NOVEBA 4, 2022
RUSIA

IROGO VOU—TOTOGITAKI NI RAU CALA | Vakayaloqaqataki ena iVakaraitaki ni Vakabauta ena iVolatabu

SARAVA/ROGOCA

Ena ika8 ni Noveba 2022, e kaya na mataveilewai na Petropavlovsk-Kamchatskiy City Court of the Kamchatka Territory mai Rusia, ni cala o Brother Dmitriy Semenov, kei watina o Nadezhda. Ena rube nodrau kisi me va na yabaki. Rau na sega ni biu e valeniveivesu ena gauna qo.

Veitaravi ni Gauna

Seviteba 3, 2021

Rau dau veivosakitaka o Dmitriy kei Nadezhda na iVolatabu kei na dua na marama. E qai soli itukutuku na marama qori vei ratou na ovisa. Rau mani veilewaitaki na veiwatini. Rau beitaki ni rau uqeta eso tale mera lewena qai vakaitavi ena isoqosoqo e vakavuna na tikoyavavala
Seviteba 6, 2021

Caka na vaqaqara ena nodrau vale. Rau kau me rau lai vakatarogi qai vakatabui me rau lako ena dua tale na vanua
Julai 26, 2022

Tekivu na veilewai

Kedrau iTukutuku

Dmitriy Semenov

Sucu: 1984 (Petropavlovsk-Kamchatskiy)

Me baleti koya: E vulica na fika kei na kompiuta. E kenadau ena porokaramutaki ni kompiuta

E dua na wekana e vakamacalataka vua na veika me baleti ira na iVakadinadina i Jiova. E qai papitaiso ena 2006. E sega ni curu ena mataivalu, e vakaitavi ga ena cakacaka e yaga raraba

Rau vakamau kei Nadezhda ena 2010

Ka e Tukuna

Na ivakaraitaki cava ena iVolatabu e uqeti iko mo nuitaki Jiova?

Ni bera niu tusaqati, au dau vakasamataka vakatitobu nona ivakaraitaki o Jeremaia, vakabibi na gauna e vesu kina ni ravuti Jerusalemi o Papiloni. E kena irairai ni na sega ni vakabulai rawa ena ituvaki qori, ia e taqomaki koya o Jiova ena sala e sega ni namaka. Nira viakana na lewe i Jerusalemi, a sega ni leqa na kena kakana o Jeremaia, e bula tale ga ni vakarusai na koro. (Jeremaia 37:21) E duatani na rai nei Jiova me baleta na ituvaki eda dau sotava, e kila tale ga na cava ena yaco. Ke da nanuma mada ga ni sa rui dredre e dua na ituvaki, o Jiova ena vukei keda ena kena gauna donu.

Nadezhda Semenova

Sucu: 1985 (Yekaterinburg, Sverdlovsk Region)

Me baleti koya: Ni se gone, e taleitaka na danisi kei na lagasere ena matasere ni koronivuli. E cakacaka ena dua na sitoa

E mai kila na dina vei tuakana yalewa e vulica na iVolatabu. Ratou mai iVakadinadina i Jiova kece o Nadezhda, o tinana, kei tuakana yalewa. E papitaiso ena 1997

Rau vakamau kei Dmitriy ena 2010

Ka e Tukuna

Na ivakaraitaki cava ena iVolatabu e vakaukauataka nomu vakabauta?

Keirau se qai vulica oti ga vakaveiwatini nona ivakaraitaki na yada ni Sarifaci, a vinakati me vakaraitaka na vakabauta me rawa ni vakalougatataki. Na ulutaga keirau raica e tukuni kina: “Na Kalou e dau vakalougatataki ira na vakaraitaka na vakabauta.” Ena ilavelave ni Zion Watch Tower ni 1898, e tukuni kina: “E vakatau sara ga vei keda. Ena noda ilakolako ni bula, na Turaga ena vakalaiva na ituvaki me vakatovolei kina noda vakabauta. Ke da vakaraitaka na vakabauta, eda na vakalougatataki; ke sega, eda na calata.”

Au vulica kina se mani dredre vacava na ituvaki, e bibi meu yalodina tiko ga vei Jiova kei ira na mataveitacini. Keu cakava qori, ena vukei au o Jiova meu vosota ni solia vei au na yaloqaqa, vakabauta, kei na kaukaua.

Me vaka rau vakadinadinataka tiko o Dmitriy kei Nadezhda, o Jiova e dau vukei ira nona dauveiqaravi mera yaloqaqa qai kaukaua nira tusaqati. Ena sega vakadua ni biuti ira.—Josua 1:9.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU