28 JANUERI, 2022
RUSIA

IROGO VOU | Totogitaki o Anna Safronova me Ono na Yabaki

iTotogi Balavu Duadua me Soli Vua Tekivu Mai na Vakatatabu ena 2017

SARAVA/ROGOCA

Ena ika14 ni Epereli 2022, e sega ni vakadonuya na mataveilewai na Astrakhan Regional Court mai Rusia, nona kerekere o Sister Anna Safronova. Ena vesu tiko ga.

Ena ika25 ni Janueri 2022, e kaya na mataveilewai na Trusovskiy District Court of the Astrakhan Region mai Rusia, ni cala o Sister Anna Safronova, e yabaki 56. E totogitaki me ono na yabaki e valeniveivesu. Ni tau oti ga na kena itotogi sa kau sara me lai vesu.

Veitaravi ni Gauna

28 Me, 2021

Tekivu veilewaitaki
2 June, 2021

Era vaqaqara na vakailesilesi ena vale rau tiko kina kei tinana, e yabaki 81. E qai kau o Anna me lai vesu
3 June, 2021

Sere mai qai vakatatabutaki i vale. E vakatarai ga me taubale i tuba me dua na aua ena veimataka mai na 9 ina 10 na kaloko.
10 June, 2021

Beitaki ni vakavuna na tikoyavavala, qai sogo nona akaude ni baqe
24 Janueri, 2022

E kaya ena iotioti ni nona ivakamacala ena mataveilewai: “E vakavulica o Jisu vei ira nona imuri ena Maciu 5:44 mera ‘lomani ira na kedra meca qai masulaki ira era vakacacani ira tiko.’ Na vuna? Ni levu era veivakacacani tiko era qai mai qaravi Jiova.

“Au nuitaka ni na veisau na nodra rai me baleti keimami na iVakadinadina i Jiova na vakailesilesi ni FSB, dauveivaqaqai, ira na yadra, loya, kei na so tale era tiko qo nira raica na noqu itovo vinaka . . . Me uqeta mada ga na lomana e dua me wilika na iVolatabu, vaqara na isau ni nona lomatarotaro, qai saga me kila na Kalou me qaravi koya tale ga.”
25 Janueri, 2022

Beitaki ni cala qai totogitaki me vesu me ono na yabaki

Kena iTukutuku

Anna Safronova

Sucu: 1965 (Volgograd, Yasayasa o Volgograd)

Me baleti koya: Ni se gone e taleitaka na ivakatagi, kei na lagasere. E idinia. E mate o watina ni se qai yabaki 11 na luvena tagane. Dau qaravi tinana itabaqase

E taleitaka me droinitaka na kad, kei na vola serekali vei ira nona itokani

E mai kila na dina vei tinana a vuli iVolatabu tiko kei ira na iVakadinadina i Jiova. E uqeti koya vakalevu na itukutuku ena iVolatabu, ni Kalou ena vakaduavatataki keda kece se mani vanua cava eda cavutu mai kina. Papitaiso sara ena 1996

Ka e Tukuna a

Cava e vukei iko ena gauna dredre qo?

E yaga vakalevu na nodra veitokoni na mataveitacini. . . . Era dau vakayaloqaqataki keirau kei Na, ra vakauta tale ga mai ena iyaya vakalivaliva na kad kei na vidio.

E uqeti au vakalevu e dua na kad a vakau mai, e volai tu kina: “Sega ni bibi o koya e duri tu e matamu. E bibi ga o koya e tokoni iko tiko mai i dakumu.”

[Au vakasamataka kina e dua na tikinivolatabu] e dau vakayaloqaqataki au . . . na Aisea 12:2, e kaya: “E noqu ivakabula na Kalou. Au na nuitaka, au na sega ni rere, ni o Ja Jiova e noqu kaukaua, e noqu qaqa.” . . . Se mani dredre vacava na ituvaki au na sotava, o Jiova ena vakaukauataki au meu vosota.

Cava o vulica ena ituvaki o sotava qo?

[Au saga] me donu tiko ga noqu rai . . . E sega ni vinaka meu vakasamataka vakasivia na ituvaki dredre qo. Ena vakavuna ga noqu lomaocaoca kei na rere vakalialia. E rawa tale ga niu yalolailai qai sega ni yalodina vei Jiova. O koya ena vukei keda ena gauna veiganiti. [Qori] e vaqaqacotaka noqu vakabauta, kei na noqu veiwekani kei Jiova.

E uqeti keda na nodra ivakaraitaki ni yalodina na tacida e Rusia kei Crimea, meda nuitaki Jiova ni na vakaukauataki keda meda vosota.—2 Cesalonaika 1:4.

a E vakatarogi ni bera nona vesu.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU