21 ME, 2021
RUSIA
Ratou Nuitaki Jiova Eso na Tacida
IROGO VOU | Sega ni Vakadonui Nodratou iKarua ni Kerekere
Ena ika13 ni Janueri 2022, e sega ni vakadonuya na mataveilewai na First General Jurisdiction Court of Cassation mai Rusia, nodratou ikarua ni kerekere o Brother Yuriy Krutyakov, na watina o Zinaida, o Brother Vitaliy Nikiforov kei Brother Konstantin Zherebtsov. Ratou na sega ni biu e valeniveivesu ena gauna qo.
Ena ika20 ni Julai 2021, e vakataulewataka na Moscow Regional Court mai Rusia, me ratou vakatatabutaki i vale na tacida qo.
Ena ika24 ni Me 2021, e kaya na Chekhov City Court of the Moscow Region mai Rusia, ni ratou cala na tacida. Ratou mani vakatatabutaki kece i vale. O Yuriy e vakatatabutaki me ono na yabaki. O Zinaida, Vitaliy, kei Konstantin me ratou rua na yabaki.
Kedratou iTukutuku
Yuriy Krutyakov
Sucu: 1952 (Nizhny Novgorod)
Me baleti koya: E cakacaka vakaidinia. Dau droinitaka na itaratara ni vale, e fomani tale ga. Vica vata na yabaki nona via kila tu na inaki ni bula, e qai vakacegui koya na kena isau vakaivolatabu e vulica vei ira na iVakadinadina i Jiova. Papitaiso sara ena 1998
Rau vakamau kei Zinaida ena 2012. Rau taleitaka na vakasaqa, kei na vakarogo sere
Zinaida Krutyakova
Sucu: 1958 (Nizhnedevitsk)
Me baleti koya: Ni bera ni vakamau kei Yuriy, a susuga duadua tiko na luvena yalewa. Cakacaka vakaidinia, kena dau ena buli iyaya lase kei na iyaya e tarova na kama. Gauna qo sa vakacegu mai na nona cakacaka
E veilecayaki ena veika tawadodonu e yaco tu e vuravura. Ia e vakacegui koya na isaunitaro vakaivolatabu e vulica vei ira na iVakadinadina i Jiova. Papitaiso sara ena 2003, rau vakamau kei Yuriy ena 2012
Vitaliy Nikiforov
Sucu: 1968 (Nevel, Yasayasa o Pskov)
Me baleti koya: Ni se gone e matai ena ka ni fika, e taleitaka tale ga na qito. E dau vakavinakataka na waqavuka ni valu e Rusia
Vulica na iVolatabu kei ira na iVakadinadina i Jiova ena 2005. Cegu mai na mataivalu ena 2007. Papitaiso sara ena 2012
Konstantin Zherebtsov
Sucu: 1973 (Turkmenistan)
Me baleti koya: Ni se itabagone, e taleitaka me kumuna na sitaba kei na lave ka bi. Tauri vola mai na koronivuli ni cakacaka, e daunilivaliva sara. Ena 2003, e dau bulia na misini me vakayagataki ena valenicina vakaniukilia
Rau vakamau kei Natalya ena 1994. Rau vulica vata na iVolatabu kei ira na iVakadinadina i Jiova. Papitaiso sara ena 2016
iTukutuku ni Veilewai
Ena ika30 ni Seviteba 2019, ratou beitaki vei ira na Investigative Committee mai Rusia ena yasayasa o Moscow, ni ratou daubasulawa o Brother Vitaliy Nikiforov, Brother Konstantin Zherebtsov, Brother Yuriy Krutyakov kei watina o Sister Zinaida Krutyakova. Oti e rua na siga era curuma vakaukaua na vakailesilesi na nodratou vale.
Ratou vakatarogi me vica vata na aua o Vitaliy, Konstantin, kei Zinaida, ratou vesu tale ga me dua na bogi. Oti ratou vakatatabutaki tu i vale.
Ena ika5 ni Maji 2020, a vesu o Yuriy qai duidui na vanua e lai vesu kina. E se vesu tiko ga ena gauna qo.
E kaya o Konstantin ni vukei koya vakalevu na masu me vosota na ituvaki dredre qo. Gauna era curuma vakaukaua kina na vakailesilesi nona vale ena bogi, e kerei Jiova me vukei koya me kua ni lomaleqa vakalevu. E kaya: “Nira gole yani, keitou dokai ira, keitou lomavakacegu tale ga. Qori e dua na sala keitou vakadinadinataki Jiova kina vei ira. Keitou vakaraitaka tale ga ni o keda na tamata i Jiova eda dau veiyaloni, da qai muria na lawa.”
E kaya o Konstantin: “Ni dredre na ituvaki, e dau vakayaloqaqataki au na Sakaraia 2:8. Au kila kina ni o Jiova e kauaitaki au, qai mareqeti au vakalevu. E vakadeitaka ni na taqomaki au me vaka na loa ni matana.”
Ni ratou nuitaki Jiova tiko na tacida qo, eda nuidei ni na taqomaki ratou tiko ga e veigauna.—Same 55:22.
Rawa ni o Wilika Tale ga
ITUKUTUKU VOU
Vesu ena Vuku ni Nodra Vakabauta—Rusia
Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.