Ena ika23 ni Seviteba 2021, e kaya na mataveilewai na Volgograd Traktorozavodsky District Court mai Rusia, ni ratou cala o Brother Yegozaryan, Brother Melnik kei Brother Rogozin. Rau na vesu me ono na yabaki o Yegozaryan kei Melnik. O Rogozin ena vesu me ono na yabaki, lima na vula.

Sergey Melnik

• Sucu: 1972 (Volgograd, Yasayasa o Volgograd)

• Me baleti koya: Vuli cakacaka me dau ripea motoka. Ia qo sa dau tara dokanivale. Rau vakamau kei Anna ena 1993, e tolu na luvedrau tagane. Ratou taleitaka vakavuvale na taubale ena ulunivanua, ratou dau sarava tale ga na veikabuli

  A vulica i liu o Anna na iVolatabu kei ira na iVakadinadina i Jiova. Ni raica o Sergey na kena yaga vua, e mani vulica tale ga na iVolatabu. E papitaiso sara ena 1999

Valeriy Rogozin

• Sucu: 1962 (Krasnokamsk, Yasayasa o Perm)

• Me baleti koya: E tinikarua na yabaki nona pailate tu ni mataivalu. E cegu mai nona cakacaka qai dua na idinia. Vakamautaki Marina ena 1984, qai rua na luvedrau tagane

  Tekivu vulica na iVolatabu ena veiyabaki ni 1990, papitaiso sara ena 1998

Igor Yegozaryan

• Sucu: 1965 (Volgograd, Yasayasa o Volgograd)

• Me baleti koya: E dauculaivava, e vakaivola tale ga ena ka ni livaliva. Taleitaka na ivakatagi ena gauna se gone kina, e dau qiri qita tale ga. Vakamautaki Yevgeniya ena 2002, qai dua na luvedrau tagane

  O tinana a vakamacalataka e liu vua na itukutuku vinaka ni Matanitu ni Kalou. E qoroya na kena dina, kei na rawarawa ni ka e vulica ena iVolatabu. E papitaiso ena 1992

Ena ika16 ni Me 2019, era curuma vakaukaua na ovisa kei ira na Federal Security Service (FSB) e vitu na vale ena yasayasa o Volgograd mai Rusia. Oti e rua na siga e vakataulewataka na mataveilewai me ratou vesu tu vakawawa o Brother Melnik, Brother Rogozin, kei Brother Yegozaryan. Ratou mani vesu tu me vitu na vula.

Dina ni ratou sa lesu i vale, ia e sega ni rawarawa ni ratou waraka tiko na kedratou itotogi. Kena ivakaraitaki, era dikeva tiko na vakailesilesi ni Federal Financial Monitoring Service of the Russian Federation nona vakarau ni vakayagataki ilavo o Valeriy. E kaya o Valeriy: “Sa sega ni vakatarai meu vakayagataka noqu ilavo e maroroi tu ena baqe. E vakatabui tale ga meu vakayagataka noqu talevoni kei na internet, au sega ni kunea rawa kina e dua na cakacaka.” Rau vakayagataka tiko vakaveiwatini na nodrau peniseni me voli kina na ka rau vinakata. E vinakati kina me rau bula rawarawa ga.

Rau vakatatabutaki tale ga o Sergey kei Igor, e dredre kina me rau kunea e dua na cakacaka. E kaya o Sergey ni vakadredretaka nona cakacaka nona dau kacivi tiko vakalevu ena mataveilewai. E kaya: “Au dau tara dokanivale, ia au mani digia ga eso na cakacaka lalai ena gauna au sega ni kacivi kina ena gauna ni veilewai.”

E dua na mate e tauvi Igor tiko, e vinakati kina me laurai vakalevu e valenibula. E kaya: “E dredre meu kunea na cakacaka ena vuku ni ka au beitaki kina.” Me vaka ni tautauvimate, e leqa tale ga vakailavo, e kaya: “O Jiova e vakarautaki ira na mataveitacini mera volekati keitou tu ga ena gauna dredre qo.”

Ratou sotava sara tu ga na tacida qo kei na nodratou vuvale na dredre vakailavo ena vuku ni nodratou vakatatabu. Eda nuidei nira na yalodina tu ga na mataveitacini kece e Rusia ena gauna era tusaqati kina. Ni o Jiova ena vakarautaka na ka kece era gadreva.—Maciu 6:33.