SEVITEBA 1, 2021 | IROGO VOU: OKOTOVA 25, 2023
RUSIA

IROGO VOU—VESU O BROTHER ALEKSEY KHABAROV|Vakayaloqaqataki Koya na Masu kei na Wili iVolatabu

SARAVA/ROGOCA

Ena ika20 ni Okotova 2023, e kaya na mataveilewai na Porkhovskiy District Court of the Pskov Region mai Rusia, ni cala Brother Aleksey Khabarov. Ena vesu tale ga me rua veimama na yabaki. E tau na lewa qori ni oti nona kerea me rogoci tale nona kisi. Qo sa ikatolu ni gauna me veilewaitaki kina o Brother Khabarov. Ni tau oti ga na kena itotogi sa kau sara me lai vesu.

Ena ika27 ni June 2022, e kaya na mataveilewai na Porkhovskiy District Court of the Pskov Region mai Rusia, ni sega ni cala o Brother Aleksey Khabarov. E qai talaca kece na nona kisi.

Veitaravi ni Gauna

Ena ika26 ni Noveba 2021, e vakadonuya na Pskov Regional Court mai Rusia, na nona kerekere o Aleksy. E vakarota na mataveilewai me rogoca e dua tale na turaganilewa na nona kisi. Ena sega ni biu e valeniveivesu ena gauna qo
Seviteba 7, 2021

E kaya na mataveilewai na Porkhovskiy District Court mai Rusia, ni cala o Aleksey qai vakatatabutaki me tolu na yabaki.
Okotova 29, 2020

Tekivu veilewai
Okosita 28, 2020

Beitaki ni daubasulawa ni “vakaitavi tiko ena soqoni ni lotu.” Era veivosakitaka tiko kina na ‘nodra vakabauta, wili iVolatabu, lagasere ni lotu, kei na so tale na ulutaga vakaivolatabu’
Feperueri 7, 2020

Vakatarogi tale o Aleksey. Ra qai tukuna vua na ovisa ni tekivu ena 2018 era vakarogoca qai katona nona qiri ena talevoni
Janueri 31, 2020

Beitaki ni daubasulawa qai vakatatabutaki
Me 24, 2019

Volavola o Aleksey ina valenivolavola e qarava na nodra dodonu na lewenivanua e Pskov. E kaya kina ni sega ni daubasulawa, ia e dau dina qai qarava na Kalou. Ratou duavata kei koya na vakailesilesi ena valenivolavola qori, ratou qai kaya ni sega ni dodonu me tarovi nona vakaitavi ena nona sokalou
Epereli 3, 2019

Vaqaqara na ovisa ena vale nei Aleksey, kau eso na ka e taukena, e vakatarogi tale ga

Kena iTukutuku

Aleksey Khabarov

Sucu: 1975 (Burtsevskaya, Yasayasa o Arkhangelsk)

Me baleti koya: E taleitaka na taubale e veiulunivanua kei na nona itokani. E dau vakavinakataka na vale. E via kila na inaki ni bula ena gauna se sotia tu kina. Qori e uqeti koya me vulica na iVolatabu kei ira na iVakadinadina i Jiova. Papitaiso sara ena 2000

Ka e Tukuna

Cava e vakayaloqaqataki iko mo vosota?

Ni caka na vaqaqara e vale au vakasamataka nona ivakaraitaki o Harold King nona vesu tu e Jaina me va na yabaki. Au sa vesu tale ga qo. Au bolea meu vakacacani ena vuku i Jiova, au sega tale ga ni vinakata meu tawayalodina vua. Au dau vakasamataka tiko ga na vosa qo: ‘Sa kena gauna qo mo tusaqati kina. Cava o na cakava?’ Qori e dau vakayaloqaqataki au.

Cava o masulaka vei Jiova ena gauna qori?

Au kerea vua me kua ni laurai levu na noqu lomaleqa, ia meu dei qai lomavakacegu. Au vinakata mera raica na dauveitusaqati niu yaloqaqa, mera kila tale ga niu sega ni tu taudua. E sauma sara ga noqu masu o Jiova! Gauna me rogoci kina noqu kisi, eso na gauna au dau veiwali meu kua kina ni lomaleqa vakalevu. E dau taleitaka qori o turaganilewa.

Tikinivolatabu cava e vukei iko mo vosota tiko ga ena marau?

E vukei au na Same 27:14. Au kila kina na ka meu cakava ena gauna au tusaqati kina. E cavuti vakarua ena tikinivolatabu qori na vosa “nuitaki Jiova.” Au dau vakasamataka tu ga qori ena gauna au rairai kina ena mataveilewai. E vakayaloqaqataki au sara ga.

Eda duavata kei Aleksey ni o Jiova e dau vukei ira na yalodina vua mera ‘yaloqaqa qai dei na lomadra.’—Same 27:14

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU