15 JUNE, 2022 | IROGO VOU: TISEBA 23, 2022
RUSIA

IROGO VOU—VAKADONUI ESO NA KEREKERE | Doudou o Galina Kobeleva me Vunau e Mataveilewai

SARAVA/ROGOCA

Ena ika21 ni Tiseba 2022, e vakadonuya na mataveilewai na Primorye Territory Court me kua ni sauma o Sister Galina Kobeleva na nona veilewai. E se rube tiko ga na nona kisi me ono na yabaki.

Ena ika20 ni Okotova 2022, e kaya na mataveilewai na Lesozavodskiy District Court of the Primorye Territory e Rusia ni cala o Sister Galina Kobeleva. Ena rube na nona kisi me ono na yabaki. Ena sega ni curu e valeniveivesu ena gauna qo.

Veitaravi ni Gauna

12 Me, 2020

Era vaqaqara na vakailesilesi ena nodratou vale e va na tacida ena yasayasa o Primorye, wili kina nona vale o Galina. Rau vakatarogi kei na luvena tagane o Brother Sergey Kobelev, rau vaqaqai tale ga
8 Maji, 2021

Tekivu vaqaqai o Galina vei ira na vakailesilesi. E beitaki ni vakaitavi tiko ena isoqosoqo e vakavuna na tikoyavavala
7 Epereli, 2021

E vakatabui me gole ina dua tale na vanua
29 Okotova, 2021

Tekivu veilewaitaki

Kena iTukutuku

Galina Kobeleva

Sucu: 1956 (Verkhniye Mully, Yasayasa o Perm)

Me baleti koya: E dauveivoli, e daunifika tale ga. E taleitaka na teitei

E mai kilai ira na tacida vei tinana. Nona raica nodra veilomani na mataveitacini ena ivavakoso, e vakadeitaka kina ni sa kunea na ka dina. Papitaiso ena 1998

Ka e Tukuna

Cava e uqeti iko mo doudou ni vunau?

E noqu yalava sara ga na vanua ni veilewai. Au kila ni rau vinakata o Jiova kei Jisu meu vakadinadinataki rau ena mataveilewai.

Era tokoni au tale ga na mataveitacini ena noqu veilewai. Dina niu tu taudua ena gauna ni veilewai, ia au vakila na kaukaua mai vei ira era masulaki au tiko.

Na tikinivolatabu cava e vukei iko mo vosota?

Dua noqu tikinivolatabu taleitaki na Aisea 48:17, 18, e tukuni ena ikarua ni cegu: “O yau o Jiova na nomu Kalou, o koya e vakavulici iko mo vinaka kina, o koya e tuberi iko ena sala mo lakova.” . . . Au dau vakasamataka vakatitobu na yaga ni noqu muria na sala i Jiova, kei na marau au vakila kina. E totoka na noda inuinui ena veigauna se bera mai, nida sa na bula uasivi ena vuravura parataisi. Ia ena gauna mada ga qo, meda raica kece na sala e tokoni keda tiko kina na noda itokani o Jiova ena veika dredre eda sotava, da qai volekati koya tale ga na Tamada vakalomalagi. . . . Keu sega ni muria na nona sala, de dua au na rawa ni vosota. Ia au na sega ga ni vakila na vakacegu, ena sega tale ga ni tokoni au.

Eda vakavinavinakataki Jiova ni taqomaki ira tiko nona dauveiqaravi yalodina vakai Galina ena dua na “vanua taqomaki,” nira doudou ni tutaka na yacana.—2 Samuela 22:18-21.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU