Ena ika22 ni Feperueri 2022, e tauca na Mataveilewai ni Dodonu ni Lewenivanua e Urope na European Court of Human Rights (ECHR) e rua na lewa e tokoni ira kina e 15 na tacida. E yavutaki na kisi qori ena nodra vakalolomataki ira na tacida na ovisa nira curuma vakaukaua na nodra vale ena 2010 me yacova na 2012. E kaya na mataveilewai ni beca o Rusia na nodra dodonu ni sokalou na tacida qai vakarota me sauma e rauta ni $112,323 na ilavo ni Merika. Qori na iotioti ni lewa e tau, ena sega tale ga ni rawa ni veisautaki.

Na rua na lewa e tauca qo na Mataveilewai e okati kina e ono na kisi ni veilewai e Rusia. a Era kaya noda loya, ni cala vakalawa na nodra vaqaqara ena nodra vale na tacida kei na nodrau vesu e rua na tacida yalewa ena gauna rau vunau tiko kina. Rau vakaluvawaletaki na tacida yalewa qori, ra qai kauta na veika rau taukena. Ena so na gauna, era curuma vakaukaua na ovisa na nodra vale na tacida nira vakamatavulo qai vakaiyaragi tu. Era qai vakasaurarataki ira na tacida.

Era dau kerea tale ga na noda loya na nona veivuke na loya e dau valataka na nodra dodonu na lewenivanua o André Carbonneau. E kaya o Mr. Carbonneau ni rua na lewa e tau qo e “kilai kina ni cala vakalawa na ka e cakava o Rusia ena kena curumi vakaukaua na nodra vale na iVakadinadina i Jiova, okati kina na kena curumi e 1,700 na vale me tekivu na nodra vakatabui na iVakadinadina i Jiova ena 2017. Ena gauna qo, e sa na cala vakalawa ke caka na vaqaqara ena dua na vale ni iVakadinadina i Jiova qai beci kina na veidinadinati ni European Convention. E bibi tale ga meda kila ni sega sara ga ni tokona na Mataveilewai na ka e cakava o Rusia ni vakatabui ira na iVakadinadina i Jiova mera vunau e veivale. E vakadinadinataki kina ni okata na ECHR na cakacaka vakavunau me dua na itavi ni sokalou, qai sega ni dodonu mera vakatabuya na veiliutaki.”

Dina ga ni sega ni okati ena rua na lewa e tau qo na nodra tusaqati na Vakadinadina i Jiova e Rusia, ia ena rawa ni lai tau kina eso tale na lewa me baleta na kena vakatabui tiko na noda cakacaka e Rusia. Ena dodonu me na vakataulewataka na ECHR e sivia na 60 na kisi me baleti ira na tacida e Rusia. Eda nuitaka ni na tau vakadodonu na lewa, me vaka ga na rua na vakataulewa qo.

Eda marau nira raica na nodra yalodina na tacida e Rusia na vakailesilesi era dau tokona na dodonu ni lewenivanua. E laurai ena rua na lewa e tau qo ni vakalougatataka tiko o Jiova na veika era cakava na tacida mera lagita na yacana qai tokona na dodonu ni nona veiliutaki.—Same 26:11.