• Sucu: 1956 (Azerbaijan)

• Mate: Epereli 24, 2020

• Me baleti koya: E taleitaka na qito soka kei na veitaba. Cakacaka ena dua na mataivakatagi levu. Toki i Rusia ena 1993 ena vuku ni veika vakapolitiki e Azerbaijan. Rau vakamau kei Alevtina ena 2011. E papitaiso tale ga o Yuriy me iVakadinadina i Jiova ena yabaki qori. Rau taleitaka vakaveiwatini na taubale kei na gade vei nodrau itokani

Maksim Khalturin

• Sucu: 1974 (Kirov, Yasayasa o Kirov)

• Me baleti koya: E taleitaka na wilivola ni se gone. Tekivu vulica na iVolatabu ena 1993, qai papitaiso me iVakadinadina i Jiova ena 1995. E qaravi rau nona itubutubu itabaqase rau sega ni iVakadinadina i Jiova, ia rau dau tokona na nona vakabauta

Vladimir Korobeynikov

• Sucu: 1952 (Dikson Island, Yasayasa o Krasnoyarsk)

• Me baleti koya: E sainitisi o tamana, e vulica o Vladimir na veika me baleta na wasawasa ena vanua batabata. Ni se gone e dau taleitaka me bulia eso na iyaya lalai. E daunipalama, e daunimisini tale ga. Sa cegu mai na cakacaka, qai dau taleitaka na siwa.

  Rau vulica vakaveiwatini na iVolatabu kei ira na iVakadinadina i Jiova ena 1990. E taleitaka vakalevu na parofisai vakaivolatabu, qai papitaiso ena 1996. E vukei ratou na ivakavuvuli vakaivolatabu me ratou marautaka nodratou bula vakavuvale, okati kina o rau na luvedrau rau sa uabula

Andrzej Oniszczuk

• Sucu: 1968 (Białystok, Poladi)

• Me baleti koya: Ni se itabagone, e taleitaka na qito soka kei na lave ka bi. E papitaiso ena 1990, qai toki e Kirov ena 1997. E taleitaka na wilika na ivola vakaRusia. Rau vakamau kei Anna ena 2002. Rau dau taleitaka me rau cakava vata eso na ka e tautuba, me vaka na qito soka kei na vaqara mushroom e dua na mataqali kakana draudrau

Andrey Suvorkov

• Sucu: 1993 (Kirov, Yasayasa o Kirov)

• Me baleti koya: Ni se gone dramidrami, sa vakavulici koya o tinana ena ka dina. Ni tubu tiko, e taleitaka me vulica na veika vakasaenisi, kei na qito volleyball. E papitaiso me iVakadinadina i Jiova ena 2007. Cakacaka ena vanua era dau vukei kina na vakayagataka vakasivia na wainimate gaga. E cakava qori me isosomi ni nona curu ina mataivalu. Rau vakamau kei Svetlana ena 2016. Rau dau taleitaka na qito.

Yevgeniy Suvorkov

• Sucu: 1978 (Kumeny, Yasayasa o Kirov)

• Me baleti koya: Ni se gone, e taleitaka na qito chess, hockey kei na rogo ivakatagi. E cakacaka ena tabana ni livaliva. E tekivu vulica na iVolatabu kei ira na iVakadinadina i Jiova ni se yabaki 16, qai papitaiso ena 1995. Ni yabaki 18, e kerea e dua na cakacaka me isosomi ni nona curu ina mataivalu. E qai vakadonui qori ni oti nona veilewaitaki vakaono. Rau vakamau kei Svetlana ena 2000, rau qai susuga na luvei Svetlana tagane o Andrey (sa vakamacalataki mai cake)

Vladimir Vasilyev

• Sucu: 1956 (Perm)

• Me baleti koya: Ni se gone, e dau taleitaka na qito soka. E daunipalama, e draiva tale ga. Sa cegu mai na nona cakacaka. Rau vulica vata vakaveiwatini na iVolatabu, kei ira na iVakadinadina i Jiova ena 1990. E papitaiso sara ena 1994

Ena ika9 ni Okotova, 2018, era vaqaqara na vakailesilesi ena 14 na nodra vale na iVakadinadina i Jiova e Kirov. Ratou mani vesu me ratou wawa veilewai o Brother Maksim Khalturin, Brother Vladimir Korobeynikov, Brother Andrzej Oniszczuk, Brother Andrey Suvorkov kei Brother Yevgeniy Suvorkov. Rau beitaki tale ga o Brother Vladimir Vasilyev, kei Brother Yuriy Geraskov ena Janueri kei na Julai, 2019.

E vesu tu vakawawa o Vladimir Korobeynikov me sivia e rua na vula. E qai sere me lai qaravi luvena kei watina e tauvimate tiko, ia e vakatabui me biuta na nona vale. Rau vesu qai wawa veilewai tu o Maksim kei Andrey me sivia e tolu na vula. E vesu o Yevgeniy me voleka ni lima na vula. E vesu tale ga o Andrzej me 327 na siga. Ratou sa sere, ia e vakatabui me ratou gole ina dua tale na vanua.

Gauna ratou vesu tu kina, e dredre sara ga me ratou yawaka nodratou vuvale. Ia ratou nuidei ni o Jiova ena tokoni ratou.

Kena ivakaraitaki, e lokiloki o Olga na wati Vladimir. E kaya Vladimir: “Au lomaleqa sara ga ni tu duadua tu i vale o watiqu.” E kaya tale ga nira taura na vakailesilesi na talevoni nei watina ena gauna era vaqaqara yani kina. Dua na ka nona leqataki watina o Vladimir, ia e qai volavola mai e dua na tacida yalewa me kaya nira sa qaravi watina tiko na mataveitacini. Oti qori e volavola tale ga mai o Olga, e kaya ni bula vinaka tiko.

E dredre vakalevu na ituvaki ratou sotava na tacida ni vakatabui me ratou veilakoyaki, ratou beitaki tale ga ni ratou vakavuna na “tikoyavavala.” Kena ivakaraitaki, e dredre me ratou kunea e dua na cakacaka tudei. E vakatabui tale ga me ratou taura na nodratou ilavo ena baqe.

Ia e kaya o Yevgeniy: “O Jiova e vakarautaka na ka kece keitou gadreva. Me vakataki ira ga na Isireli ena vanualiwa, e sega ni dua na ka keitou leqa kina. Keitou vakadinadinataka na nona vakayagataki ira na tacida o Jiova mera vukei keitou vakayago, vakayalo, ra vakayaloqaqataki keitou tale ga.”

Ratou kaya na tacida na veika e vukei ratou me ratou yalodina qai yaloqaqa tiko ga. Qori na masu, nodratou vuli vakataki ratou kei na wili iVolatabu. Kena vakaraitaki, e kaya o Vladimir Vasilyev: “E vukei keitou na iVolatabu me keitou kua ni guilecava ni o Jiova e kila vinaka tu na ka kece keitou sotava. Qori e vaqaqacotaka na neitou vakabauta, keitou sa qai nuitaki koya ga vakalevu.”

Eratou vakila na veika dredre na tacida qori, kei na nodratou dui vuvale. Ia eda vakadeitaka ni ratou na nuitaki Jiova tiko ga. Ratou yalodina tiko ga, ni ratou kila ni sega ni dua na “tamata” ena vakaleqai ratou.—Same 56:4.