Ena ika25 ni Seviteba, 2020, * ena tauca na Mataveilewai ni Yasana o Yelizovsky mai Rusia, na lewa me baleti ratou o Brother Konstantin Bazhenov, na watina o Snezhana, kei Sister Vera Zolotova. Ratou vinakata na dauveibeitaki me ratou sauma o Brother kei Sister Bazhenov e $7,850 na ilavo ni Merika, o Sister Zolotova me sauma e $5,235 na ilavo ni Merika.

Konstantin Bazhenov

• Sucu: 1977 (Petropavlovsk-Kamchatsky, e Kamchatka)

• Kena italanoa: E qase duadua, tolu na tacina. E dau ripea motoka, e veivakavulici tale ga ena dua na koronivuli ni vuli tara. E taleitaka na siwa

• E vakamautaki Snezhana ena 2001, e qasenivuli tale ga. E dua na luvedrau yalewa o Elizabeth. Ratou qaravi Jiova vakavuvale

Snezhana Bazhenova

• Sucu: 1977 (Shikotan Island, Sakhalin Oblast)

• Kena italanoa: E susu ena vuvale itubutubu le dua. Dau taleitaki ira na gone, kei na nona veivakavulici ena paraimari. E vakatabui tiko ena gauna qo me vakavulici ira na gone ni beitaki ni daubasulawa

• E vakavulici koya o nona bu me kila na Kalou, me masu tale ga. E bucina kina me taleitaka na veika vakayalo kei na iVolatabu

Vera Zolotova

• Sucu: 1946 (Yelizovo, e Kamchatka)

• Kena italanoa: E susu ena dua na vuvale levu. Rau vakamau kei Yuri Zolotov ena 1966, qai rua na luvedrau. Sa cegu mai na cakacaka vaka daunifika. E taleitaka na taubale balavu, kei na vakasisisi ena ucacevata

• Vica vata na yabaki nona vakasaqara tu na Kalou, qai lewena tale ga e vica na lotu. Dua na ka nona marau ni sa qai kila ni Kalou e lewadodonu, e lomani ira talega na tamata. E sega ni iVakadinadina i Jiova o watina, ia e qoroya nona ivakaraitaki vinaka o Vera ena veika sa vulica tiko ena iVolatabu

Ena ika19 ni Okosita, 2018, era curuma na ovisa e tolu nodratou vale na iVakadinadina i Jiova ena tauni o Yelizovo. Era vesu e 11 na tacida, ra qai vakatarogi me vica vata na aua. Ratou mani sere e walu na tacida. Ia ratou beitaki vei ira na vakailesilesi o Brother Bazhenov, o watina, kei Sister Zolotova ni ratou daubasulawa. Ratou mani vesu tu vakawawa. Oti e rua na siga rau sere na tacida yalewa. Ia e vakatulewataka na turaganilewa me vesu tiko ga o Brother Bazhenov. Oti e walu na siga sa qai sere.

Me vaka ni ratou se wawa veilewai tiko, meda nanumi ratou mada ga ena masu ni ratou na nuitaki Jiova tiko ga vakatabakidua. E vakadeitaka vei keda na iVolatabu ni o Jiova e vu ni vakacegu kei na marau vei ira na yalodina vua, ena ‘levu tiko ga kina nodra inuinui ena kaukaua ni yalo tabu.’—Roma 15:13.