SEVITEBA 23, 2021
RUSIA

IROGO VOU—SEGA NI VAKADONUI NODRATOU KEREKERE | Ratou Nuitaki Jiova kei Ira na Mataveitacini

SARAVA/ROGOCA

Ena ika26 ni Seviteba 2022, e sega ni vakadonuya na mataveilewai na Primorye Territory Court of Vladivostok mai Rusia, nodratou kerekere o Sister Nadezhda Anoykina, Sister Lyubov Galaktionova, Sister Nailya Kogay, Sister Nina Purge, Sister Raisa Usanova, kei Brother Valentin Osadchuk. Ratou na sega ni biu e valeniveivesu ena gauna qo.

Ena imatai ni June 2022, e kaya na mataveilewai na Leninskiy District Court of Vladivostok mai Rusia, ni ratou cala o Nadezhda, Lyubov, Nailya, Nina, Raisa kei Valentin. Ratou na vakatatabutaki e vale me rua na yabaki, ia o Valentin ena vakatatabutaki e vale me ono na yabaki. E rube tiko nona kisi o Sister Yelena Zayshchuk e yabaki 87, ni tauvimate bibi tiko.

Veitaravi ni Gauna

Janueri 19, 2021

Kau nodratou kisi ena mataveilewai na Leninskiy District Court of Vladivostok
Noveba 12, 2019

Kaya na turaganilewa me ratou dikeva tale na kisi na dauveibeitaki
Epereli 5, 2019

Sere o Brother Valentin ni oti e 274 na siga nona vesu tu. E mani vakatatabutaki ga e vale
Epereli 19, 2018

Vaqaqara na ovisa na Federal Security Service (FSB) ena nodratou vale na vitu na tacida
Epereli 9, 2018

Vaqaqai o Brother Valentin kei ratou na ono na tacida yalewa, ena tabana ni Investigation Department of the FSB ena yasayasa o Primorsky

Kedratou iTukutuku

Nailya Kogay

Sucu 1951 (Tashkent, Uzbekistan)

Me baleti koya E rua na ganena. Dau taleitaka na qito ni se gone. Ni oti nona vuli ena univesiti, e cakacaka sara vakaidinia ia sa cegu ena gauna qo. Rau vakamau kei Robert ena 1975, qai rua na luvedrau. Ena 1989, e tauvimate bibi o Robert qai vinakati me dua e qaravi koya. Ratou toki e Vladivostok ena 2003

E vakadeitaka ni Vosa ni Kalou na iVolatabu ena gauna e mai vulica kina. E marautaka ni matata qai donu vinaka na ka e tukuni ena iVolatabu, e tarai koya tale ga nona loloma na Kalou. Papitaiso sara ena 1997

Ka e Tukuna

E vukei iko vakacava na ka era tukuna na tacida mo vosota kina na veitusaqati?

Era dau tukuna vei au e levu na tacida yalewa, ‘O ivakaraitaki vinaka dina vei keimami. Keimami qoroya na nomu vosota. E uqeti keimami sara ga me keimami yalodina!’

Nina Purge

Sucu 1940 (Pesok, Yasayasa o Pskov)

Me baleti koya: E dua na ganena. E bula donuya na iKarua ni iValu Levu. Ena 1942 era veiliutaki na sotia ni Jamani ena vanua e tiko kina. Ratou qai dro vakavuvale nira veivakasaurarataki na Nazi

A vuli tiko o watina ena koronivuli na Estonian Maritime Academy ena gauna rau vakamau kina. E rua na luvedrau. E mani lesi o watina i Vladivostok, ratou qai toki i kea vakavuvale

E mai vulica na iVolatabu ena icavacava ni veiyabaki ni 1990. E rawa kina vua me vakararavi vua na Kalou ni sotava na leqa. Papitaiso sara ena 1999

Ka e Tukuna

E vaqaqacotaka vakacava nomu veiwekani kei Jiova na ituvaki dredre o sotava qo?

Au sa qai nuitaki Jiova ga vakalevu. Au kerei koya meu yalodina tiko ga, me vukei au tale ga meu vosota me yacova na icavacava. E vukei au tale ga na Aisea 41:13 meu yaloqaqa, au vakila kina nona tokoni au na Tamaqu [vakalomalagi]. Au sa tu vakarau se mani cava e vakataulewataki.

Raisa Usanova

Sucu 1947 (Kuznetsovo)

Me baleti koya E tolu na ganena qai dua na tacina. Ni oti nona vuli, e toki i Vladivostok me lai vulica na cakacaka ena siteseni ni sitima ni vanua. E vakawati qai rua na luvena yalewa. E draiva tu ni basi me 25 na yabaki, ia sa cegu ena gauna qo

Ena 2000, e mate o tinana, o tacina kei na dua na ganena. Tekivu sara ga mai keri nona via kila na vuna eda mate kina, ke tiko tale ga na noda inuinui. E kunea na isau ni nona taro ni mai vulica na iVolatabu. Papitaiso sara ena 2002

Ka e Tukuna

Cava o vulica ena veika dredre o sotava ena gauna qo ena vukei iko ena veigauna se bera mai?

Au vulica meu dau lewai au vakamatau, vakabibi ena ivakarau ni noqu vosa, meu vosota tale ga na veika dredre qai nuitaki Jiova. Au vakalevutaka tale ga na gauna meu vulica kina na iVolatabu. . . . Qai vinakata meu yalodina tiko ga me yacova na icavacava.

O vakarautaki iko vakacava ena veitusaqati o na rawa ni sotava?

[Au dau saga] meu vakananuma vakatitobu na tikinivolatabu me rawa ni vakalesuya mai ena noqu vakasama na yalo tabu ena gauna veiganiti.—Joni 14:26.

E vakayaloqaqataki keda dina na nodra ivakaraitaki na tacida e Rusia. Era vakaraitaka ni tu vei ira na vakabauta mera na vakabulai kina.—Iperiu 10:39.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU