E kaya na mataveilewai na Birobidzhan District Court of the Jewish Autonomous Region mai Rusia, ni ratou cala o Brother Alam Aliyev, Brother Valeriy Kriger, Brother Sergey Shulyarenko, kei Brother Dmitriy Zagulin. E vesu me ono veimama na yabaki o Brother Aliyev, o Brother Zagulin e vesu me tolu veimama na yabaki. O Brother Kriger kei Brother Shulyarenko rau vesu me vitu na yabaki. Ni tau oti ga na lewa, ratou sa vesu sara.

Alam Aliyev

• Sucu: 1963 (Koro o Lyaki, Azerbaijan)

• Me baleti koya: Lewena tu na mataivalu ni Soviet Union mai Jamani. Oti e cakacaka ena waqa ni qoli. Toki ena 1989 e Khabarovsk, mai Rusia. Gauna qo, e cakacaka tiko ena vale ni culacula

  Oti ga vakalailai nona toki e vulica sara na iVolatabu qai papitaiso ena 1991. Rau vakamau kei Svetalana ena 2015. Rau taleitaka me rau cakava eso na ka i tautuba

Valeriy Kriger

• Sucu: 1968 (Jewish Autonomous Region)

• Me baleti koya: Susu ena vuvale e sega ni dau lotu. Ni se gone, e taleitaka na dausolivukivuki (acrobatic). Vulica na veibobo, gauna qo sa cicivaka tiko nona bisinisi ni veibobo. Papitaiso ena 1994, rau vakamau kei Natalya ena 2017. Rau taleitaka na qito volleyball, kei na so na ka me rau cakava i tuba

Sergey Shulyarenko

• Sucu: 1984 (Khabarovsk)

• Me baleti koya: Ni se gone, a susu tu e Turkmenistan, a sotia tale ga e kea o tamana. E dau culacula o Sergey. Taleitaka na droini qai vulica eso tale na vosa. Vakavulici koya o tinana me baleti Jiova. Papitaiso ena 1997 ni yabaki 13

Dmitriy Zagulin

• Sucu: 1973 (Khabarovsk)

• Me baleti koya: Ni se gone, e vinakata me sotia. E vulica na karate kei na vakayagataki ni parasutu. Qo sa cakacaka tiko ena kabani ni gaunisala ni sitima. Tekivu vulica na iVolatabu ena 1991, qai papitaiso ena 1992. Rau vakamau kei Tatyana ena 2012

Ena ika17 ni Me 2018, era curuma vakaukaua e le 150 na sotia kei na ovisa eso na vale mai Birobidzhan, ra qai vakatoka qori me “Siga ni Lewa.” E beitaki kina o Brother Alam Aliyev ni daubasulawa, qai vesu me walu na siga nona wawa veilewai. E beitaki ni “tuvanaka tiko na cakacaka ni isoqosoqo e vakavuna na tikoyavavala.” E wili tale ga kina o Brother Valeriy Kriger, Brother Sergey Shulyarenko, kei Brother Dmitriy Zagulin. Ratou vakatabui na va na tacida tagane qori me ratou gole ena dua tale na vanua. Sa qai kuria qori ni ratou veilewaitaki tale ga o wati Alam, wati Valeriy, kei wati Dmitriy.

Ni bera ni vesu o Alam a vakekeli rawa ena ulutaga ni veivakacacani. E kaya tale ga vei ira ena ivavakoso na veika sa vulica tiko. E kaya: “Au uqeti ira na tacida mera kua ni rere ke ra tusaqati. E yaga sara ga qori, ni oti ga e dua na macawa e curumi vakaukaua e 21 na nodra vale na mataveitacini ena noqu ivavakoso.”

E vakatabui o Valeriy kei watina o Natalya me rau veilakoyaki, rau sega kina ni tiko rawa ena soqo ni iVakadinadina i Jiova e vakayacori mai Seoul, e Sauca Korea. E sega tale ga ni vakadonui me rau sikovi nona itubutubu e tiko mai Isireli. Ka ni rarawa ni takali o tamana ena Feperueri 2019. Oti e vica na vula e sele o tinana qai vinakati e dua me qaravi koya. E nuidei o Valeriy ni o Jiova e tokoni koya. Me vaka ni rau sega ni tiko ena dina na nona itubutubu, o ira sara ga na mataveitacini era sa lai qaravi tinana. E kaya: “Keirau masulaka vei Jiova na ka me baleti Na, e qai rogoca o koya na neirau masu. Era dau vakayaloqaqataki koya na mataveitacini. Era dau sikovi koya, veitalanoa, era sureti koya tale ga ena soqoni. Dina ni keirau sega ni rawa ni lako vua, ia keirau vakadinadinataka nona veitokoni o Jiova ni vakayagataki ira na mataveitacini.”

Na veivakacacani e sotava o Dmitriy e vakadeitaka tale vua e dua na ka sa kila rawa tu. E kaya: “Ni vinaka tu na bula qai sega ni vakacacani noda sokalou, ena rawarawa noda vakaweleweletaka noda ka vakayalo. Ia nira tarova na vakailesilesi na noda sokalou, eda na qai vakadinadinataka kina ni bibi meda vaqaqacotaka tiko noda veiwekani kei Jiova, da qai vakarautaki keda ena veitusaqati. E ka vakavuku gona meda vakayagataka na galala e soli tiko ena gauna qo meda “kumuna . . . na iyau mai lomalagi.” Qori ena vukei keda meda vosota me yacova na icavacava, qai dei tiko ga noda vakabauta.”—Maciu 6:20.

Eda vakadinadinataka ni o Jiova e solia vei ratou na tacida mai Rusia, na “kaukaua e uasivia na kaukaua ni tamata” me rawa ni ratou vosota.—2 Korinica 4:7.