E sega ni vakadonui nona kerekere o Brother Dennis Christensen me rogoci tale nona veilewai ena ka e beitaki kina. Ia ena ika6 ni June, 2019, era tokitaki koya na vakailesilesi e Rusia ena vanua e wawa veilewai kina e Oryol ena valeniveivesu na Penal Colony No. 3 ena siti o Lgov. Na veiyawaki ni vanua qori kei na vanua ratou tiko kina na vuvale i Dennis, kei ira nona itokani e rauta toka na 200 na kilomita.

Ni yaco yani e valeniveivesu, e vakacacani ra qai saga me tawayalodina. Ia e nuitaki Jiova vakatabakidua, e vakaraitaka tale ga na doudou kei na yaloqaqa.—1 Pita 5:10.

Tekivu na gauna e vesu kina o Dennis era kauaitaki watina tu ga o Irina, na mataveitacini ra tokoni koya tale ga. Ena June, e sikovi Irina e Finiladi o Brother Mark Sanderson, e lewe ni iLawalawa Dauvakatulewa, kei na so tale na tacida tagane nuitaki mera lai vakayaloqaqataki koya.

Sa oti qo e dua na vula nona vesu tiko o Dennis. Se qai vakadonui wale ga qo me rau veivosaki ena dua na siga ena talevoni kei Irina. Vakadonui tale ga me sikovi koya e valeniveivesu.

Tekivu ena siga e vesu kina o Dennis kei na nona curu e valeniveivesu, dua na ka nodrau vosota toka vakaveiwatini, rau marau, rau tudei tale ga. E kaya o Irina ni veivakayaloqaqataki dina nona dau volavola o Dennis vua e veimacawa. Qo eso na malanivosa e dau taleitaka ena dua nona ivola: “E yaga vakalevu ke donu tiko ga nodaru rai, e levu tale ga na vuna me daru marau kina.” E tinia: “E vu ni nodaru bula tiko ena gauna qo nodaru tokona na veiliutaki cecere i Jiova. Au kila ni dua na cici balavu qo, ia se bera ni daru qaqa kina. Daru na qaqa dina ga, qori na ka au vakadeitaka.”

Ena ika21 ni Julai, ena soqo ni veimatanitu e Denmark, e wilika vakatikina o Brother Lett, e lewe ni iLawalawa Dauvakatulewa na ivola i Dennis. E kaya: “Diva wale ga meu maliwai kemuni tiko, ia se bera ni oti na noqu itavi e ke. Ena oti ena dua na gauna se bera mai, qori na ka au rai vakanamata tu kina.”

Gauna e vesu tu kina e Roma o Paula, e vola: “Dua na ka noqu dau vakavinavinaka vua na noqu Kalou ena gauna kece au nanumi kemuni kina. Ena gauna kece au masulaki kemuni kina au dau marau tale ga, . . .  e va kina qo na noqu nanumi kemuni, nida vakaivotavota vata ena loloma soli wale ni Kalou ena noqu vesu tu qo, kei na kena taqomaki na itukutuku vinaka qai tauyavutaki vakalawa.”—Filipai 1:3, 4, 7.