FEPERUERI 13, 2024
RUSIA

Kauaitaka ga Vakabibi na Dokai ni Yaca i Jiova

SARAVA/ROGOCA

Ena vakarau tauca na mataveilewai na Vyselkovskiy District Court of the Krasnodar Territory e Rusia, na lewa me baleti Brother Yevgeniy, Brother Bochko, Vladimir Kolesnikov, Brother Aleksey Shubnikov, Brother Vitaliy Ushakov, kei Brother Valeriy Vechkayev. E se bera ni tukuna na dauveibeitaki na kedratou i totogi.

Kedratou iTukutuku

Yevgeniy Bochko

Sucu: 1975 (Novoberezansky, Krasnodar Territory)

Me baleti koya: E cakacaka vakaidinia

E kerea vua na Kalou me vukei koya me kila na lotu dina. Papitaiso me iVakadinadina i Jiova ena 1998

Rau vakamau kei Anna ena 2009

E tauvi koya na mateniua

Ka e Tukuna

Cava e bibi duadua vei iko ena gauna o veilewai kina?

Gauna kece qori keirau masulaka vakaveiwatini me keirau vakalagilagia tiko ga na yaca i Jiova. Keirau marau ni keirau cakava rawa qori. Ni dikeva tiko na dauveivaqaqai na veika vakaivola me baleta na noqu veilewai, e levu na ka e taroga vei keirau me baleti keda na iVakadinadina i Jiova. E 17 kece na ilavelave ni ivola qori, e rauta ni 100 ina 350 na tabana. Ia voleka ni tabana kece qori e laurai kina na yaca i Jiova. Io, e ka dokai dina nida vakaitavi ena kena vakatakilai na yacana.

Vladimir Kolesnikov

Sucu: 1946 (Ukraine)

Me baleti koya: A lewena tu na mataivalu, oti e lai cakacaka ena kabani ni keli koala

Rau vakamau kei Zinaida ena 1979. E rua na luvedrau yalewa qai dua na luvedrau tagane. Takali o Zinaida ena 2020

Rau vulica vakaveiwatini na iVolatabu kei ira na iVakadinadina i Jiova, rau qai papitaiso ena 1995

Ka e Tukuna

Cava e vukei iko mo marau qai donu tiko ga nomu rai ni o sotava na ituvaki dredre?

E sega ni rawarawa meu vosota na ituvaki au sotava. Eso na gauna au dau yalolailai, ia au saga meu lewa vinaka na ivakarau ni lomaqu. Au dau masu qai saga meu vulica vinaka na ivola vakaivolatabu. Dua na ka noqu vakavinavinakataka vakalevu na nona vakarautaka mai o Jiova na nona Vosa na iVolatabu, e bibi tale ga meu dau talaucaka vua na lomaqu. Niu vakasamataka lesu, au liaca niu saga meu walia ga vakataki au na ituvaki au sotava. Ia qo au vakila na lomavakacegu kei na nuidei niu talaucaka vei Jiova na lomaqu, na ka au leqataka, kei na ka au marautaka.

Aleksey Shubnikov

Sucu: 1982 (Nizhnevartovsk, Yasayasa o Tyumen)

Me baleti koya: Ni yabaki 16, sa vakayagataka ga na idabedabe qiqi ni mavoa na nona suitu. E qoroya ni yavutaki dina ena iVolatabu na ivakamacala me baleta na rarawa.

Papitaiso ena 2008

Ka e Tukuna

Cava o vulica ena nomu beitaki ni o daubasulawa?

Niu wilika eso na kedra italanoa na tacida era kaya nira vakila na vakacegu ena gauna era sotava kina na dredre. Au veinanuyaka, ‘E rawa vakacava ya?’ Ia kila na cava, au vakila tale ga na vakacegu ena gauna e caka kina na vaqaqara e noqu vale, niu vakatarogi, kau ina mataveilewai kei na noqu soli ivakadinadina. Au vakadinadinataka ni vukei au o Jiova, au marau tiko ga niu sotava na ituvaki dredre. Au vakavinavinakataka vakalevu nona tokoni au o Jiova, au kalougata tale ga niu qaravi koya.

Valeriy Vechkayev

Sucu: 1973 (Vyselki, Krasnodar Territory)

Me baleti koya: E dau ukutaka na lomanivale. E qoroya na ivakatagedegede savasava e tukuni ena iVolatabu, kei na sala era bulataka kina qori na iVakadinadina i Jiova. Papitaiso ena 1999

Rau vakamau kei Irina ena 1996. E rua na luvedrau tagane, dua na yalewa

Ka e Tukuna

E vukei iko vakacava o Jiova mo vosota na ituvaki dredre qo?

E levu na sala e vukei au kina o Jiova. Era masulaki au na mataveitacini, era dau vakayaloqaqataki au, era vukei au tale ga vakayago. Na kena vakayacori na parofisai vakaivolatabu, e vakadeitaka kina vei au o Jiova ni sa voleka na vuravura vou. Au raica kina na veika dredre au sotava tiko qo me vaka ga na o. E duidui na kedra ibulibuli kei na kedra levu, ia ena tiko na gauna era na yali vakadua. Au vakavinavinakataki Jiova ni solia tiko vei au ena gauna qo na kaukaua meu vosota.

Eda nuidei ni o Jiova ena vakayaloqaqataki ratou na tacida qo me rawa ni ratou marau, qai vosota tiko ga. Ena cakava tale ga qori o Jiova vei ira na nuitaki koya.—⁠Same 141:⁠8.

Veitaravi ni Gauna

Feperueri 11, 2022

Tekivu vaqaqai o Yevgeniy, Aleksey, Vitaliy, kei Valeriy
Feperueri 13, 2022

Caka na vaqaqara e nodratou vale o Yevgeniy, Aleksey, kei Vitaliy. Ratou vakatarogi tale ga. Vesu vakawawa o Vitaliy
Feperueri 15, 2022

Wawa veilewai e valeniveivesu o Vitaliy
Feperueri 16, 2022

Vakatabui o Yevgeniy kei Aleksey me rau gole ina dua tale na vanua
Feperueri 18, 2022

Vakatabui o Valeriy me gole ina dua tale na vanua
Feperueri 21, 2022

Beitaki ni daubasulawa o Vladimir
Maji 15, 2022

Vakatabui o Vladimir me gole ina dua tale na vanua. Lai okati ena dua tale na kisi
Seviteba 8, 2022

Sere o Vitaliy qai vakatatabutaki e vale
Okotova 10, 2022

Laveti nona vakatatabutaki o Vitaliy qai vakatabui me gole ina dua tale na vanua
Me 31, 2023

Tekivu na veilewai

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU