2 OKOSITA, 2021
RUSIA

Marau tu ga o Ira na Tacida iTabaqase Nira Totogitaki

SARAVA/ROGOCA

Tekivu mai na vakatabui ni noda cakacaka e Rusia ena 2017, era veilewaitaki qai totogitaki e levu na tacida e kea. Koya e gone duadua e yabaki 18, koya qase sara e yabaki 89. Ena Julai 2021, era beitaki qai totogitaki e 18 na tacida era yabaki 60 se sivia nira vakaitavi tiko ena sokalou. Me yacova mai qo, e 3 na tacida ratou se vesu tiko. a E vakamacalataki ena iKava ni Rogo ni iLawalawa Dauvakatulewa ni 2021, na veika dredre era sotava na tacida itabaqase era yalodina tiko ga.

Era vosota vakacava na itabaqase na nodra beitaki qai veilewaitaki? Raica mada qo eso na nodra vosa ni veivakayaloqaqataki.

Aleksandr Ganin

Sucu: 1957

iTotogi: Vakatatabutaki me tolu na yabaki, qai ciwa na vula nona vakatabui me gole ina dua tale na vanua

Papitaiso: 1997

Ka e Tukuna

Rawa vakacava ni o marau tiko ga ena ituvaki dredre o sotava?

O Jiova e vakayagataka nona isoqosoqo me vakarautaka mai na ivakasala yaga meda kua ni yalolailai, me donu tale ga noda rai nida vakacacani. Keirau dau tautauvimate vakaveiwatini ni bera niu vesu. Ia keirau saga me keirau ogaoga tiko ga, qai kua ni vakawelei. Keirau vakaliuca tiko ga na veika e bibi cake, ya na neirau veika vakayalo.

Cava dou vakila vakavuvale ena nomu veilewai?

Keitou sa qai veivolekati ga vakalevu, e qaqaco tale ga neitou vakabauta. Au vakadeitaka ni sa yaco tu nikua na parofisai vakaivolatabu, eda sa donuya tu qo na gauna ena yaco kina e levu na veika vakatubuqoroqoro. Qori e vakaukauataki au meu yalodina qai kua ni soro.

Yuriy Krutyakov

Sucu: 1952

iTotogi: Vakatatabutaki me lima na yabaki, qai dua na yabaki nona vakatabui me gole ina dua tale na vanua

Papitaiso: 1998

Ka e Tukuna

Cava eso na ka dredre dou sotava vakavuvale ni o totogitaki?

E vinaka cake na vakatatabu mai na biu i valeniveivesu. Ia e dredre meu kunea e dua na cakacaka niu beitaki niu dua na daubasulawa. Gauna qo e sau levu sara na kakana, wainimate kei na veiqaravi vakavuniwai. E sega ni veirauti tale ga na noqu ilavo ni peniseni.

Cava eso na mate e tauvi iko tiko, o vosota rawa tale ga vakacava?

E dau sasala na duruqu. Me vaka niu vesu tu kei ira na dau kana tavako ena dua na rumu, e tauvi au na niumonia ena gauna au sere kina. Au se sega ni bula vinaka ena gauna qo. Ia au dau saga meu muria vinaka na ka e kaya o vuniwai, au qarauna tale ga noqu bula me rawa niu qaravi Jiova tiko ga.

Sala cava soti e vukei iko kina o Jiova ni oti nomu veilewai?

Era vukei au vakalevu na mataveitacini, dina kina na ka e kaya na Same 133:1. E ka ni veivakalougatataki levu nida vakila na loloma vakamataveitacini. Au sega ni rarawataka kina vakalevu noqu veilewaitaki. Au sega mada ga ni tadra niu na veitokani kei na levu na mataveitacini. Au raica kina nona tuvatuvanaki matau o Jiova, kei na nona karoni keitou vakavuvale ni vakayagataki ira na tacida. Dua na ka nona vukei keitou ena ituvaki dredre keitou sotava. Na veika kece qori e uqeti au meu yalodina tiko ga vua. E sega tale ga ni dua na vuna meu biuti koya kina.

Lyudmila Ponomarenko

Sucu: 1950

iTotogi: Vakatatabutaki me tolu na yabaki

Papitaiso: 1998

Ka e Tukuna

Cava eso na ka o vakatatabutaki kina?

Au sega ni rawa toki ina dua tale na vanua, vaka vo ke ratou sa vakadonuya na vakailesilesi. E dodonu meu rairai tale ga ina mataveilewai e veivula.

Cava o vakila ena vakatatabu qo?

Levu na gauna e mosi na uluqu. Ia e vukei au vakalevu noqu dau kerei Jiova me solia vei au na lomavakacegu. Me donu tale ga noqu rai ena ituvaki au sega ni lewa rawa.

E tokoni iko vakacava o Jiova?

Oti noqu veilewai e vakalougatataki au vakalevu o Jiova. E vakaukauataki au, qai vukei au meu yalodina tiko ga. Era dau lomani au na mataveitacini, era tu vakarau tale ga mera veivuke ena gauna au sotava kina na ituvaki dredre. Eso mada ga na ituvaki au sotava, au nanuma niu na sega ni vosota rawa. Ia e tokoni au tu ga o Jiova. Au vulica kina meu dau nuitaki koya, qai vakararavi vua ena ka kece. Au vakavinavinaka vakalevu vei Jiova ni nuitaki meu tukuni koya ina mataveilewai. Au marautaka dina noqu cakava qori. Au sega ni via yalolailai ena ituvaki qo, ia au vakadeitaka meu vakaitavi ena veitaucici ni bula me yacova na tepi. Meu vukei ira tale ga eso tale mera rawata qori.

Gennady Shpakovskiy

Sucu: 1958

iTotogi: Dodonu me vesu me ono veimama na yabaki. Ia oti nona kerekere ina mataveilewai, e vakatatabutaki me rua ga na yabaki

Papitaiso: 1995

Ka e Tukuna

Cava eso na ka o vakatatabutaki kina ni oti nomu veilewai?

Tolu na yabaki noqu vakatabui meu tuvanaka se vakaitavi ena dua na ka ni lotu. Au vakatabui tale ga meu biuta noqu vale ena 11 na kaloko ena bogi me yacova na 6 na kaloko ena mataka lailai. Keu via lako i tauni se toki ina dua na tale na vanua, ena vinakati meu kerea vei ira na vakailesilesi. Meu rairai tale ga vakarua e veivula ina mataveilewai.

Era tokoni iko vakacava na mataveitacini ena gauna dredre qori?

Levu na sala era vukei au kina. Tekivu mai na siga au vesu kina era vakauta mai vei keitou vakavuvale na ivola, na kad, droini, era text tale ga mai mera veivakayaloqaqataki. Era tu vakarau tale ga mera vukei keitou.

Cava e vukei iko mo yalodina tiko ga vei Jiova?

Na veika kece keitou sotava vakavuvale ena veiyabaki sa oti, au vakadeitaka kina niu qarava tiko na Kalou dina o Jiova! Noqu wilika qai vakasamataka vakatitobu na veika e parofisaitaka ena iVolatabu ni na yaco ena “otioti ni veisiga,” au vakadeitaka kina niu sa muria tiko na sala donu ina vuravura vou.

Valentina Suvorova

Sucu: 1948

iTotogi: Vakatatabutaki me rua na yabaki

Papitaiso: 1996

Ka e Tukuna

Cava o vakila ena veivakacacani o sotava?

Au vakabauta e dua na Kalou e dauloloma, mamarau qai yalololoma. Ia au madua qai yalolailai niu beitaki niu dua na daubasulawa. Levu na gauna au nuiqawaqawa. Eso na bogi au sega ni moce rawa, e mosi na uluqu kei na dakuqu qai tubu na noqu dra.

Cava e vukei iko me donu tiko ga nomu rai?

E vukei au vakalevu noqu lomani Jiova, au mareqeta tale ga na nona lawa kei na nona ivakavuvuli. Au vakavinavinakataka niu mai lewena nona isoqosoqo. I liu au dau kila tu ga ni o Jiova e Kalou dauloloma, dauveivakacegui qai veivakayaloqaqataki. Ia gauna qo au vakadinadinataka sara ga ni karoni au o Jiova e veisiga, qai vukei au meu yalodina tiko ga. Au mai vakila qo ena vukudra na mataveitacini, noqu itokani voleka, qase ni ivavakoso kei ira kece na taciqu e veiyasa i vuravura. Vinaka vakalevu!

Eda vakavinavinakataka vakalevu na nodra ivakaraitaki ni yalodina na tacida itabaqase qo e Rusia. Meda vakatotomuria mada ga na nodra yaloqaqa, koya e bibi sara nira talei ena mata ni Kalou.—Vosa Vakaibalebale 16:31.

a Sister Valentina Baranovskaya e yabaki 70, e vesu me rua na yabaki. O Brother Aleksandr Ivshin e yabaki 63, e vesu me vitu veimama na yabaki. O Brother Yuriy Savelyev e yabaki 68, e vesu me ono na yabaki.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU