MAJI 4, 2022
RUSIA

IROGO VOU—SEGA NI VAKADONUI NONA KEREKERE | Vakayaloqaqataki Sister Lyudmila Shchekoldina na Vosa Veiuqeti

SARAVA/ROGOCA

Ena ika6 ni Okotova 2022, e sega ni vakadonuya na mataveilewai na Krasnodar Territory Court mai Rusia, nona kerekere o Sister Lyudmila Shchekoldina. Ena vesu tiko ga.

Ena ika23 ni Me 2022, e kaya na mataveilewai na Pavlovskiy District Court of the Krasnodar Territory mai Rusia, ni cala o Lyudmila. E totogitaki tale ga me va na yabaki dua na vula e valeniveivesu. E vesu ni tau oti ga na lewa.

Veitaravi ni Gauna

Epereli 23, 2020

Beitaki vei ira na vakailesilesi ni daubasulawa ni oti nona veivosakitaka na iVolatabu kei na dua na ovisa vakalecaleca
Epereli 29, 2020

Era vaqaqara na vakailesilesi ena nona vale me ciwa na aua, oti era qai vakatarogi koya. E beitaki ni tokona tiko na cakacaka ni isoqosoqo e vakavuna na tikoyavavala
June 21, 2021

Tekivu veilewaitaki

Kena iTukutuku

Lyudmila Shchekoldina

Sucu: 1976 (Aleksandrovka, Yasayasa o Krasnodar)

Me baleti koya: Ni se gone, e vulica na taba piano. Toso na gauna, e qasenivuli sara

Dau via kila na inaki ni bula, kei na vuna e yaco kina na veika tawadodonu. Tekivu vulica na iVolatabu kei ira na iVakadinadina i Jiova, e vakacegui koya tale ga na isau ni nona lomatarotaro. Papitaiso sara ena 1995

Ka e Tukuna

Era uqeti iko vakacava eso tale?

Wale tiko ga qo, era cakava mai eso na tacida yalewa e dua noqu vidio. E kaya e dua vei ira: “Niu vakasamataki iko tiko, au lai nanuma mai nona ivakaraitaki na goneyalewa lailai ni Isireli. De dua e . . . rairai malumalumu, ia na ka e cakava e laurai kina na nona yaloqaqa! E laurai tale ga vei iko na yaloqaqa qori.”

E vola tale ga mai e dua na ivakatawa ni tabacakacaka eso na tikinivolatabu veiuqeti. Dua ya na Same 68:28, e kaya me baleti au: “Gauna qo, o sotava sara tiko ga na ituvaki dredre. Ia au nuidei ni nomu lomani Jiova kei na nomu yalodina vua, ena vukei iko mo yaloqaqa. . . . O Jiova e dau taleitaki ira nona dauveiqaravi era yalodina.”

Au maroroya tu na vosa veiuqeti kece qori ena dua noqu ivola. Oti au dau qai wiliki ira tale.

Eda nuidei ni o Jiova ena vukei Lyudmila kei ira kece na tacida yalodina, era vosota tiko na ituvaki dredre mera dei tiko ga.—Same 68:28.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU