ME 18, 2022 | IROGO VOU: TISEBA 21, 2022
RUSIA

IROGO VOU—VESU ESO NA TACIDA | Ratou Vosota Rawa ena Vuku ni iNuinui

SARAVA/ROGOCA

E kaya na mataveilewai na Blagoveshchensk City Court of the Amur Region mai Rusia, ni cala o Brother Sergey Afanasiyev, Brother Sergey Kardakov, a Brother Anton Olshevskiy, Brother Adam Svarichevskiy, kei Brother Sergey Yermilov. E vesu me ono na yabaki, lima na vula o Brother Afanasiyev. O Brother Kardakov e vesu me ono na yabaki, va na vula. Ratou vesu me ono na yabaki, tolu na vula o Brother Olshevskiy, Brother Svarichevskiy, kei Brother Yermilov. Ni tau oti ga na lewa ratou sa lai vesu.

Veitaravi ni Gauna

Julai 20, 2018

Vaqaqara na ovisa ena nodratou vale o Brother Afanasiyev, Brother Olshevskiy, kei Brother Svarichevskiy
Okotova 21, 2019

Beitaki vei ira na ovisa ni rau daubasulawa o Brother Yermilov kei Brother Olshevskiy, ena nodrau vakaitavi tiko ena cakacaka ni lotu e “vakaleqai ira na lewenivanua”
Seviteba 10, 2020

Beitaki ni daubasulawa o Brother Svarichevskiy ni tomani rau o Brother Olshevskiy kei Brother Yermilov ena nodratou vakaitavi ena isoqosoqo e vakavuna na tikoyavavala
Seviteba 18, 2020

Beitaki ni daubasulawa o Brother Afanasiyev
Seviteba 24, 2020

Caka na vaqaqara ena vale nei Brother Kardakov. Beitaki ni daubasulawa, e vakaleqa tale ga nodra tiko vakacegu na lewenivanua ni wilika na iVolatabu qai masu vei Jiova
Maji 12, 2021

Beitaki ni cala o Brother Olshevskiy ena nona tuvanaka tiko na soqoni kei na cakacaka vakavunau
Okotova 21, 2021

Ratou tekivu veilewai

Kedratou iTukutuku

Adam Svarichevskiy

Sucu: 1963 (Ivano-Frankivsk, Ukraine)

Me baleti koya: Ni se gone, e vulica me vakatagitaka na accordion. Rau vakacacani na nona itubutubu ena veiliutaki makawa ni Soviet ni rau iVakadinadina i Jiova

Papitaiso ena 1982. Vesu me tolu na yabaki ni sega ni via curu ena mataivalu

Rau vakamau kei Galina ena 1986. Rua na luvedrau tagane

Ka e Tukuna

Ni o se itabagone, cava e uqeti iko mo kua ni curu ena mataivalu dina ni o kila o na rawa ni vesu?

E vakayaloqaqataki au noqu nanuma lesu nona ivakaraitaki ni vakabauta o tamaqu kei na nona yaloqaqa, wili kina o ira na vo ni tacida era yalodina tu ga ena veigauna sa oti. Au kila ni cala meda ‘vulica na ivalu,’ au saga sara ga meu muria na ivakavuvuli qori. (Aisea 2:4) Dua na ka noqu rere, ia au rere vakalevu keu vakararawataki Jiova.

Cava nomu rai ke o mani vesu tale?

E kena ibalebale ga ni o Jiova e nuitaki au vakalevu, e ka dokai tale ga meu vakaitavi ena kena vakadodonutaki na ile me baleta na veiliutaki cecere ni Kalou.

Cava e uqeti iko mo kua ni soro?

Au kila ena lekaleka wale na ituvaki dredre qo. Au nuidei tale ga ni sa na vakarau yaco na yalayala totoka. Ya na nona veisautaka o Jiova na vuravura qo me parataisi.

Ratou ivakaraitaki vinaka na tacida qori ni ratou dei tiko ga ena nodratou ka vakayalo. Ratou sega ni vakasamataka vakalevu na veivakacacani ratou sotava, ratou raica dei tu ga na icovi ni bula tawamudu e vakarautaka o Jiova vei ira na nuitaki koya.—2 Korinica 4:17, 18.

a b Sega ni rawa ni tauri nona itukutuku kei na nona itaba o Brother Anton Olshevskiy, kei na nona itukutuku o Brother Sergey Kardakov.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU