E tiko e Rusia e dua na tabana vakamatanitu na Federal Service for Financial Monitoring. E dau dikeva na basulawa ena ka vakailavo, me vaka na kena vakailavotaki na cakacaka e vakavuna na tiko yavavala. E tu vei ratou na lisi ni yaca era kasamitaki nira batikadi. E rawa ni biu kina na yacadra o ira e se bera ni tukuna na mataveilewai nira cala.

Me tekivu mai na 2017, ena gauna e vakatabuya kina na Mataveilewai Cecere na noda cakacaka na iVakadinadina i Jiova, sa biu ena lisi ni yaca e 525 na tacida.  aEra okati kina e sivia ni 100 na tacida itabaqase.

Era sotava na tacida qori e levu na dredre vakailavo. Kena ivakaraitaki, e vakatabui mera vakayagataka na nodra ilavo ena baqe. Ena veivula, ena vakadonui me vakayagataka e dua na lewenivuvale e rauta ni 137 na ilavo ni Merika. Ni levu na ka e vakatabui vei ira, e vakadredretaka na nodra bula ena veisiga. Kena ivakaraitaki, e dredre mera volia se volitaka na vale, qele, motoka se inisua. E sega tale ga ni rawa nira ciqoma na veivuke vakailavo vei ira na sega ni cakacaka, se me soli vei ira na nodra ivotavota ilavo, se mera dinau ena baqe. Levu na ituvaki dredre era sotava na tacida era tara tiko na ilavo ni peniseni se na ilavo ni malumalumu. Era sega ni rawa ni sauma na nodra qaravi vakavuniwai. Ena so na gauna e vakatabui mera vakayagataka na sala ni veilakoyaki, me vaka na basi.

O Brother Anton Chermnykh mai Ussuriysk, a biu na yacana ina lisi ena Tiseba 2019. E kaya: “Meu rawa ni vakayagataka na kequ isau, e dodonu meu vakaraitaka eso na ivakadinadina niu sega ni rawata mai vakailawaki na ilavo qori. Au dau kauta ena baqe e levu na ka vakaivola. Era dau vakauta qori na vakailesilesi ni baqe i Moscow. E rawa ni taura e rauta ni rua na macawa na nodratou dikeva tiko na baqe. Oti qori, ena tukuni vei au meu gole yani na baqe meu na qai lai kauta mai kina na kequ isau. Ena vakatabui tale ga meu vakayagataka na vo ni noqu ilavo ena baqe. Ke dua e cakacaka vou ena baqe qai rogoca ni tiko na yacaqu ena lisi ni batikadi, e dau rerevaki au sara ga.”

Dina ga ni levu na ka dredre era sotava na tacida ia e donu tiko ga na nodra rai. E biu tu na yaca i Brother Yuriy Belosludtsev me rua veimama na yabaki qai rube na nona kisi me ono na yabaki. E kaya, “E vakatabui meu vakayagataka noqu ilavo ena baqe. Ia era vukei keirau vakaveiwatini na mataveitacini. Keirau vakavinavinakataka na nona veitokoni o Jiova.”

Eda vakadeitaka ni o Jiova e kila vinaka na veika tawadodonu era vosota tiko na tacida e Rusia. Eda nuidei ni o Jiova ena tokoni ira tiko ga ena gauna dredre qo.—Maciu 6:33.