FEPERUERI 3, 2022
RUSIA

IROGO VOU—SEGA NI VAKADONUI NONA KEREKERE | O Jiova e Vukei Brother Smelov me Vosota

SARAVA/ROGOCA

Ena ika27 ni Seviteba 2022, e sega ni vakadonuya na mataveilewai na Supreme Court of the Republic of Karelia mai Rusia, nona kerekere o Brother Aleksey Smelov. Ena sauma vakailavo na kena itotogi.

Ena ika21 ni Epereli 2022, e beitaki ni cala o Aleksey ena mataveilewai na Kondopoga City Court of the Republic of Karelia mai Rusia. E totogitaki me sauma e rauta ni $5,012 na ilavo ni Merika.

Veitaravi ni Gauna

Julai 23, 2019

Vaqaqai o Aleksey vei ira na vakailesilesi, qai beitaki ni liutaka tiko na cakacaka ni lotu e vakatabui. E beitaki tale ga ni tuvanaka qai vakaitavi kina
Julai 31, 2019

Era vaqaqara na ovisa ena 15 na nodra vale na tacida e Kondopoga, kei Petrozavodsk. Era lasutaka na ovisa nira cakacaka vakapalama, era curuma na nodratou vale na Smelov ra qai vaqaqara kina. Rau kau o Aleksey kei watina o Irina ina siteseni ni ovisa rau qai lai vakatarogi. E kau o Aleksey ena nodra tikotiko i liu na ovisa e Petrozavodsk. E sere rauta ni veimama na 11 ena bogi, qai vakaroti me kua ni biuta na tauni e tiko kina
Okosita 7, 2019

Beitaki o Aleksey ni beca na lawa ni liutaka, qai vakaitavi ena isoqosoqo e vakavuna na tikoyavavala (Part 1 of Article 282.2 of the Criminal Code of the Russian Federation)
Epereli 9, 2020

Daro na veivaqaqai ena vuku ni matedewa na COVID-19
June 8, 2020

Tomani tale na veivaqaqai

Kena iTalanoa

Aleksey Smelov

Sucu: 1974 (Kondopoga)

Me baleti koya: Ni se gone, e dau matai na qito hockey kei na qalo. A mekeniki tu ena kabani ni caka pepa. E cakacaka tale ga vakaidinia ena vica na yabaki sa oti. E sotavi Irina ena 1993. Oti e rua na yabaki, rau vakamau. E tolu na luvedrau, e le rua rau se tiko i vale.

Ni se gone, e dau via kila na ka ena yaco nida mate. E vulica na iVolatabu kei ira na iVakadinadina i Jiova, e kila tale ga na inuinui ni nodra vakaturi na mate. E veisautaka na ivakarau ni nona bula qai muria na ivakatagedegede ena iVolatabu. E papitaiso ena 2004

Ka e Tukuna

E vukei iko vakacava o Jiova ena gauna dredre qo?

Sa qai qaqaco ga noqu veiwekani kei Jiova niu raica na sala e walia kina e levu na ituvaki dredre au sotava. Kena ivakaraitaki, era kauta kece na neitou talevoni na ovisa ena gauna era vaqaqara kina e vale. Sega ni rawa ni keitou wili iVolatabu, se sema ena soqoni. Keitou masuti Jiova me vukei keitou. E totolo ga nodra veivuke na mataveitacini. Oti ga e vica na siga, era kauta mai neitou talevoni kei na dua na tablet. Keitou rawa ni raica kina na tikinivolatabu ni veisiga, qai wili iVolatabu. Keitou vakadeitaka ni qori sara ga na nona veivuke o Jiova.

Cava nomu ivakasala vei ira na tacida era na rawa tale ga ni tusaqati?

Kua ni rerevaka e dua na ka! O Jiova e kila vinaka na ka kece eda sotava. (2 Veigauna 16:9a) Kua ni guilecava ni dua na ka dokai meda vakaitavi ena kena vakarokorokotaki na yaca i Jiova, da qai tokona na dodonu ni nona veiliutaki!

Me vakai Aleksey, eda nuidei ni o Jiova ena “vakaraitaka na nona kaukaua vei ira” kece na tusaqati.—2 Veigauna 16:9.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU