FEPERUERI 10, 20232023 | IROGO VOU: JULAI 14, 2023
RUSIA

IROGO VOU—TOTOGITAKI | Veilewaitaki e Tolu na Tacida Tagane

SARAVA/ROGOCA

Ena ika12 ni Julai 2023, e kaya na mataveilewai na Savelovskiy District Court of Moscow ni ratou cala na tacida tagane. E totogitaki me vesu o Brother Roman Mareyev me va veimama na yabaki, o Brother Anatoliy Marunov me ono veimama na yabaki, ena vesu o Brother Sergey Tolokonnikov me lima na yabaki. Ni oti ga na veilewai, e kau sara o Anatoliy i valeniveivesu. Rau sa vesu rawa tu o Roman kei Sergey.

Kedratou iTukutuku

Roman Mareyev

Sucu: 1978 (Moscow)

Me baleti koya: E cakacaka ena tabana ni veilakoyaki e Moscow. Ni bera ni vesu, a qaravi rau tu nona itubutubu rau tautauvimate

E wilika na iVolatabu qai qoroya na kena donu vinaka na parofisai i Taniela. Papitaiso me iVakadinadina i Jiova ena 2002

Ka e Tukuna

Cava e vukei iko me donu tiko ga nomu rai ena gauna o vesu tu kina?

Au vesu ena vuku ni noqu vakabauta na Kalou, qori e uqeti au meu kila ni sala vinaka ga meu vakacaucautaki koya kina, ya ena noqu itovo. E vica vata na vula era vakaraica tiko na kaivesu na noqu itovo. Au dau kerea gona e veigauna na yalo tabu i Jiova me rawa niu vakaraitaka na nona itovo.

Au vulica ni sega ni dau yaco na ka eda dau lomaleqataka. Meda nuitaki Jiova ga, ena qai taqomaki keda ena “buca butobuto loaloa.” (Same 23:4) E bibi meu kabiti koya tiko ga ni na vaqaqacotaka na noqu inuinui, au vakila tale ga kina na marau kei na vakacegu.

Anatoliy Marunov

Sucu: 1953 (Izmail, Ukraine)

Me baleti koya: Ni bera ni cegu, a cakacaka tu ena kabani ni niusipepa (graphic designer)

Rau vakamau kei Alevtina ena 1975, qai rua na luvedrau tagane

A vulica i liu na iVolatabu o Alevtina, e papitaiso sara ena 1994. Me vaka ni cakacaka o Anatoliy ena kabani ni niusipepa, e qoroya kina na kena tabaki na noda ivola vakaivolatabu. E taleitaka na parofisai vakaivolatabu, qai papitaiso ena 1999

Ka e Tukuna

O vakarautaki iko vakacava ena veivakacacani?

Keirau kila vakaveiwatini ni dua na siga keirau na rawa ni tusaqati. Keirau na sega gona ni calata na dikevi ni tikinivolatabu e veisiga, na ulutaga kei na ka kece e vulici ena soqoni, wili kina na ka e dau kacivaki ena soqoni. Keirau saga tale ga me keirau rogoca vinaka qai muria na veidusimaki e soli mai.

Cava e uqeti iko mo vosota tiko ga?

Noqu vakasamataka na ka sa cakava vei au kei na noqu vuvale o Jiova, qori e uqeti au meu kua vakadua ni soro. Au vakavinavinakataka tale ga na veika e yalataka tu ena gauna se bera mai vei ira na talairawarawa vua. Eda sa volekata qo na icavacava. Niu vakasamataka na veika sa cakava ena vukuqu o Jiova, au kila ni sega ni ka vakavuku meu soro koso qo.

Sergey Tolokonnikov

Sucu: 1972 (Moscow)

Me baleti koya: E sikiuriti

Rau vakamau kei Mariya ena 2004. A tekivu vuli iVolatabu o Mariya ena 2003. E marautaka o Sergey ni saumi na nona taro ena iVolatabu, mani tekivu vulica na iVolatabu. Rau papitaiso ena 2005

Ka e Tukuna na Watina o Sister Mariya Pankova a

Drau dau veivosaki vakacava kei watimu?

Keirau dau veivolavolai. Ena vola mai na tikinivolatabu kei na italanoa vakaivolatabu, ena vakauta tale ga mai na kad kei na droini. Au dau marautaka vakalevu. Wale tiko ga qo, e vakatarai meu sikovi koya vakarua e veimacawa me 90 ga na miniti. Ena ono na aua noqu gole vua qai lesu i vale. Ena taura gona e dua taucoko na siga na noqu veisiko.

Cava o vulica ena ituvaki o sotava qo?

Keirau nuidei vakaveiwatini nira na sega ni rawa ni cakava e dua na ka o ira na dauveibeitaki, turaganilewa se dauveivaqaqai. Era na cakava ga na ka e vakatara vei ira o Jiova, ni o koya ga e lewa tu na ka kece.

E uqeti keda dina na nodratou ivakaraitaki o Roman, Anatoliy, kei Sergey. Se mani ituvaki cava eda sotava, eda nuidei nida na “sega ni rerevaka na ca” nida kila ni tiko vata kei keda o Jiova.—Same 23:4.

Veitaravi ni Gauna

Okotova 20, 2021

Era vaqaqara na vakailesilesi ena nodratou vale e walu na tacida e Moscow. Tekivu vaqaqai o Roman, Anatoliy, kei Sergey, ni ratou beitaki ni ratou tuvanaka tiko na cakacaka ni isoqosoqo e vakavuna na tikoyavavala. Ratou uqeti ira tale ga eso tale mera vakaitavi kina. Ratou mani vesu tu vakawawa
Okotova 22, 2021

Rau vesu me wawa veilewai o Roman kei Sergey. E vakatatabutaki e vale o Anatoliy
June 17, 2022

Tekivu na veilewai

a Ni vakarautaki tiko na ulutaga qo, e sega ni rawa ni tauri nona itukutuku o Brother Tolokonnikov ni se vesu vakawawa tiko ena gauna qo. E vakayagataka tiko ga o Sister Pankova na yaca ni nona vuvale ni oti nona vakamau.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU