Okosita 10, 2023
RUSIA

Marau Tiko ga ni Ratou Tusaqati

SARAVA/ROGOCA

Ena vakarau tauca na mataveilewai na Syktyvkarskiy City Court of the Komi Republic e Rusia, na lewa me baleti Brother Aleksandr Ketov, Brother Andrey Kharlamov, Brother Aleksandr Kruglyakov, Sister Lidiya Nekrasova, kei Brother Sergey Ushakhin. E se bera ni kerea na dauveibeitaki na kedratou itotogi.

Kedratou iTukutuku

Andrey Kharlamov

Sucu: 1971 (Syktyvkar)

Me baleti koya: Dua na idinia

Rau vakamau kei Larisa ena 1990

Vunau vei koya e dua rau cakacaka vata. E raica na yaga ni kena muri na ivakavuvuli vakaivolatabu. Rau papitaiso vakaveiwatini ena 1994

Ka e Tukuna

Cava e vukei iko mo vosota?

Na veigauna kece au sotava kina na ituvaki dredre, qori e gauna vinaka meu volekati Jiova kina. E voleka sara ga meu soro ena gauna au beitaki kina ena basulawa. Ia ni toso na gauna au vakila na veivuke i Jiova. E dau vakayagataka o Jiova e dua na tacida me vakayaloqaqataki au. Au vakadeitaka gona ni tokoni au tiko o Jiova, e vaka ga e roqoti au tu e ligana. Au lai nanuma kina na Jemesa 5:11: “Eda dau vakatoka mera marau na dau vosota. Oni sa rogoca na vosota i Jope oni sa raica tale ga na nona vakalougatataki koya o Jiova me vakaraitaka kina o Jiova ni dau veikauaitaki qai dau yalololoma.” Niu vakila nona kauaitaki au vakayaloloma o Jiova, e uqeti au qori meu lomani koya, qai yalodina vua.

Aleksandr Kruglyakov

Sucu: 1979 (Ukhta, Komi Republic)

Me baleti koya: Cakacaka ena tabana ni dau volitaki vale

Dau wili iVolatabu ni se itabagone. Ni vulica oti na iVolatabu kei ira na iVakadinadina i Jiova, e tinia kina na vakayagataki vakasivia ni gunu kei na wainimate ni veivakamatenitaki. Papitaiso ena 2000

Rau vakamau kei Tatyana ena 2005

Ka e Tukuna

Cava e uqeti iko mo vunau tiko ga ni o tusaqati?

E parofisaitaka o Jisu ena Luke 21:12, 13 nira na vakacacani na nona imuri, era na vesu qai kau i matadra na vakailesilesi. Ia e kaya tale ga: “Qori e gauna vinaka mo dou vakadinadina kina vei ira.” Au kila niu na veivutunitaka keu sega ni vunau niu tu e valeniveivesu. Au saga gona meu vunau vei ira na vakailesilesi ena kena levu au rawata. Au dau kaya vei ira na sala e tautauvata kina na noda cakacaka kei na itavi era qarava. Eda saga kece me vinaka na nodra bula na lewenivanua. Era cakava qori nira vesuki ira na daubasulawa. Ia e levu vei ira era tomana tale na nodra itovo ca ena gauna era sere kina e valeniveivesu. Eda saga gona meda vukei ira na lewenivanua mera vulica na iVolatabu me rawa nira veisau qai bula veiyaloni.

Sergey Ushakhin

Sucu: 1961 (Pinyug, Yasayasa o Kirov)

Me baleti koya: Cakacaka ena kabani ni caka pepa

Rau vakamau kei Nataliya ena 1987. Dua na luvedrau tagane, e dua tale e yalewa

Mai kila ira na iVakadinadina i Jiova ni vulica na iVolatabu o tinana. Ni saumi nona taro ena iVolatabu, e vakadeitaka kina ni sa kunea na ka dina. Papitaiso ena 1999. E papitaiso o Nataliya ena 2005

Ka e Tukuna

Cava e vukei iko me donu tiko ga nomu rai?

Eda dau yalolailai kece, ia eso na gauna ena rawa sara ga ni vakamalumalumutaki keda qai vakavuna meda rai cala. E vakayaloqaqataki au na masu, wili iVolatabu kei na noqu veimaliwai kei ira na taciqu vakayalo. Au dau masulaka vei Jiova me vukei au meu vakayaloqaqataki ira eso tale, vakabibi o ira na tacida itabaqase. E vakamarautaki au noqu vukei ira mera vakasamataka na sala era vakalougatataki kina kei na dau uqeti ira. Au raica me itavi dokai nona vakayagataki au o Jiova meu cakava qori.

Na ivakaraitaki kece qo, e dusia ni o Jiova e solia na “igu levu” vei ira na tacida mera vosota na ituvaki dredre, qai vakaukauataki ira mera yalodina tiko ga.—Aisea 40:29.

Veitaravi ni Gauna

Maji 2, 2021

E caka na vaqaqara ena rauta na 14 na nodra vale na iVakadinadina i Jiova e Syktyvkar. Ratou vesu tu vakawawa o Aleksandr Ketov, Andrey Kharlamov, kei Aleksandr Kruglyakov. E yalani na nodrau veitosoyaki o Lydia Nekrasova kei Sergey Ushakhin
Maji 3, 2021

Rau sereki o Aleksandr Ketov kei Andrey Kharlamov mai valeniveivesu, qai vakatabui me rau biuta na nodrau vale. E vesu o Aleksandr Kruglyakov me wawa veilewai
Epereli 27, 2021

E mai oti na nona vakatabui o Andrey Kharlamov me biubiu e vale
Epereli 28, 2021

E mai oti na nona vakatabui o Aleksandr Ketov me biubiu e vale, sere mai valeniveivesu o Aleksandr Kruglyakov
Epereli 19, 2022

Tekivu na veilewai
June 9, 2022

Raica na turaganilewa ni lailai na ivakadinadina ni ratou vakavuna na tiko yavavala, qai kau lesu na kisi vei ratou na dauveibeitaki
Feperueri 14, 2023

Tomani na kisi ni veilewai, lesi e dua tale na kena turaganilewa

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU