OKOSITA 20, 2021 | IROGO VOU: NOVEBA 28, 2022
RUSIA

IROGO VOU—TAU NA LEWA | Ratou Vakila na Tacida na Veitokoni i Jiova

SARAVA/ROGOCA

Ena ika24 ni Noveba 2022, e kaya na mataveilewai na Kirovskiy District Court of Makhachkala mai Rusia, ni cala o Brother Marat Abdulgalimov, Brother Arsen Abdullaev, Brother Anton Dergalev, kei Sister Mariya Karpova. Ratou na vakatatabutaki tiko ena loma ni ono ina ono veimama na yabaki. Ratou na sega ni biu e valeniveivesu ena gauna qo.

Veitaravi ni Gauna

Me 27, 2020

Vesu me ratou wawa veilewai o Marat, Arsen, Anton, kei Mariya me 362 na siga. Ratou qai sereki me ratou vakatatabutaki e vale
June 4, 2019

E vakataulewataka na Sovetskiy District Court of Makhachkala me ratou wawa veilewai e valeniveivesu
June 1, 2019

Era curuma vakaukaua na ovisa vakalecaleca e Rusia e 13 nodratou vale na iVakadinadina i Jiova e Dagestan
Me 27, 2019

Tekivu vaqaqai o Marat, Arsen, Anton, kei Mariya

Kedratou iTukutuku

Marat Abdulgalimov

Sucu: 1991 (Makhachkala, Republic of Dagestan)

Me baleti koya: Ratou le va na veitacini. Dau taleitaka na qito soka, e vulica tale ga na welding. E cakacaka tu i liu ena vale ni vava

Ni se gone, e dau taleitaka na wili iVolatabu. E dau taleitaki ira era dauloloma, kei ira era vakatotomuri Karisito. Papitaiso me iVakadinadina i Jiova ena 2013

Ka e Tukuna

O vosota vakacava nomu vesu tu me voleka ni dua na yabaki?

Au vakatauvatana na kequ ituvaki kei na ka e yacovi Josefa. Au kila niu na rawa ni vesu me tini na yabaki. Ia e vesu tu o Josefa me 13 na yabaki. Se mani vacava na dredre au sotava, o Jiova ena vukei au meu yalodina tiko ga. Toso na gauna, au vakadinadinataka nona sauma o Jiova na noqu masu. Qori e uqeti au me biuta vua na noqu icolacola bibi. E vukei au na Same 55:22 meu vosota. E yalataki ena tikinivolatabu qori, ni o Jiova ena tokoni au keu biuta vua na noqu icolacola bibi. Qori sara ga na ka au qai cakava.

Arsen Abdullaev

Sucu: 1979 (Kasumkent, Republic of Dagestan)

Me baleti koya: Ni se gone, e dau taleitaka na qito volleyball kei na wilivola. E vakaivola ena caka waini. Wale tiko ga qo e dau vakavinakataka na paipo kei na misini ni katakata e biu e vale

Dina ni rau dau tusaqati koya nona itubutubu, ia e papitaiso me iVakadinadina i Jiova ena 2000. Rau vakamau kei Suat qai dua na luvedrau tagane lailai

Ka e Tukuna

O vorata vakacava na yalolailai ena gauna o vesu tu kina?

Dau vakayaloqaqataki au na noda sere. Levu na gauna au na laga sere. Au taleitaka na sere naba 45, “Na Vakanananu ni Lomaqu.” Eso na gauna au yalolailai, oca, cudru qai sega ni via cakava e dua na ka. Ia au na saga meu kua niu va tiko qori me sivia e dua na siga. Keu yalolailai, au na tukuna ga: ‘Ni o yadra nimataka, me sa oti nomu rarawa. Sa rauta nomu yalolailai. Nanuma tiko era na vuli na wekamu kei ira na mataveitacini ena nomu yalodina, mo vakaukaua tiko.’

Anton Dergalev

Sucu: 1985 (Rostov-on-Don, Yasayasa o Rostov)

Me baleti koya: Rau le rua na veitacini, rau qai susugi vei tinadrau e itubutubu le dua. Rau vakavulici koya ena iVolatabu o tinana kei buna. E daunilivaliva, e dau sasamaki tale ga i tuba. Papitaiso me iVakadinadina i Jiova ena 2002

Ka e Tukuna

E tokoni iko vakacava o Jiova ena gauna dredre qo?

E vakayagataki ira na mataveitacini mera vakayaloqaqataki au. E kaya vei au e dua na kaivesu, nira na guilecavi au na wekaqu kei na itokani ni oti e vica na vula. Ia e kurabui niu se ciqoma tiko ga na nodra ivola kei na iloloma me voleka ni dua na yabaki!

Cava nomu ivakasala vei ira na tacida ke ra mani sotava na veivakacacani?

Kua vakadua ni vakawaletaka na soqoni. Au diva me levu na gauna au tiko ena soqoni. Ni vakayagataka vinaka na ka kece e vakarautaka vei keda o Jiova. Vaqaqacotaka tiko ga nomuni vakabauta kei na nomuni veiwekani kei Jiova. Kua ni leqataka e dua na ka, ni na tokoni keda o Jiova!

Mariya Karpova

Sucu: 1980 (Magadan, Yasayasa o Magadan)

Me baleti koya: Rua na ganena. Dau taleitaka na vakasisisi ena waicevata, gade kei na wilivola. E vulica me dau qaravi ira vakavuniwai na manumanu

Vakacegui koya na ka e kaya na iVolatabu me baleta na veigauna se bera mai. Qori e uqeti koya me papitaiso me iVakadinadina i Jiova ena 1998

Ka e Tukuna

Cava e vukei iko mo kua ni lomaleqa vakalevu ena gauna o vesu tu kina?

Au vakasamataka eso na tikinivolatabu, au mani vola ena dua na ivola. Loma ni tolu na vula e sega tu kina noqu iVolatabu, e vakayaloqaqataki au sara ga na ivola qori. E vukei au vakalevu na Filipai 4:6, 7. Keu mani sotava e dua na ituvaki, au na cega noqu ivola qai wilika na tikinivolatabu qori. Au na vakasamataka: ‘Mo kua ni lomaocaocataka e dua na ka.’ Oti au dau vakila sara ga na lomavakacegu

O kila vakacava ni tokoni iko tiko o Jiova e veigauna kece?

Dua ya nona vukei au meu vosota ena gauna e takali kina o tamaqu niu tu e valeniveivesu. E tukuna vei au na itukutuku qori o tinaqu. Ena siga tiko ga ya, e vakadonuya na ovisa meu vosa vei tinaqu. Niu se tu e valeniveivesu, rau lai vakayaloqaqataki tinaqu tale ga e rua na tacida ena siga ni veibulu. Era dau kauaitaki tinaqu tale ga na vo ni mataveitacini. Era dau qiriti koya, vakau ivola kei na kad vua. Era dau vukei koya tale ga me tiko ena vanua ni veilewai.

Eda nuidei ni na cakava na ka ga e vinakata na Kalou o Jiova me tokoni ira kina na nona tamata.—Lako Yani 3:14.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU