Rau vakarautaka e rua na daunipolitiki e Merika o Eliot L. Engel kei Michael T. McCaul, e dua na ivola vakalawa ni House Resolution 958 e kudruvaki kina na nona vesu vakatawadodonu o Brother Dennis Christensen. Qori e dua na ivola vakalawa se qai tabaki sara qo mai vei ira na vakailesilesi vakamatanitu, me saqata na nodra vakacacani na iVakadinadina i Jiova e Rusia ena vuku ni nodra vakabauta.

E vesu o Brother Christensen ena Me 2017, ni vakaitavi tiko ena soqoni vaKarisito ni iVakadinadina i Jiova. Rau vakarautaka na daunipolitiki na ivola vakalawa qori ena ika8 ni Me 2020, e tukuni kina vei Rusia me sereki Brother Christensen ena kena gauna totolo duadua.

E kaya na ivola: “E dua na iVakadinadina i Jiova o Dennis Christensen, e turaga ni Denmark. A bala e valeniveivesu me ono na yabaki ena ika6 ni Feperueri 2019. E sega ni duavata kei na lewa qori na tabana ni veivaqaqai mai Merika na United States Commission on International Religious Freedom, e kaya ni vakadinadinataka tale ga ena ka e cakava o Rusia ni sega ni tokona na nodra dodonu na lewenivanua me baleta na sokalou.”

Ena ika25 ni Me 2020, sa ikatolu ni yabaki nei Brother Christensen e valeniveivesu. E dua vei ira na le 32 na tacida era vesu tiko e Rusia, 9 era sa veilewaitaki oti, 23 tale era se wawa veilewai tiko. E 18 tale era vakatabui mera biuta nodra vale. Sa 331 na iwiliwili taucoko ni iVakadinadina i Jiova e beitaki ira na matanitu o Rusia nira basulawa.

Era vakaraitaka na vakailesilesi ni matanitu e Merika kei Urope na nodra sega ni duavata kei Rusia ena nodra vakacacani na iVakadinadina i Jiova ena vuku ni nodra sokalou.

Ke mani vakadonui se sega na ivola vakalawa qori qai caka kina e dua na ka, eda kila ga ni na tokoni ira na tacida e Rusia o Jiova me rawa nira vosota tiko ga ena marau. Eda rai vakanamata ena gauna ena vakarusa kina o Jiova na ka ‘e vakatubuleqa tiko ena yaca ni lawa.’—Same 94:20-23.