JANUERI 31, 2022 | IROGO VOU: MAJI 27, 2023
RUSIA

IROGO VOU—VAKALAILAITAKI NA ITOTOGI | Vakararavi Tiko ga Vei Jiova o Sister Lyudmila Salikova

SARAVA/ROGOCA

Ena ika23 ni Maji 2023, e rogoci ena ikarua ni gauna na kisi nei Sister Lyudmila Salikova. E tauca na lewa na mataveilewai na Chelyabinsk Regional Court mai Rusia, me vakatatabutaki ga me rua veimama na yabaki. Ena sega ni biu e valeniveivesu ena gauna qo.

Ena ika17 ni Maji 2022, e sega ni vakadonuya na mataveilewai qori nona kerekere o Lyudmila.

Ena ika20 ni Janueri 2022, e kaya na mataveilewai na Snezhinsk City Court of the Chelyabinsk Region mai Rusia, ni cala o Lyudmila. Ena vakatatabutaki me ono na yabaki.

Veitaravi ni Gauna

Noveba, 2020

Era vaqaqara na ovisa e nodratou vale e va na tacida e Snezhinsk, wili kina nodratou vale o Lyudmila. Era vaqaqara tale ga ena vanua ni nona cakacaka. E qai vakaukauataki me solia na nona ivola ni cegu ena cakacaka
Okosita 26, 2021

Beitaki ni daubasulawa ni tuvanaka tiko na soqoni ni lotu e vakavuna na tikoyavavala. E veisoliyaka tale ga na ivola ni lotu e vakatabui
Tiseba 8, 2021

Tekivu veilewaitaki

Kena iTukutuku

Lyudmila Salikova

Sucu: 1951 (Sysert)

Me baleti koya: Vakamau ena 1971, e tolu na luvedrau tagane. Sa takali o watina ena 2009. E idinia ena siti o Snezhinsk, e taleitaka tale ga na gade

A vulica na iVolatabu o tuakana ena 1999. Oti e ono na vula e vulica tale ga na iVolatabu o Lyudmila. E vakacegui koya na ka e tukuna na iVolatabu me baleta na inaki ni bula, vuna e levu kina na veika tawadodonu, ivalavala kaukaua kei na ivalu. Papitaiso sara ena 2002

Ka e Tukuna

E vaqaqacotaka vakacava nomu veiwekani kei Jiova na ituvaki dredre o sotava qo?

Ni bera niu vesu, au dau beci au qai nanuma ni sega ni lomani au o Jiova . . . Ia gauna qo sa veisau na noqu rai, au kila ni mareqeti au vakalevu o Jiova. E lomani au, e nuitaki au tale ga meu vakadinadinataki koya e mataveilewai. Au okata na ituvaki dredre kece au sotava me gauna vinaka au vakaraitaka kina vei Jiova ni rawa ni nuitaki au.

Bau dua na tacida e vakayaloqaqataki iko mo vosota?

Dua na ka noqu lomaleqa ni bera niu gole ena veilewai. . . Au masu vei Jiova qai kaya: “. . . Kerekere Tamaqu, au kerea nomuni yalo tabu!” Oti ga vakalailai, e text mai e dua na tacida yalewa. E kaya: “. . . Na vakatovolei ni noda vakabauta e vaka na misini ni savasava. Ena cowiritaka, savata qai lobaka na isulu me rawa ni savasava. E tautauvata qori kei na ituvaki dredre o sotava, de dua o lomaleqa ni caka na vaqaqara e vale, o vakatarogi tale ga vei ira na ovisa. Ia me vaka ga na kena savata na isulu na misini, o sa qai talei ga ena mata i Jiova kei keimami kece na mataveitacini . . . Ni o gole nimataka ena veilewai, keimami nuidei ni na tokoni iko na liga kaukaua i Jiova.” Au vakadeitaka sara ga i keri ni kila vinaka tu o Jiova na kequ ituvaki, qai vakayagataka na tacida yalewa ya me vakaraitaka kina ni lomani au vakalevu.

Era vakararavi tiko ga vei Jiova na tacida e Rusia me vakayaloqaqataki ira. E yalataka vei keda na noda Kalou dauloloma ni na “vakaraitaka na lewadodonu vei ira na sega ni vakatamani kei ira na bibivoro, me kua tale ni vakarerei ira tiko na tamata e vuravura.”—Same 10:18.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU