OKOSITA 5, 2021
RUSIA

IROGO VOU | iMatai ni Nona Vesu o Brother Dmitriy Terebilov ena Vuku ni Nona Vakabauta

SARAVA/ROGOCA

Ena ika22 ni Seviteba 2022, e sega ni vakadonuya na mataveilewai na Second General Jurisdiction Court of Cassation mai Rusia, na nona ikarua ni kerekere o Brother Dmitriy Terebilov. Ena vesu tiko ga e valeniveivesu.

Ena ika12 ni Janueri 2022, e sega ni vakadonuya na mataveilewai na Kostroma Regional Court mai Rusia, nona kerekere o Brother Dmitriy Terebilov.

Veitaravi ni Gauna

Seviteba 6, 2021

Vakataulewataka na Sverdlovskiy District Court ena siti o Kostroma mai Rusia, me vesu me tolu na yabaki. Ni tau oti ga na kena itotogi, sa kau sara me lai vesu
Seviteba 8, 2020

Tekivu veilewaitaki
Me 25, 2020

Beitaki ni daubasulawa, vakatabui tale ga me gole ina dua tale na vanua
Seviteba 19, 2019

Sogo nona akaude ni baqe
June 13, 2019

Beitaki ni daubasulawa ni veisoliyaka tiko na ivola vakaivolatabu e vakatabui, e vakaitavi tale ga ena lotu e vakatabui na kena isoqosoqo
Julai 25, 2018

Era vaqaqara na vakailesilesi e nodrau vale na veiwatini ni rau gole tu ena soqo ni veiwasewase e Moldova. Gauna ga rau yaco yani kina i nodrau vale, era vesuki rau, oti rau kau sara me rau lai vakatarogi

Kena iTukutuku

Dmitriy Terebilov

Sucu: 1980 (Kostroma)

Me baleti koya: Ni se gone, sa takali o tinana. Taleitaka na veimulomulo (wrestling), kei na veivacu ena gauna se gone kina. Vesu vakava ena vuku ni wainimategaga

Gauna e vesu tu kina ena 2010, sa vulica tiko na iVolatabu ena veivolavolai. Sere mai valeniveivesu ena 2013, papitaiso sara ena 2014. Rau vakamau kei Irina ena 2015, rau dau taleitaka na taubale kei na vodo basikeli

Ka e Tukuna

O sotavi ira vakacava na iVakadinadina i Jiova?

Au mai kilai ira ena ikava ni gauna au vesu kina ena vuku ni wainimategaga e vakatabui vakalawa. Ena Okosita 2010, au taura na imatai ni vola mai vua e dua na tacida tagane e Udmurtia. Dua na ka nona tokoni au, e volavola mai, e vakauta tale ga mai na ivola vakaivolatabu ena gauna kece au vesu tu kina. Tekivu mai na gauna ya, keirau sa veitokani dredre sara me yacova mai qo.

Oti au sere ena ika21 ni June 2013. Au toki sara mai Kostroma, au sotavi ira tale eke na iVakadinadina i Jiova.

Cava e vukei iko mo marau tiko ga qai kua ni lomaocaoca?

Keirau a tiko vakaveiwatini ena soqo ena 2018 e kena ulutaga, “Mo Yaloqaqa!” Oti na soqo keirau saga me keirau muria na veika keirau rogoca . . . Au nanuma sara neirau taubale lesu tu i vale [ni oti mai neirau vakatarogi ena ikarua ni gauna e caka kina na vaqaqara i neirau vale]. Ni keirau yaco yani, keirau raici ira e levu na tacida nira gole yani i vale nira rogoca ni caka na vaqaqara i vale. Keirau vakadinadinataka kina ni o Jiova ena sega vakadua ni biuti keirau.

Cava nomu rai ni o vesu tale qo ena vuku ni nomu vakabauta?

Nona tokoni au tiko o Jiova ena gauna kece qo, kei na nona tokoni ira tiko na tacida era tu e valeniveivesu ena vuku ni nodra vakabauta, au nuidei kina ni o Jiova ena tokoni au tu ga kei na noqu vuvale. Niu sere mai valeniveivesu ena vuku ni wainimategaga au sa vakadeitaka tu: ‘Au vinakata meu dua na iVakadinadina i Jiova.’ Ena sega ni rawa ni dua na ka ena veisautaka qori.

E vosota tiko o Dmitriy na nona “vakasewasewani ena yaca i Karisito.” Ia eda nuidei ni na “tiko vata” kei koya “na yalo sa lagilagi, io, na yalo ni Kalou.”—1 Pita 4:14.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU