OKOSITA 26, 2022 | IROGO VOU: MAJI 8, 2023
RUSIA

IROGO VOU—VEISAU NA ITOTOGI | Ratou Nuidei Qai Lomavakacegu

SARAVA/ROGOCA

Ena imatai ni Maji 2023, e tauca na mataveilewai na Stavropol Territory Court e Rusia na lewa me baleti ratou o Brother Anatoliy Gezik, o watina o Irina kei Brother Viktor Zimovskiy. Sa veisau na kedrau itotogi me rau sa kua ni curu e valeniveivesu o Anatoliy kei Viktor, ia me rau sa vakatatabutaki ga. Ena sega ni vinakati tale ga me cakacakataka e tuba o Anatoliy na kena itotogi. E sereki o Viktor. E rube tu ga na kisi ni veilewai nei Irina, ena sega ni curu e valeniveivesu ena gauna qo.

Ena ika14 ni Noveba 2022, e kaya na mataveilewai na Georgievskiy City Court of the Stavropol Territory mai Rusia, ni cala o Anatoliy, na watina o Irina, kei Viktor. E totogitaki o Anatoliy me va na yabaki, qai rua na vula nona cakacaka i tuba. E vakatatabutaki o Irina me va na yabaki rua na vula. O Viktor e vesu me ono na yabaki rua na vula, ni tau oti ga na lewa sa kau me lai vesu.

Veitaravi ni Gauna

Okotova 23, 2019

Era vaqaqara na vakailesilesi ena nodratou vale e tolu na vuvale iVakadinadina i Jiova e Georgievsk. Gauna vata qori era biuta lo kina eso na misini me rawa ni ratou beitaki kina. Ratou vesu qai vakatarogi ena dua na bogi taucoko o Anatoliy, Irina, Viktor, kei na walu tale na tacida
Tiseba 30, 2019

Tekivu vaqaqai o Anatoliy, Irina, kei Viktor
Janueri 23, 2020

Kau o Viktor me vakatarogi tale, qai lai vesu tu vakawawa. Ena siga e tarava e kau me lai wawa veilewai
Maji 23, 2020

Sere mai o Viktor qai vakatatabutaki i vale
Me 6, 2020

Oti nona vakatatabutaki o Viktor, ia e vakatabui me gole ena dua tale na vanua
Okotova 6, 2021

Vakadonui me gole ena dua tale na vanua
Maji 10, 2022

Tekivu na veilewai

Kedratou iTukutuku

Anatoliy Gezik

Sucu: 1967 (Nezlobnaya, Yasayasa o Stavropol)

Me baleti koya: Ni cakacaka tiko ena nodra valeniveivesu na itabagone, e via kila na ka ena yacovi ira na itabagone ena gauna mai muri, kei na inaki ni bula. E saumi na nona lomatarotaro ni vulica na iVolatabu kei ira na iVakadinadina i Jiova. Rau vakamau kei Irina ena 1997. Papitaiso ena 1998

Ka e Tukuna

Cava e vakaukauataki iko ena gauna dredre qo?

Noqu dau vakasamataka na vuravura vou e se bera mai, au kila kina ni vakainaki noqu bula, e sega tale ga ni matewale na noqu sasaga. Eda na sotava kece na ituvaki dredre ena gauna se bera mai, ena duidui tale ga na ka eda sotava. Me rawa nida vosota e dodonu meda nanuma tiko na ka kece rau sa cakava vei keda o Jiova, kei na Luvena. Na dredre kece au sotava e vaka ga e taura tiko o Jiova na ligaqu, qai tokoni au.

Viktor Zimovskiy

Sucu: 1969 (Georgievsk)

Me baleti koya: Ni yabaki 13, rau sa takali na nona itubutubu

O tavalena e vakamacalataki ira na iVakadinadina i Jiova vua, mani vulica sara na iVolatabu. E vakacegui koya vakalevu na inuinui ni veivakaturi. Papitaiso ena 2003

Rau vakamau kei Nadezhda ena 2006, qai tolu na luvedrau. Gauna e vesu kina o Viktor, e buketetaka tiko o Nadezhda na ikatolu ni luvedrau

Ka e Tukuna

E tokoni iko vakacava o Jiova ni o vakatatabutaki i vale?

Niu vakatatabutaki e sega ni vakatarai meu vakayagataka na talevoni, internet, se biuta na vale. . . . E sega ni rawa gona niu vakarautaka na ka me keitou bula kina vakavuvale. E vula ciwa tiko watiqu, e sega ni rawa mada ga niu lai voli kakana, se nona iyaya na luvei keirau e vakarau sucu. Keirau rarawa vakalevu, ia era vukei keirau na neirau vuvale kei ira na tacida. O Jiova e vakayagataki ira na mataveitacini mera vakarautaka na ka keitou gadreva me vaka na kakana, kei na isulu. Era vakayaloqaqataki keitou tale ga.

Ni ratou vosota tiko na tacida ena marau qai dei nodratou inuinui, eda nuidei ni o Jiova ena ‘volekati ira tiko ga na kacivi koya.’—Same 145:18.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU