3 OKOSITA 2021
RUSIA

Nuitaka o Brother Andrey Okhrimchuk na Kaukaua i Jiova

SARAVA/ROGOCA

IROGO VOU | Ena ika3 ni Feperueri 2022, e sega ni via rogoca na mataveilewai na Fourth General Jurisdiction Court of Cassation mai Rusia, nona kerekere o Brother Andrey Okhrimchuk. Ena rube tiko ga na nona kisi me va na yabaki. Ena sega ni biu e valeniveivesu ena gauna qo.

Veitaravi ni Gauna

22 Me, 2019

Era vaqaqara na ovisa ena matakacaca e nona vale, kei na nona lori
29 Okotova, 2020

Beitaki ni cala vakalawa nona vakaitavi ena soqoni ni lotu, kei na nona tokona na isoqosoqo e vakavuna na tikoyavavala
5 Epereli, 2021

Tekivu veilewaitaki
2 Okosita, 2021

E vakataulewataka na mataveilewai na Leninskiy District Court of Rostov-on-Don mai Rusia, ni cala o Brother Andrey Okhrimchuk. E vakatatabutaki me va na yabaki
4 Okotova, 2021

E sega ni vakadonuya na mataveilewai na Rostov Regional Court mai Rusia, nona kerekere. Ena rube tiko ga na nona kisi

Kena iTukutuku

Andrey Okhrimchuk

Sucu: 1979 (Korosten, Ukraine)

Me baleti koya: E vuli idinia. A lewena tu na mataivalu ni bera ni mai dua na iVakadinadina i Jiova

Rau qoroya kei watina o Yekaterina na donu ni kena vakayacori na parofisai vakaivolatabu. Rau vakamau ena 2006, rau papitaiso sara ena 2007. E dua na luvedrau yalewa

Ka e Tukuna

E vaqaqacotaka vakacava nomu veiwekani kei Jiova na veika dredre qo?

Ke sega na veivuke i Jiova au na sega ni vosota rawa na veika dredre qo. Se qai vakadua meu masu wasoma vei Jiova. Au tukuna vua na ka au leqataka, au kerea me vakalevutaka noqu vakabauta, meu yaloqaqa qai kua ni rerevaka e dua na ka. Au kila ni rogoca o Jiova na noqu masu, e kila vinaka tu o koya na ka e cakava.

Cava e uqeti iko mo yalodina tiko ga vei Jiova?

Au nanuma lesu na ka e kaya na Joni 6:67, 68. A tarogi ratou nona yapositolo o Jisu ke ratou via biuti koya. E qai sauma o Pita: ‘Me keitou qai lako tale vei cei?’ E va tale ga qori o au, meu na lako tale i vei? Na Vosa ga i Jiova ena dusimaki keda ina bula tawamudu, o koya ga ena vakalesuya mai na veika dodonu. E vukei au tale ga na Aisea 30:15. Niu sotava na ituvaki e veivakayalolailaitaki, e vukei au na tikinivolatabu qo meu lomavakacegu qai nuitaki Jiova.

Dua na ka o via tukuna vei ira era na rawa ni vakacacani ena dua na gauna mai qo?

Kua ni nuitaka ga nomu kaukaua. Mo kerei Jiova me vakalevutaka nomu vakabauta, mo yaloqaqa qai doudou vakalevu. Vaqaqacotaka nomu veitokani kei ira na mataveitacini, mo rawa ni wasea vei ira na ka o leqataka ni o sotava kina na veika dredre.

Era ivakaraitaki vinaka dina na tacida mai Rusia ena dei ni nodra vakabauta. Eda kila ni o Andrey kei ratou nona vuvale ratou na vosota na veika dredre, qai vakararavi tiko ga vua na Tamada vakalomalagi o Jiova.—Same 37:5.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU