MAJI 24, 2022
RUSIA

IROGO VOU | Vakilai na Veitokoni i Jiova ena Nodratou Vuvale

SARAVA/ROGOCA

Ena ika19 ni Seviteba 2022, e kaya na mataveilewai na Gukovo City Court of Rostov Region mai Rusia, ni ratou cala o Brother Aleksey Dyadkin, Brother Aleksey Goreliy, Brother Nikita Moiseyev, Brother Vladimir Popov, Brother Yevgeniy Razumov, kei Brother Oleg Shidlovskiy. Rau na vesu o Brother Goreliy, kei Brother Shidlovskiy me ono veimama na yabaki. Ratou na vesu me vitu na yabaki o Brother Dyadkin, Brother Moiseyev, Brother Popov, kei Brother Razumov. Ni tau oti ga kedratou itotogi, ratou sa vesu sara.

Veitaravi ni Gauna

Okosita 8, 2020

Era vaqaqara na ovisa ni FSB ena 17 nodra vale na tacida ena tolu na siti ena yasayasa o Rostov, kei na siti o Kursk. Ena siga tarava, ratou kau qai vesu vakawawa o Brother Goreliy, Brother Moiseyev, Brother Razumov, kei Brother Shidlovskiy. E okati o Brother Popov me dua vei ira e vakavuna na tikoyavavala
Okosita 12, 2020

Era kauti Brother Popov na ovisa, qai vesu ni oti e rua na siga
Okosita 21, 2020

Oti nona vakatarogi o Brother Dyadkin vei ira na vakailesilesi e kau sara me vesu
June 28, 2021

Sikovi ratou na tacida e dua na loya ena vanua ratou vesu tu kina. Ratou tukuna vua na ituvaki ni sela ratou tiko kina, okati kina na kena batabata sivia qai duka na lalaga. Eso tale ga na kaivesu era tauvi COVID-19
Julai 21, 2021

E tauvi ceguoca o Brother Popov, e mani lai qaravi vakavuniwai ena dua tale na valeniveivesu. Oti e kau sara e valenibula
Seviteba 30, 2021

Oti e sivia ni rua na vula nona tiko e valenibula o Brother Popov, e kau lesu tale e valeniveivesu
Noveba 17, 2021

Ratou veilewaitaki kece, ratou se vesu tale tu ga ena gauna qori

Kedratou iTukutuku

Aleksey Goreliy

Sucu: 1980 (Ryazan, Yasayasa o Ryazan)

Me baleti koya: Ni se gone, e taleitaka me vulica na caka peleni ni vale, itukutuku makawa, e cakava tale ga na ivakatakarakara ni waqa. E daunifika ena dua na kabani ni caka sovu

Vulica na ka dina vei tinana kei buna. Papitaiso sara ena 1995. Rau vakamau kei Inna ena 2011. E dua na luvedrau tagane

Ka e Tukuna na Watina o Inna b

Bau dua na tikinivolatabu e vakaukauataki iko?

Au lai vakasamataka na ka e tukuna na yapositolo o Paula: “Niu malumalumu, au sa qai kaukaua.” (2 Korinica 12:10) . . . Dua na ka noqu veilecayaki nira mai vaqaqara na ovisa ena neirau vale, oti ra qai vesuki Aleksey. Au sega ni namaka ni na yaco qori, au rere tale ga vakalevu. Ia na tikinivolatabu qori e vakadeitaka vei au ni o Jiova ena vukei au meu vosota, meu rawa ni vakalagilagi koya kina.

Nikita Moiseyev

Sucu: 1990 (Dinskaya, Yasayasa o Krasnodar)

Me baleti koya: E daunilivaliva, qai dau vakavinakataka na iyaya ni vale. Papitaiso ena 2004

Ena 2011, e sotavi Sofiya ni vakaitavi tiko ena cakacaka ni veiqaravi raraba ena nodra valenibula na gone. Rau vakamau sara ena 2013

Ka e Tukuna na Watina o Sofiya c

E vukei iko vakacava nomu veiwekani kei Jiova mo vosota nona vesu o watimu?

Gauna ga au raici ira kina na vakailesilesi ena neirau katuba, au vakila na “vakacegu ni Kalou e uasivia na vakasama kece” e tukuni ena Filipai 4:7. Io, se qai vakadua meu vakila na lomavakacegu. Au kila ni keirau cakava tiko na ka e dodonu . . . e taqomaki keirau tale ga o Jiova. Qori e uqeti vakalevu. Au sega ni kila na ka keirau na sotava vakaveiwatini . . . Au kila ni na levu na veika dredre au rawa ni sotava. Ia au vakila tu ga na lomavakacegu, qai tokoni au tu ga o Jiova.

Oleg Shidlovskiy

Sucu: 1969 (Gornyatskiy, Yasayasa o Rostov)

Me baleti koya: Ni se itabagone e taleitaka na qito, vakabibi na basketball. E qasenivuli sara ni ka ni qito

E vulica na iVolatabu ni se vuli tiko ena univesiti. Papitaiso sara ena 1991

Rau vakamau kei Natalya ena 1998. E rua na luvedrau yalewa

Ka e Tukuna na Watina o Natalya f

Cava e vukei iko me donu tiko ga nomu rai ena gauna e vesu kina o watimu?

Au dau vakayagataka e levu na gauna meu vuli vakataki au meu kua kina ni rarawa vakalevu. E sega ni rawa nida veimaliwai vakalevu ena vuku ni matedewa. Koya gona, au dau vakaogai au ena cakacaka e vale meu kua kina ni lomabibi.

E tokoni au tale ga na Tamaqu [vakalomalagi] o Jiova, kei ira na mataveitacini. Qori e vukei au meu vosota. E totolo ga nodra yaco mai na mataveitacini mera vukei au.

Meda gumatua tiko ga ni masuti Jiova me vukei ratou na tacida qori, kei na nodratou vuvale. Eda nuidei ni o Jiova ena vaqaqacotaka nodratou vakabauta, qai vukei ratou me ratou vosota.—Roma 15:30.

a b c d e f Ratou tu e valeniveivesu na ono tacida tagane qori me ratou wawa veilewai, e sega ni rawa kina ni ratou vakatarogi.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU