ME 20, 2022 | IROGO VOU: OKOTOVA 17, 2023
RUSIA

IROGO VOU—TOTOGITAKI | Veitokoni ga i Jiova Era Vosota Rawa Kina

SARAVA/ROGOCA

Ena ika13 ni Okotova 2023, e kaya na mataveilewai na Sovietskiy District Court of the City of Oryol mai Rusia ni cala o Brother Vladimir Melnik, Brother Vladimir Piskarev, kei Brother Artur Putintsev. Ratou na vesu me ono na yabaki. Ratou se vesu mai ena Tiseba 2020, ratou na sega tale ga ni sere.

Veitaravi ni Gauna

Tiseba 8, 2020

Ratou vaqaqai na tolu na tacida qori
Tiseba 9, 2020

Vaqaqara na ovisa ena nodratou vale e walu na tacida e Oryol, wili kina nodratou vale na tolu na tacida tagane qo. Ratou qai vesu tu vakawawa
Tiseba 11, 2020

Kau o Brother Melnik kei Brother Piskarev ena dua na valeniveivesu me rau lai wawa veilewai
Tiseba 14, 2020

Kau o Brother Putintsev ena dua tale na valeniveivesu me lai wawa veilewai
Janueri 19, 2021

Tukuni vei ira na vakailesilesi ni vinakati me qaravi vakavuniwai o Brother Piskarev, ia e sega ni raici koya na vuniwai. E sega tale ga ni soli na mena wainimate
Janueri 21, 2021

Vakadonui o wati Brother Piskarev me solia na mena wainimate, ia e sega ga ni qaravi vakavuniwai
June 24, 2021

Laurai e valenibula o Brother Piskarev qai kilai ni tauvi koya na strouk. Dina ni tauvimate bibi, e kau tale me lai vesu
Okotova 29, 2021

Ratou beitaki ni ratou tuvanaka tiko na cakacaka ni isoqosoqo e vakavuna na tikoyavavala
Janueri 31, 2022

Ratou tekivu veilewaitaki

Kedratou iTukutuku

Vladimir Melnik

Sucu: 1965 (Donetsk, Ukraine)

Me baleti koya: Lewena tu na mataivalu. Oti e cakacaka vakaidinia

Rau vakamau kei Irina ena 1987. E tolu na luvedrau yalewa. A mate na luvedrau tagane ena 1991

E susu ena vuvale e sega ni vakabauta na Kalou. Oti nodrau vulica vakaveiwatini na veika me baleti Jisu, rau via vulica na iVolatabu. Papitaiso ena 1992

Ka e Tukuna o Watina o Irina a

Sala cava e vukei ira kina eso tale o Vladimir ena gauna e vesu tu kina?

E tuvanaka tiko ga o Vladimir neitou sokalou vakavuvale. E cakava qori ni dau [volavola mai]. E vakarautaka na veika me keitou vulica ni vakayagataka na serekali, italanoa, vosa vakatautauvata, qito kei na tikinivolatabu.

E vuli iVolatabu mada ga kei na dua na kaivesu . . . E biu na kaivesu qori ena dua tale na valeniveivesu. E kaya o Vladimir ni sa wasea tiko na tagane qori na ka e vulica vei ira na kaivesu mai kea.

Vladimir Piskarev

Sucu: 1956 (Karpinsk, Yasayasa o Sverdlovsk)

Me baleti koya: E idinia. Rau vakamau kei Tatyana ena 1976. E dua na luvedrau tagane, dua tale ga na luvedrau yalewa. Nodrau vulica vakaveiwatini na ka dina me baleti Jisu, qori e uqeti rau me rau vuli iVolatabu kei ira na iVakadinadina i Jiova. Papitaiso ena 1995

Ka e Tukuna o Watina o Tatyana b

Cava e vukei watimu me vosota na gauna e vesu kina?

E raica o Vladimir ni dua dina na ka ni veivakalougatataki, e veivakayaloqaqataki tale ga meda sotava e dua e via kila e levu na ka. E kaya: “E itavi dokai meda vakaitavi vakalevu ena cakacaka ni turaga, ke da tu mada ga e valeniveivesu!” E dau lagata tu ga o watiqu na noda sere se mani vanua cava e tu kina. E taleitaka vakalevu na sere e kena ulutaga, “Eda na Vosota.” Qori e vaqaqacotaka nona vakabauta, e vukei koya tale ga me yalodina vei Jiova. Eso na gauna, e dau vola mai vei au na qaqana: “Bibi meda vosota./Dei noda vabauta./Vu ni dei na loloma./Vosota ga yacova ni cava.”

Artur Putintsev

Sucu: 1970 (Chita, Yasayasa o Trans-Baikal)

Me baleti koya: E qase duadua vei ratou na le ono na veitacini. E daunilivaliva, e dauteitei, e draiva tale ga ni teksi. Rau vakamau kei Lyudmila ena 1993. Papitaiso ena 2005

Ka e Tukuna o Watina o Lyudmila c

Bau dua na gauna o vakila ni vukei iko o Jiova?

Gauna e vesu kina o watiqu e taura na dauveivaqaqai na neitou iyaya kece vakalivaliva, wili kina na neirau talevoni. Au vakila niu tu taudua qai sega ni rawa niu veitaratara kei ira eso tale. Dua na ka noqu lomaleqa, ia au masu vei Jiova qai kerea nona veivuke meu veitaratara kei ira na mataveitacini meu tukuna vei ira na ka e yaco. Ni biubiu ga na motoka e vodo kina o Artur, era yaco mai na mataveitacini. Era vakayaloqaqataki au qai solia e dua noqu talevoni. Era kauaitaki au tiko ga ena yabaki taucoko qo me yacova mai nikua. Au vakadeitaka ni dau rogo masu o Jiova, e kila vinaka tale ga na ivakarau ni lomaqu.

Dina ni ratou duitutu na vuvale qori, ia eda lomavakacegu nida kila ni sega ni dua na ka ena tawasei ratou mai na nona loloma kei na veitaqomaki i Jiova.—Roma 8:38, 39.

a b c Sega ni rawa ni tauri nodratou itukutuku o Brother Melnik, Brother Piskarev, kei Brother Putintsev Brother Sannikov ni ratou se vesu tiko vakawawa.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU