Ena ika19 ni Julai 2021, e kaya na Solombalskiy District Court of Arkhangelsk mai Rusia, ni cala o Brother Yevgeniy Yakku. E totogitaki tale ga me sauma e $12,082 na ilavo ni Merika. Ia ena sega ni biu e valeniveivesu ena gauna qo

Yevgeniy Yakku

• Sucu: 1980 (Koro o Sosnovets, Republic of Karelia)

• Me baleti koya: Ni se itabagone, e taleitaka vakalevu na vakayacori ni parofisai ena iVolatabu. Papitaiso me iVakadinadina i Jiova ena 2006. Toki i Arkhangelsk me lai vulica na ka vakabisinisi. Rau vakamau kei Irina ena 2007. Rau taleitaka me rau cakava eso na ka i tautuba, kei na gade

Ena ika18 ni Feperueri 2019, era curuma vakaukaua na vakailesilesi mai Rusia nona vale o Brother Yevgeniy Yakku. E mani vesu nira beitaki koya ni vakaitavi tiko ena cakacaka e vakavuna na “tikoyavavala.” Era qai vesuki koya tu vakawawa na ovisa me rua na siga. E sega mada ga ni tukuni vei ira nona itokani, kei na nona vuvale na vanua e tiko kina.

Ni sere mai o Yevgeniy, e vakatabui me biuta nona vale ena bogi. E vakatabui tale ga me caka na sosoqoni vata e nona vale, me veivosaki kei ira eso tale ena talevoni, imeli se internet. Oti rauta ni vitu na vula, e vakalailaitaka na mataveilewai eso na ka e vakatatabutaki tu kina. E vakatarai tale ga me gole ina dua tale na vanua ena bogi.

Ena ika25 ni Noveba2019, e beitaki o Yevgeniy ni tuvanaka tiko na cakacaka e vakavuna na “tikoyavavala.” Toso na gauna e beitaki ena so tale na cala. Ke vakadinadinataki ni cala, ena rawa ni vesu me 15 na yabaki e valeniveivesu. Na veika e beitaki kina qori o Yevgeniy, e vakavuna me vakacegui mai nona cakacaka, sega ni rawa ni tauri ilavo mai na baqe, e vesu tale ga e rua nona motoka.

Na ituvaki dredre rau sotava qo o Yevgeniy kei Irina, e vaqaqacotaka dina nodrau nuitaki Jiova. E kaya o Irina: “Au sega ni vakamacalataka rawa na levu ni noqu vakavinavinakataki Jiova niu raica na sala e sauma kina o koya na noqu masu, kei na nona taqomaki keirau vakaveiwatini.”

Kena ivakaraitaki, e masulaka o Irina vei Jiova me solia vei watina na lomavakacegu, me vakamacalataka tale ga vakavinaka nona vakabauta ena mataveilewai. Qori tale ga na ka e masulaka o Yevgeniy, e kaya: “Au dau kerea vei Jiova na vuku na gauna kece meu lai vakatarogi kina se me rogoci noqu kisi.” E vakila dina ni sauma o Jiova nona masu. E kaya: “Sega ni levu sara na ka au na tukuna. Ia au tukuna ga na ka e dodonu meu kaya. Au raica kina ni o Jiova e tu ga e yasaqu ena veigauna kece. Qai dau matata na sala e sauma kina noqu masu. Gauna qo au sa vakadinadinataka sara ga na sala e vukei au kina o Jiova.”

Nida waraka tiko na macala ni nona veilewai o Yevgeniy, eda kila ni o Jiova ena vukei koya me doudou ni tutaka nona vakabauta “ena yalomalua, kei na veidokai dina.”—1 Pita 3:15.