Svetlana Monis

• Sucu: 1977 (Lesozavodsk)

• Kena italanoa: E leqa tiko na matana, sa qai ca ga vakalevu. Taleitaka me vulica na duidui vosa. E vulica na vosa vakaJaina, vakaValagi kei vakaJamani. Levu na gauna e susugi luvena tagane duadua. Dua tiko nona valenikana me tokoni ratou kina nona vuvale

  E vulica na iVolatabu ni kauai vakalevu ena veika tawadodonu e yaco tu e vuravura. Papitaiso ena 2005. Ena 2015, rau vakamau kei Alam Aliyev, e beitaki tale ga ena dua na basulawa

Ena ika26 ni Seviteba 2019, a vaqaqa na kisi nei sister Svetlana Monis na iliuliu ni veivaqaqai o D. Yankin ena Federal Security Service (FSB). E vakatabui koya na mataveilewai me kua ni draivataka nona motoka me voleka ni rua na vula. Dina ga ni via vakayagataka nona motoka me vukei nona bubu e yabaki 91.

Ena Tiseba 2019, e vakacavari kina na imatai ni nona vaqaqai. Oti era qai kauta cake na vakailesilesi nona kisi ina Birobidzhan District Court.

Ni vakasamataka nona vakacacani, e kaya: “Au lomavakacegu tu ga ena gauna ena vaqaqara kina na ovisa. Gauna qori e matata sara ga vei au na tikinivolatabu qo: ‘Era marau o ira era vakacacani ena vuku ni ka e dodonu.’”—Maciu 5:10.

Oti na vaqaqara e vesu tu vakawawa o Alam me walu na siga. E kaya o Svetlana: “Dua na ka noqu lomaleqataki koya ena gauna qori. Ni tauvi koya tiko na mate sa qai mosi tiko ga vakalevu. Sa laurai oti vakavuniwai . . . ni vo e dua na macawa mera gole mai na ovisa. Au sega gona ni kila na kena ituvaki ni sega ni rawa ni keirau veivosaki. Au masu vei Jiova qai talaucaka vua na ka au leqataka, au kila ni na taqomaki watiqu tale ga.”

E nuidei o Svetlana ni na tokoni koya o Jiova. E kaya: “Au raica qai vakadinadinataka nona veitokoni. Au kila ni sega ni dodonu meu taqaya. . . . Au sega ni via kauaitaki au ga, au vakasamataka ga na sala meu yalodina tiko kina vei Jiova.”

Rau dau saga vakaveiwatini me rau vaqaqacotaka nodrau vakabauta me rawa ni donu tiko ga nodrau rai. E kaya o Svetlana: “Veisiga keirau na wilika qai veivosakitaka vata na tikinivolatabu e veimataka, kei na dua na wase ni iVolatabu. Keirau dau raica vakabibi na tikinivolatabu e uqeti keirau me keirau lomavakacegu qai nuitaki Jiova.” Na tikinivolatabu ni 2019 na Aisea 41:10, e kaya: “Kua ni taqaya niu nomu Kalou.” Qori e vakadeitaka vei rau nona loloma o Jiova. E kaya o Svetlana: “Keirau mani tabaka qai vakawaqataka.”

Nona vosota o Svetlana e veisautaka sara ga nodra rai na wekana era sega ni tiko ena dina me baleta na ka e vakabauta. E kaya: “Dau tusaqati au tu e liu o tinaqu, ia qo au sa vunau rawa vua. E doka neirau vakabauta, e lomani au vakalevu ena ka au sotava, e tu vakarau tale ga me tokoni au. Noqu bu tale ga e nanumi keirau vakalevu ena dredre keirau sotava tiko qo, e lomani keirau tale ga. Sa taleitaka tale ga me kila e levu na ka me baleta na iVolatabu.”

Meda nanumi rau mada ga o Svetlana kei Alam. Eda kila ni rau na yalodina tiko ga, ni “vakataudeitaka” o Jiova na ‘lomadrau.’—Same 10:17.