E nanuma vinaka tu nona dau wilika o tamana o Brother Grigoriy Puyda ena veiyakavi na Noqu iVola ni Talanoa ena iVolatabu vei ratou vakaveitacini. E sega tale ga ni guilecava nona dau cakacaka vakavunau vata kei tamana ena koro o Kvitok, e sotavi ira kina nona qasenivuli kei na lewe ni nona kalasi. Ni se cauravou e cakacaka vakavunau vata kei tukana o Brother Pyotr Partsey ena yalava e sega ni lesi. E vakadinadinataka nona dau gugumatua o tukana ena cakacaka vakavunau, kei na nona dau vakuai koya.

E raica tale ga nodrau dau taleitaka o tamana kei tukana na wiliki ni iVolatabu, kei na ivola vakaivolatabu. E muria tale ga na nodrau ivakaraitaki.

Ia qo ni yabaki 41 o Brother Puyda, e vakasakiti na sala e vakatotomuri rau tiko kina o tamana kei tukana, oya nona bala e valeniveivesu ni dua na iVakadinadina i Jiova. Ena ika30 ni Me 2018, era vesuki koya na ovisa, qai vesu tu me va na vula. Oti nona sere, e vakatabui me biuta nona vale me ono na vula. E bala e valeniveivesu na tukana o Brother Partsey ena veiliutaki ni Nazi kei na matanitu makawa na Soviet Union. E vesu tale ga o tamana ena veiliutaki ni Soviet Union.

E kaya o Brother Ivan Puyda: “E vola na yapositolo o Paula ena 2 Timoci 3:14, ‘Mo muria tiko ga na ka o vakavulici kina, na ka o vakabauta ena gauna e vakadeitaki kina vei iko.’ E vakayaloqaqataki au nodrau ivakaraitaki ni tuberi au ena dina o tamaqu kei tukaqu. E sega ni dua na matanitu se valeniveivesu e tarova na nodrau qaravi Jiova, ena oti tale ga na veitusaqati. Au muria na veika rau vakavulici au kina, au vinakata tale ga meu vakatotomuria na nodrau ivakaraitaki. Keu na yalodina tiko ga, au na vakaicovitaki.” E waraka tiko o Brother Puyda na macala ni nona veilewai.

E kaya ni rau sega vakadua ni dau talanoataka o tamana kei tukana na ituvaki dredre rau sotava e valeniveivesu. Rau talanoataka ga nodrau dau vunautaka na itukutuku vinaka.

Sa yabaki 64 o Brother Grigoriy Puyda. E papitaiso ena 1975, qai vesu me dua na yabaki ni sega ni via vakaitavi ena mataivalu. A sere ena 1977, qai vesu tale me dua na yabaki ena 1986 ni kune vua eso na noda ivola e vakatabui tu ena gauna ya. E vesu tale ga ena keba ni veivakararawataki ena 1944 ina 1950 ni tawaveitovaki.

E kaya o Grigoriy: “Au vosota rawa na veivakacacani ni qaqaco na noqu vakabauta. Au vakadeitaka ni dina na ivakarau ni noqu sokalou, kuria ya ni o Jiova ga na Kalou dina.”

Qori tale ga na ka e sotava tiko ena gauna qo o Ivan. E kaya o Grigoriy: “Au nanuma vinaka tu na ka e yaco ena gauna e veiliutaki tiko kina na Soviet Union, e yaco tale tiko ga qori nikua. Au masulaka gona me vosota qai yalodina tiko ga o Ivan, me rawa ni vakalagilagi kina na yaca i Jiova.”

Sa takali o Brother Partsey. E biu ena keba ni veivakararawataki ena 1943 e Majdanek. Oti era tokitaki koya na Nazi ina keba e Ravensbrück ni sega ni via cakitaka nona vakabauta, qai sere ena 1945. E vesu tale ena 1952 qai totogitaki me vakamatei. Ia e sega ni yaco qori mani sere ena 1956. E vesu tale ena 1958 ena vuku ni nona vakabauta qai sereki ena 1964.

E kaya o Ivan: “E vakayaloqaqataki au na ivakaraitaki i tukaqu. Ni vakaturi mai, au na talanoataka vua niu tusaqati, e vukei au tale ga nona ivakaraitaki meu yaloqaqa qai yalodina tiko ga.”

E kaya o Ivan, “E sega ni dua ena tarova noqu vakabauta kei na noqu lomana na Kalou. Au dau tukuna vei ira na ovisa: ‘Oni rawa ni vesuki au qai biuti au e valeniveivesu, ia e sega vei kemuni na kaukaua moni lewa noqu vakasama kei na lomaqu.’”

Ratou vakaukauataki vakacava na tacida qo ena gauna ni veilewai?

E kaya o Ivan: “E tukuni ena Cakacaka 14:22, ‘eda na vakararawataki mada vakalevu, eda na qai curu ina Matanitu ni Kalou.’ Era na vakararawataki kece na lotu vaKarisito, me vaka nodra biu e valeniveivesu, tauvimate se na nona takali e dua era lomana. Ia eda na yalodina tiko ga ke donu noda rai, qai qaqaco noda veiwekani kei Jiova. O Jiova ena tu vakarau me tokoni ira na nona tamata.”

E kaya o tamana o Grigoriy: “Vaqaqacotaka nomu veiwekani kei Jiova, qai veivolekati kei koya. Bibi mo vakadeitaka na ka dina, o na vosota kina na ka kece qai yalodina tiko ga. Ena vakaicovitaki na nomu sasaga.”

E veivakayaloqaqataki na noda wilika nona tokoni ira na tacida o Jiova ena gauna era tusaqati kina. Meda masulaki ira tiko ga na mataveitacini e Rusia mera yaloqaqa. Me vakaukauataki ira tale ga na yalayala i Jiova: “Kua ni rere . . . ena levu sara na kemu isau.”—Vakatekivu 15:1.