6 NOVEBA, 2020
RUSIA
Kudruvaka na Vakailesilesi e Veiyasa i Vuravura Nodra Tusaqati na iVakadinadina i Jiova e Rusia
“E torosobu sara ga na kena sega ni muri na lawa.”—Gayle Manchin na jeameni ni United States Commission on International Religious Freedom (USCIRF)
Era se kudruvaka tiko na vakailesilesi e Urope kei Merika nodra vakalolomataki na iVakadinadina i Jiova e Rusia.
iLawalawa e Valataka na Dodonu ni Sokalou e Vuravura e Tiko Mai Merika (USCIRF)
E kaya o Gayle Manchin ena itukutuku e vakaraitaki ena ika27 ni Okotova 2020, “ni kurabuitaki vakalevu na ka e cakava tiko na matanitu o Rusia vei Dennis Christensen. E sega na nona cala, ia e cati koya na matanitu. E vesu ni vakaitavi tiko ena nona sokalou. E sega ni lomani koya na matanitu, ia e okati koya me dua na daubasulawa rerevaki. E torosobu sara ga na kena sega ni muri na lawa.”
E vakaraitaka o Gayle na veika me baleti Brother Christensen ena dua na porokaramu era vukei kina na vesu ena vuku ni nodra vakabauta na Religious Prisoners of Conscience Project e qarava na USCIRF. Sa vicavata na gauna nona kudruvaka tiko na USCIRF na nona totogitaki o Brother Christensen me ono na yabaki e valeniveivesu.
Ratou vakaraitaka tale ga na USCIRF nodratou rarawataka ni sega ni sereki totolo o Brother Christensen. E kaya ni “vakatulewataki me sereki ena ika23 ni June [2020,] ia e tarova qori e dua na loya ni matanitu. E sega ni sereki o Christensen e mani totogitaki me vesu ena dua na rumu e sega na kena katubaleka. E beitaki ni sega ni muria na lawa ni valeniveivesu.”
Ratou kauta cake tale ga mai na USCIRF na nodratou ripote ni yabaki 2020. E volai ena ripote na nodratou sega ni duavata kei na matanitu o Rusia “ni tusaqati ira tiko ga vakaukaua eso, qai sega ni doka nodra galala ni sokalou. E vakatututaka tale ga ina matanitu o Merika me okati Rusia me “matanitu e sega ni dauveinanumi.”
Matabose kei Vuravura me Baleta na Dodonu Yadua ni Lewenivanua
Ratou vola tale ga e dua na ivola e walu na vakailesilesi ni United Nations Human Rights Council (UNHRC). Ratou vola kina ina matabose na Permanent Mission of the Russian Federation to the United Nations Office, nodratou rarawataka “na nona tusaqati ira tiko na iVakadinadina i Jiova na matanitu o Rusia. E wili tale ga kina na kena vesu nodra valenivolavola e St. Petersburg, kei na 395 na isoqosoqo vakalawa ni iVakadinadina i Jiova ena vanua kece o Rusia.” Ratou vakaraitaka tale ga na vakailesilesi na nodratou rarawataka nona sega ni via rogoca o Rusia nodra kerekere na isoqosoqo e veiyasa i vuravura me tinia na nona veivakalolomataki.
Ratou kaya na vakailesilesi ni nakita na matanitu o Rusia me bulia na lawa e vakavu tiko yavavala me “tarova kina nodra sokalou na iVakadinadina i Jiova, me vakarerei ira, qai sega ni doka na nodra galala ni vakayagataki ira na ovisa mera curuma vakaukaua na nodra vale ra qai vakalolomataki. Eso era vaqaqai, e tukuni nira cala ra qai bala e valeniveivesu.”
Ratou tukuna talega na vakailesilesi “ni taqomaki tu ena Article 18 ni ICCPR na nodra dodonu na iVakadinadina i Jiova mera vakaitavi ena nodra sokalou.” * Ratou kerea gona ina matanitu o Rusia “me kua ni vakaleqa na nodra galala ni rai, lewaeloma kei na nodra vakabauta na lewenivanua na lawa e bulia ena 2002 me tarova na tiko yavavala.”
Ratou vakaraitaka tale ga ena ivola qori na nodra vakalolomataki eso na tacida. Kena ivakaraitaki, nodratou mokulaki e lima na tacida e Saratov ena ika6 ni Feperueri, 2020. E tukuni kina: “E vakaloloma na vanua ra dau vesu kina na iVakadinadina i Jiova, era vakasaurarataki qai vakatotogani. E caka qori ena vuku ni nodra vakabauta vakalotu.”
Ratou vola tale ga na nona vakalolomataki o Brother Vadim Kutsenko vei ira na vakailesilesi e Rusia ena ika10 ni Feperueri, 2020. E cakitaka na matanitu o Rusia ni sega ni vakararawataki Brother Kutsenko. Ia ratou sega ni vakabauta qori na vakailesilesi, ratou “kauai ga vakalevu ena nodra vakararawataki na iVakadinadina i Jiova ena veivanua e Rusia. Ni okati me basulawa na nodra vakaitavi ena nodra sokalou.”
Na Matabose ni Nodra Komiti na Minisita e Urope
Ena 2017, era vakatabui qai tusaqati na iVakadinadina i Jiova e Rusia. Qori e uqeta na matabose na Council of Europe’s Committee of Ministers * me raica ni muria tiko o Rusia e rua na lewa e tauca na Mataveilewai e Valataka na Dodonu ni Lewenivanua e Urope. E kaya na mataveilewai qori ni beca o Rusia na nodra dodonu na iVakadinadina i Jiova. * E vakarautaka gona na matabose e dua na ripote ena imatai ni Okotova 2020. E vakaraitaka kina ni “kauai vakalevu ena vakatatabu a caka ena 2017 qai rogoca e levu na irogo vakadomobula. E tukuni kina ni tekivu na vakatatabu era vesu qai tusaqati na iVakadinadina i Jiova ena vuku ga ni nodra vakaitavi ena nodra sokalou.”
Me rawa ni tarovi na veivakalolomataki va qori, e vakatura kina na matabose ina matanitu o Rusia me vakavinakataka na “lawa e tarova na tiko yavavala. Na lawa qori e vakavuna na vakatabui ni nodra cakacaka na iVakadinadina i Jiova kei na nodra beitaki nira basulawa.” Kuria ya, “me bokoca na nodra vakatatabutaki na iVakadinadina i Jiova. Me talaca tale ga na nodra kisi ni veilewai era beitaki kina nira basulawa nira vakaitavi ena nodra sokalou.” Ena 2021, ena dikeva tale na matabose ke sa muria tiko na matanitu o Rusia na ka e vakatututaka.
Tekivu ena 2017, era beitaki e sivia e 400 na tacida e Rusia kei Crimea nira vakavuna na tiko yavavala. Era bala tale ga e valeniveivesu e sivia e 210 na mataveitacini ena 70 vakacaca na siti e Rusia.
‘Meda kaciva na yaca i Jiova na noda Kalou’ me vukei ira na tacida me rawa nira vosota tiko ga.—Same 20:2, 7.
^ para. 16 Na CKomiti ni Minisita ena raica me muria na vakataulewa ni Mataveilewai e Valataka na Dodonu ni Lewenivanua.
Rawa ni o Wilika Tale ga
ITUKUTUKU VOU
Vesu ena Vuku ni Nodra Vakabauta—Rusia
Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.