Ena ika10 ni Feperueri 2023, e kaya na mataveilewai na Spassk District Court of the Primorsky Territory e Rusia, ni ratou cala o Brother Dmitriy Malevaniy, Brother Aleksey Trofimov, Sister Olga Opaleva kei Sister OlgaPanyuta. E totogitaki me vesu me vitu na yabaki o Brother Malevaniy. E totogitaki o Brother Trofimov me vesu me ono veimama na yabaki. Ena vesu me va na yabaki o Sister Panyuta. Ni oti ga na veilewai, ratou sa kau sara i valeniveivesu. E vakatatabutaki me va veimama na yabaki o Sister Opaleva. Ena sega ni curu e valeniveivesu.

Dmitriy Malevaniy

• Sucu: 1990 (Spassk-Dalny)

• Me baleti koya: E qasenivuli ni kompiuta o Dmitriy, qai daudroini o Ulyana na watina. E tekivu vulica na iVolatabu kei ira na iVakadinadina i Jiova ni se itabagone. E vakadeitaka kina ni nuitaki na iVolatabu, ena vakainaki tale ga nona bula ke muria na kena ivakasala. E papitaiso ena 2004

Olga Opaleva

• Sucu: 1952 (Spassk-Dalny)

• Me baleti koya: Ni se gone e vakabauta na Kalou, e sega ga ni taleitaka na iVolatabu. Ni takali oti o luvena yalewa e yabaki 22, e sotavi ira sara na iVakadinadina i Jiova. E marautaka na inuinui ni veivakaturi e volai tu ena iVolatabu. E papitaiso sara ena 1995. E taleitaka na ivakatagi kei na lagasere, vakabibi na lagati ni sere ni soqoni

Olga Panyuta

• Sucu: 1959 (Nizhny Novgorod)

• Me baleti koya: Sa vakacegu mai na nona qasenivuli ena nodra koronivuli na gonelalai (kindergarten), kei na nona veiqaravi raraba. E sotavi watina o Vladimir ena 1982. E tolu na luvedrau, rua e yalewa qai dua e tagane. Vulica na iVolatabu kei ira na iVakadinadina i Jiova, qai marautaka na kena matata, e rawarawa tale ga ni kilai na ivakavuvuli vakaivolatabu. E papitaiso ena 1996

Aleksey Trofimov

• Sucu: 1959 (Mamakan, Yasayasa o Irkutsk)

• Me baleti koya: Sotavi watina o Tamara ena gauna e vuli tiko kina ena univesiti e Vladivostok. E va na luvedrau qai vica na makubudrau. E dau caka ki, ia wale tiko ga qo sa liutaka tiko na cakacaka ena vanua era tu kina na taqe ni waikatakata. Ena 1990, a vulica ena iVolatabu ni rawa ni vakainaki noda bula qai vakatulewataka me qaravi Jiova. Papitaiso sara ena 1996

Ena ika25 ni Noveba 2018, era curuma ra qai vaqaqara na ovisa ena nodratou vale e va na iVakadinadina i Jiova ena taoni o Spassk-Dalny. Era vakayagataka na ivaro livaliva mera dolava kina nona vale o Sister Olga Opaleva. Nira curu i nona vale, era tarogi koya se cava e sega ni dolava kina na katuba. Ni sega ni matata na ka e tukuna, ratou mani qirita na ovisa na lori me kauti koya e valenibula. E qai kilai ni tauvi koya na mateniuto. Ena siga tiko ga ya ratou kauti koya sara ina siteseni me lai vakatarogi. Ni tauvi Olga na mateniuto, e sega ni rawa ni yavalata na ligana kei na yavana imawi. E dau qaravi koya o Brother Vitaliy Ilinykh na luvena tagane, ia e veilewaitaki tale ga ina dua tale na kisi.

Ratou vesu tu vakawawa na va na tacida qo me rua na siga. Ratou mani totogitaki ena ika27 ni Noveba 2018, me ratou vakatatabutaki e vale. Oti e dua na yabaki, e vakalailaitaki na kedratou itotogi.

Ratou beitaki ni ratou tuvanaka, qai vakaitavi ena cakacaka ni isoqosoqo e vakavuna na tikoyavavala.

Era sega ni taura rawa na wekadratou kei na nodratou itokani na vuna ratou totogitaki kina ena vuku ni nodratou vakabauta. Era kaya ni ratou dau muria na lawa ni vanua. O ira mada ga na cakacaka vata kei Dmitriy era sega ni duavata kei na ka e vakabauta. Ia era tokoni koya ena gauna e veilewaitaki kina, ra qai uqeti koya me kua ni soro.

E kaya o Dmitriy na marau e vakila ena gauna e tusaqati kina e vakaraitaka ni tokoni koya tiko o Jiova. E kaya: “Na ititoko nei Mosese e vakaraitaka ni tokoni koya tiko o Jiova. Na marau tale ga au vakila e vakaraitaka ni tokoni au o Jiova. Qori e dua na ivakadinadina levu vei ira era cakacaka tiko ena mataveilewai, kei ira era vaqaqai au.”

E kaya o Olga Opaleva: “Noqu vosota tiko na veitusaqati e vakaraitaka ni tokoni au tu ga o Jiova. E uqeti au tale ga meu nuitaki koya vakalevu ena ka lalai mada ga, qai biuta vua noqu icolacola kece.”

E vakamcalataka o Aleksey na ka e vukei koya ena gauna e vesu qai vakatatabutaki kina: “E vakaukauataki au sara ga o Jiova. Au vakadinadinataka qori ena gauna au vesu tu kina. Au kerei koya me vukei au meu yaloqaqa. Oti ga noqu masu, e yali sara ga na ninini ni yavaqu, ligaqu kei na rorogo ni domoqu. Ni veisau na kequ ituvaki, au saga sara meu vakamatauni au kina.”

E kaya o Olga Panyuta: “E dodonu meda yalodina tiko ga vei Jiova ni na lagiti kina na yacana. Meda nuitaki koya, qaravi koya mai vu ni lomada, qai vaqaqacotaka noda veiwekani kei koya.”

Ratou se waraka tiko na tacida qo na macala ni nodratou veilewai. Meda masulaka me ratou nuitaki Jiova tiko ga ni o koya na nodratou “Uluvatu,” ena vakaukauataki ratou me ratou vosota.—Vakarua 32:4.