21 FEPERUERI, 2022| IROGO VOU: JULAI 31, 2023
RUSIA

IROGO VOU—TOTOGITAKI VAKAILAVO | Qaqaco Nodratou Vakabauta ena Nodra Veivuke na Tacida

SARAVA/ROGOCA

Ena ika28 ni Julai 2023, e kaya na mataveilewai na Petrozavodsk City Court of the Republic of Karelia mai Rusia, ni ratou cala o Brother Maksim Amosov, Brother Mikhail Gordeev, Brother Nikolay Leshchenko, kei Brother Dmitriy Ravnushkin. Ratou totogitaki me ratou sauma e rauta ni $4,909 ina $5,455 na ilavo ni Merika.

Veitaravi ni Gauna

Julai 31, 2019

Vaqaqara na vakailesilesi ni FSB ena nodratou vale kei na nodra vanua ni cakacaka e le 16 na tacida
Okosita 2, 2019

Era vakatabui Maksim na dauveivaqaqai me biuti Rusia. Tekivu vaqaqai tale ga o Nikolay qai vakatabui me biuta na yasayasa e tiko kina
Okosita 6, 2019

Rau beitaki o Maksim kei Nikolay ni rau “basulawa” ni rau vulica na iVolatabu
Seviteba 5, 2019

Vesuki Mikhail na vakailesilesi ni FSB ena vanua ni nona cakacaka, ra qai kauta nona kompiuta. Oti e vaqaqai ena basulawa
Seviteba 20, 2019

Vaqaqara na vakailesilesi ni FSB ena nona vanua ni cakacaka o Dmitriy, ra qai kauta nona talevoni. Era vakatarogi koya me va na aua, e beitaki me daubasulawa qai vakatabui me biuta na yasayasa e tiko kina
Okotova 18, 2021

Tekivu na veilewai

Kedratou iTukutuku

Mikhail Gordeev

Sucu: 1959

Me baleti koya: E taleitaka na qalo kei na ivakatagi

Ni se gone, e dau lomatarotarotaka na veika me baleta na Kalou kei na inaki ni bula. E mate na imatai ni watina ni se ka lailai na luvedrau tagane. E veivosaki kei ira na iVakadinadina i Jiova ena gauna dredre qori, qai kila kina na yaca ni Kalou. Oti e vica na yabaki e sotavi ira tale qai vakadonuya me vulica na iVolatabu. Papitaiso ena 1996

Rau vakamau kei Yelizaveta ena 1999. E rua na luvedrau yalewa ratou se tiko vata ga

Ka e Tukuna

Cava o cakava mo vakarautaki ratou kina nomu vuvale ena veivakacacani?

Gauna e vakatabui kina eke na noda cakacaka,. . . au kila ni na vakatovolei na neimami vakabauta. Au vakadeitaka meu vaqaqacotaka na noqu vakabauta kei na nodratou vakabauta noqu lewenivuvale. Me rawa ni keitou yaloqaqa, keitou dau wilika vata na iVolatabu qai masu tale ga. Keitou wilika tale ga na nodra ivakaraitaki ni vosota na tacida.

Bau dua na gauna o vakila sara ga na veivuke i Jiova?

Oti e dua na vula nodra mai vaqaqara e vale na ovisa, era qai vesuki au e vanua ni cakacaka. Era kauti au meu lai vakatarogi, era tukuna tale ga na cala au beitaki kina. Era saga mera vakarerei au. Era kaya niu na kau e valeniveivesu keu sega ni vakaucacataki ira na tacida. E gauna dredre dina qori. Au masuti Jiova qai kerea vua me solia vei au na vuku kei na kaukaua. E vukei au meu vosota, meu kua tale ga ni liumuritaki ira na tacida.

Nikolay Leshchenko

Sucu: 1962 (Poltava, Ukraine)

Me baleti koya: Rau vakamau kei Svetlana ena 1984. Ena 1988, rau sotava e dua na veiwatini iVakadinadina Jiova, ena gauna se sotia tu kina o Nikolay e Poladi. Ena 1989, rau gole ena iVakananumi. Ena 1993, rau lesu i Rusia qai tekivu vulica na iVolatabu. Rau papitaiso tale ga ena icavacava ni yabaki ya

Ka e Tukuna

O vakila vakacava na veivuke i Jiova ni vakatabui mo biuti Rusia?

Ena icavacava ni 2019, au yalolailai sara ga. E gole o Svetlana i Warsaw e Poladi me lai tiko ena soqo ni veiwasewase. E lai sotavi ira eso na neirau itokani era tiko e Poladi. E tuvanaka o Svetlana me keitou veiqiriti ena internet. Dina au sa guilecava na veika ratou tukuna, ia au vakila niu vakayaloqaqataki vakalevu. . . Au kila ni vakayagataki ratou o Jiova me ratou vakayaloqaqataki au.

Era tusaqati na tacida e Rusia, ia eda marau nira dei tiko ga ena dina.—3 Joni 4.

a b Sega ni rawa ni vakatarogi.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU