Ena ika15 ni Epereli 2022, e kaya na mataveilewai na Ussuriyskiy District Court of the Primorye Territory mai Rusia, ni cala o Vitaliy. Ena vakatatabutaki me rua na yabaki.

Vitaliy Ilinykh

• Sucu: 1974 (Ussuriysk, Primorye Territory)

• Me baleti koya: Vuli ovisa qai tauri ivola kina, e cakacaka sara ena tabana ni veivaqaqai. E dau via kila na vuna eda mate kina, kei na ka e yaco nida mate. vulica na iVolatabu kei ira na iVakadinadina i Jiova ena 1995, qai papitaiso ena 1999. Gauna qo, sa cakacaka tiko ena tabana ni sasamaki. Rau vakamau kei Irina ena 2006

Ena Feperueri 2019, era vaqaqai eso na mataveitacini ena siti o Spassk-Dalniy. E mani caka na vaqaqara ena nona vale o Brother Vitaliy Ilinykh, qai tekivu vaqaqai ena ika18 ni Seviteba, 2019. Era vaqaqara tale na ivakalesilesi ena nona vale ena ika23, ni Okotova 2019, e qai vesu me rua na siga. Ia e nuitaki Jiova tu ga ena gauna qori. E kaya: “Niu masu, e seavu noqu nuiqawaqawa, au qai vakila na lomavakacegu.”

Gauna e sere mai kina, e vakatabui me gole ena dua tale na vanua. E veilewaitaki tale ga o tinana o Sister Olga Opaleva ena dua tale na kisi.

E levu na ka e vulica o Vitaliy ena ituvaki qo. E kaya: “Au dau kila tu ga ni o Jiova ena sega ni vakatara meda sotava e dua na ituvaki eda sega ni vosota rawa. Ia qo au sa vakadinadinataka sara ga qori. Na levu ga ni ituvaki dredre eda sotava, eda na qai volekati Jiova ga vakalevu. O Jiova na Dautulituli, ke vakatara meu sotava e dua na ituvaki dredre, ena vakaukauataki au meu vosota. Ke yaco e dua na ka au sega ni vosota rawa, au na kerei koya me solia vei au na ‘kaukaua e uasivia na kaukaua ni tamata.’”—2 Korinica 4:7.

E dau mamadua o Vitaliy, ia e vakaukauataki koya na nona dau vakasamataka na ka e kaya na 1 Pita 5:9. E uqeti koya tale ga vakalevu na nodra ivakaraitaki na tacida e Rusia era vosota tiko na veitusaqati. E kaya: “Se mani cava e vakatara o Jiova me yaco ena noqu veilewai, au kila ni ka dokai vei au meu vakadinadinataki koya ena iotioti ni veisiga qo.”

Me vakataki Vitaliy, e uqeti keda na nodra yalodina na tacida kei na nodra yaloqaqa. Meda vakavinavinakataki Jiova tiko ga ni solia vei keda ‘na ka vinaka kece meda cakava na lomana.’—Iperiu 13:20, 21.