Ena ika5 ni Okotova 2020, * ena tauca na Mataveilewai ni Yasana o Zasviyazhsky e Rusia, na lewa me baleta nodratou kisi o Brother Aleksandr Ganin, Brother Khoren Khachikyan, Brother Andrey Tabakov, Brother Mikhail Zelenskiy, wili kina o Brother Sergey Mysin kei na watina o Nataliya. Ratou na rawa ni vesu kece me tolu ina vitu na yabaki. Ratou kerea na dauveibeitaki ina mataveilewai me tauri nodratou ilavo, me vesuka tale ga nodratou motoka e rauta ni $20,000 na ilavo ni Merika na kena isau.

Aleksandr Ganin

• Sucu: 1957 (Ekhabi, e Sakhalin Island)

• Kena italanoa: Papitaiso qai dua na iVakadinadina i Jiova me sivia e 20 na yabaki. Qo sa cegu mai na cakacaka, qai taleitaka na teitei

Khoren Khachikyan

• Sucu: 1985 (Yerevan, e Armenia)

• Kena italanoa: Vakoroi ena ka vakailavo. Ni se cauravou e dauveisisivi ena qito veibo. E dauyalololoma qai yalovinaka

• Tekivu vulica na iVolatabu kei ira na iVakadinadina i Jiova ni via kila e levu tale na ka me baleta na Kalou, e muria tale ga nona ivunau. Taleitaka na ka e vulica ena iVolatabu ni sega ni veisaqasaqa na ka e volai kina

Sergey Mysin

• Sucu: 1965 (Kulebaki, e Nizhny Novgorod)

• Kena italanoa: Rau veikilai kei na watina o Nataliya ena gauna e vuli idinia tiko kina, rau vakamau sara ena 1991. Rau qaravi Jiova me sivia e 20 na yabaki, e rua tale ga na luvedrau. E taleitaka na qito, vakabibi na qito lacrosse

Nataliya Mysina

• Sucu: 1971 (Leningrad, kilai ena gauna qo me Saint Petersburg)

• Kena italanoa: Susu ena vuvale era veiqaravi vakamataivalu. E tu e Jamani ni bera ni vakoroi ena uliwainimate. Taleitaka na vakasaqa kei na vavavi

Andrey Tabakov

• Sucu: 1973 (Minsk, e Belarus)

• Kena italanoa: Cakacaka ena tabana ni kompiuta. Rau vakamau kei Marina ena 2006. Rau vulica na iVolatabu kei ira na iVakadinadina i Jiova, rau papitaiso sara. Taleitaka na cakacaka vakalivaliva, vakabibi na retio kei na kompiuta

Mikhail Zelenskiy

• Sucu: 1960 (Bulaesti, e Moldova)

• Kena italanoa: E dausoko, draivataka tale ga na lori lelevu. Rau vakamau kei Victoria ena 1989. Rau tekivu vulica na iVolatabu ena itekitekivu ni 1990. Rau lomani Jiova vakalevu, rau papitaiso sara

Ena tolu na yabaki sa oti, era tekivuna na tabana ni ovisa e Rusia (Federal Security Service) nodra vaqaqai lo na tacida e Ulyanovsk. E okati tale ga kina na kena katoni lo nodra veitalanoa ena talevoni. Ena ika24 ni Feperueri 2019, era vaqaqai rau o Brother kei Sister Mysin, wili kina o Brother Khachikyan, Brother Tabakov, kei Brother Zelenskiy.

Oti e tolu na siga era curuma vakaukaua na ovisa nodratou vale na tolu na tacida tagane qori. Ratou vesu qai wawa veilewai tu. Ena gauna vata qori e ciqoma e dua na qiri o Sister Mysina. E tukuni vua ni sa vakacacani nona motoka, ena vinakati me rau gole i tuba kei na watina o Sergey. Ni dolava na katuba o Brother Mysin, era curu yani na ovisa ina nodrau vale, era vaqaqara ra qai taura nodrau iyaya vakalivaliva. Oti rau vesu na veiwatini.

Ena siga e tarava, e vakataulewataka na mataveilewai ni yasana o Ulyanovsk, me vesu tu vakawawa o Brother Mysin. Ratou vakatabui tale ga me ratou biuta nodratou vale o Sister Mysina kei na tolu tale na tacida tagane.

E wawa veilewai tu o Brother Mysin me 55 na siga, e vakatabui tale ga me biuta nona vale me 123 na siga. Ratou vakatabui tale ga me ratou biuta nodratou vale o Sister Mysina, Brothe Khachikyan, Brother Tabakov, kei Brother Zelenskiy me 50 ina 55 na siga.

Ena ika15 ni Me 2019, era vaqaqara na ovisa ena nona vale o Brother Ganin, ra qai vesuki koya. E vesu vakawawa tu me rua na siga ena dua na vale.

Ena gauna qo, ratou se vakatatabutaki tiko na tacida qo ena so na ka. Ia ratou vakasaurarataki tiko ga vei ira na ovisa ena so tale na sala. Dua oya, nodra sogota nodratou akaude ni baqe o Brother kei Sister Mysin, kei Brother Tabakov. E maroroi tu ena nodrau akaude ni baqe na veiwatini e $6,313 na ilavo ni Merika, o Brother Tabakov e tiko ena nona akaude e $7,575 na ilavo ni Merika.

Eda masulaka ni na vakayaloqaqataki ira tiko ga na tacida e Rusia na vosa uqeti qo me rawa nira tudei ena vakabauta: “Na Kalou e noda ivakaruru kei na kaukaua, e dau tu vakarau me vukei keda ena gauna ni rarawa.”—Same 46:1.