JUNE 8, 2022
RUSIA

IROGO VOU—SERE O NIKOLAY | Era Veitokoni na Tacida

SARAVA/ROGOCA

Ena ika10 ni Noveba 2022, e vakataulewa na mataveilewai na Vologda Regional Court mai Rusia, ena kisi me baleti Brother Yuriy Baranov, kei Brother Nikolay Stepanov. E dei tiko ga na itotogi nei Yuriy. Sa vakatatabutaki ga o Nikolay me va na yabaki, e sere ni tau oti ga na lewa.

Ena ika5 ni Seviteba 2022, e kaya na mataveilewai na Vologda City Court mai Rusia, ni cala o Yuriy, kei Nikolay. E rube nona kisi o Yuriy me va na yabaki, ena sega ni curu i valeniveivesu ena gauna qo. E vesu me va na yabaki o Nikolay.

Veitaravi ni Gauna

Tiseba 19, 2019

Era curuma vakaukaua na vakailesilesi e ono nodratou vale na tacida e Vologda. Rau mani kau o Yuriy kei Nikolay me rau vesu vakawawa
Tiseba 20, 2019

Sere o Yuriy, qai vakatatabutaki e vale
Tiseba 23, 2019

Vesu tu vakawawa o Nikolay
Maji 16, 2020

Laveti nona vakatatabutaki i vale o Yuriy, ia e sega ni vakatarai me cakava ena so na ka. E sega ni rawa gona ni veitaratara kei ira eso tale me baleta nona kisi, sega ni vakadonui tale ga me vakayagataka na talevoni, kei na internet
Me 19, 2020

Laveti kece nona vakatatabu o Yuriy
Okosita 13, 2020

Sere o Nikolay, qai vakatatabutaki e vale
Seviteba 25, 2020

Laveti nona vakatatabu o Nikolay
Maji 7, 2022

Rau tekivu veilewaitaki

Kedrau iTukutuku

Yuriy Baranov

Sucu: 1952 (Vologda, Yasayasa o Vologda)

Me baleti koya: A welder tu, e daunilivaliva tale ga. Sa cegu mai na nona cakacaka, e qaravi tinana e lokiloki e yabaki 90

Rau vakamau kei Nadezhda ena 1990

Dau vaqaqa tu e levu na taro bibi me baleta na bula, oti e vulica sara na iVolatabu kei ira na iVakadinadina i Jiova. Papitaiso ena 1994

Ka e Tukuna

Na vosa ni veivakayaloqaqataki cava e vukei iko mo vosota?

Era dau vakauta mai na mataveitacini na kad, era dau qiri tale ga mai. Au vakasamataka nona kaya vei au e dua na tacida: “Na ka kece e tiko na kedra itekitekivu, e tiko tale ga na kedra itinitini.” . . . E tukuna tale ga vei au e dua na yadra e valeniveivesu: “Kua ni leqataka e dua na ka.” Au raica na ka rau tukuna me dua na sala e vakayaloqaqataki au kina na Tamada vakalomalagi. . . . Au vakadeitaka kina ni kauaitaki keda vakalevu na Tamada o Jiova.

Nikolay Stepanov

Sucu: 1974 (Vologda)

Me baleti koya: A lewena tu i liu na mataivalu. E dau ukutaka na lomanivale.

E sega ni vakabauta na Kalou. Na nona itau o Alla a vulica na iVolatabu kei tinana ena 1995. E qai vukei Nikolay o Alla me kila ni bula tiko na Kalou. Rau papitaiso ena 1996, rau vakamau tale ga ena 1997. E dua na luvedrau tagane

Ka e Tukuna

Era vukei iko vakacava na mataveitacini ena gauna dredre qo?

Ena dua na gauna me rogoci na noqu kisi, e vakayaloqaqataki au sara ga niu raica na nodra tu ena vanua ni veilewai e rauta ni 50 na tacida!

Era vakauta mai vei au na kad . . . , era masulaki au tale ga. E tarai au vakalevu na ka e vola mai e dua na tacida yalewa: “Taciqu, yaloqaqa qai tudei tiko ga. Ena tokoni iko o Jiova e veigauna kece. Keimami sa masulaki iko tiko yani, keimami na sega tale ga ni guilecavi iko. E marau o Jiova ni raica na nomu yalodina, e sakitaki iko tale ga.”

Dina ni rau vakacacani na tacida, ia e vakayaloqaqataki keda na nodrau ivakaraitaki ni vakabauta.—1 Cesalonaika 3:7.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU