JUNE 7, 2022 IROGO VOU: EPERELI 3, 2023
RUSIA

IROGO VOU—VESU | Nodratou Nuitaki Jiova e Rawa Kina ni Ratou Vosota

SARAVA/ROGOCA

Ena ika31 ni Maji 2023, e kaya na mataveilewai na Babushkinskiy District Court of Moscow mai Rusia, ni ratou cala o Brother Ivan Chaykovskiy, Brother Yuriy Chernyshev, Brother Vitaliy Komarov, Brother Sergey Shatalov, kei Brother Vardan Zakaryan. Ratou vesu me ono na yabaki tolu na vula o Ivan, Yuriy, Vitaliy, kei Sergey. O Vardan e vesu me va na yabaki tolu na vula. Ni tau oti ga na lewa, ratou sa kau me ratou lai vesu.

Veitaravi ni Gauna

Noveba 24, 2020

Era vaqaqara na vakailesilesi ena rauta ni 20 na nodra vale na tacida e Moscow. Ratou mani kau o Ivan, Yuriy, Vitaliy, kei Sergey me ratou lai vesu vakawawa ena dua na sela. Era tu tale ga na dauveitaba ena gauna ni vaqaqara kei na nodratou vakatarogi o Yuriy kei na nona vuvale. E qai saravi na kena vidio ena tivi e Moscow.
Noveba 26, 2020

Sere mai valeniveivesu o Sergey qai vakatatabutaki e vale. E laurai i valenibula o Vardan ni a mavoa ena gauna e caka kina na vaqaqara, e vesu vakawawa qai biu duadua tu ena dua na rumu
Noveba 27, 2020

Sere mai valeniveivesu o Ivan, Yuriy, kei Vitaliy, qai vakatatabutaki e vale
Noveba 30, 2020

Vakaraitaka o Vardan ina tabana ni dauveibeitaki ni caka vua na itovo kaukaua, era mani sereki koya na vakailesilesi qai vakatatabutaki e vale
Feperueri 16, 2022

Tekivu na veilewai

Kedratou iTukutuku

Vitaliy Komarov

Sucu: 1976 (Moscow)

Me baleti koya: A dairekita tu ena dua na siteseni ni retio kei na tivi e Moscow. E taleitaka na susu oni

Rau vakamau kei Yelena ena 1999. E vakadeitaka ni dina na iVolatabu ni raica na kena donu na vakayacori ni parofisai. Papitaiso ena 2003

Ka e Tukuna

Cava o vulica ena ituvaki dredre o sotava qo?

Ni bera niu vesu, au sarava tale na vidio Young People Ask—What Will I Do With My Life? E uqeti au vakalevu nona ivakaraitaki na tacida itabaqase ena ka e cakava ena gauna e vesu kina. E sega ni vinakati me taukena e levu na ka ni sa tiko na nona veleti kei na sepuni me kana kina. E tautauvata sara ga qori kei na ka au sotava ena ikarua ni siga au vesu kina. Dua taucoko na siga noqu tu e vanua ni veilewai, au qai kau ena noqu sela ena ciwa na kaloko ena bogi. Au sa calata tale ga na gauna ni vakayakavi. E qai solia vei au o koya keirau vesu vata e dua na bilo meu kerea kina vei ira na ovisa na waikatakata meu rawa ni gunu ti. Totolo ga noqu vakasamataka mai na vidio ya. Na gauna qori, e bibi cake na bilo ti mai na motoka se talevoni na ka au dau vakabibitaka tu e liu.

Sergey Shatalov

Sucu: 1969 (Stavropol, Yasayasa o Stavropol)

Me baleti koya: Ni se gone, e dau taleitaka na qito chess, table tennis, kei na volleyball. A mavoa qai vakaleqai na ituvaki ni yagona ena gauna a lewena tu kina na mataivalu i wai. E dau kauta na ivola se iyaya (courier)

Rau vakamau kei Yelena ena 1995, rau papitaiso tale ga ena yabaki qori

Ka e Tukuna

O vakadeitaka vakacava ni na vukei iko o Jiova mo vosota na ituvaki dredre qo?

Au vakadeitaka ni Kalou o Jiova e rogoca na nodra masulaki au na mataveitacini e vuravura raraba. E sega wale ga ni yavutaki qori ena kila ka vakaivolatabu, ia e yavutaki tale ga ena marau kei na vakacegu au vakila tiko.

Cava e dua na ka o masulaka, e qai yaga vakacava vei iko?

Au dau masu wasoma vua na Kalou, au kerei koya tale ga meu yaloqaqa vaka na laione. Au na sega kina ni rerevaka e dua se na veika ca au na sotava. Au dau masulaki ira tale ga na tacida era vesu tu, nodra vuvale, kei ira na sotava na veika dredre se ituvaki rarawataki me vaka au sotava tiko.

E veivakayaloqaqataki dina nodratou volekati Jiova tiko ga na tacida qori. O Jiova tale ga e sega ni biuti ratou kei na nodratou vuvale.—Jemesa 4:8.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU