Ena ika3 ni Seviteba 2020, e tauca na Mataveilewai ni Taoni o Novozybkov ena Yasana o Bryansk, ni ratou cala o Brother Vladimir Khokhlov, o Sister Tatyana Shamsheva, o Sister Olga Silaeva, kei Brother Eduard Zhinzhikov. E tau na kedratou itotogi me ratou vesu me rauta ni 12 ina 15 na vula. Ia ratou sa sere ni sa balavu na nodratou wawa veilewai tu e loma.

Vladimir Khokhlov

• Siga ni Sucu: 1977 (Novozybkov, Yasana o Bryansk)

• Kena italanoa: E dauripea motoka. A sotia tu ni bera ni dua na iVakadinadina i Jiova. E dau taleitaka na qito soka, wilivola, siwa, kei na qiri qita

• E uqeti koya e dua na nona itokani me vulica na iVolatabu. E vakamautaki Olga ena 2007. Dua na luvedrau yalewa o Anastasia. Eratou qaravi Jiova kece vakavuvale

Tatyana Shamsheva

• Siga ni Sucu: 1977 (Cherepovets, Yasana o Vologda)

• Kena italanoa: E dau dikeva na veika vakailavo (economist). Vica vata na yabaki nona veivakavulici ena kena dikevi na veika vakailavo kei na lawa. Papitaiso ena 1995. Dau taleitaka me vukei ira eso tale mera kila na ka dina ena iVolatabu

Olga Silaeva

• Siga ni Sucu: 1988 (Davydovo, Yasana o Moscow)

• Kena italanoa: Gone duadua vei ratou na tolu na veitacini. E vakoroi ena idinia (thermal engineering) mai na dua na koronivuli ni vulitara. Dau taleitaka na culacula, wilivola kei na qito volleyball. E vakatotomuria na ivakaraitaki i tinana ni mareqeta vakalevu na veika e vulica ena iVolatabu

Eduard Zhinzhikov

• Siga ni Sucu: 1971 (Novozybkov, Yasana o Bryansk)

• Kena italanoa: E dua na welder qai dau sasamaki, e cakacaka ena tabana ni ovisa. Lewena tale ga e dua na matasere. Vakamautaki Tatyana ena 1993, e lewena tale ga na matasere. Dau taleitaka na qiri qita kei na vola serekali

• Tekivu vulica na iVolatabu ena icavacava ni 1990, e saumi tale ga kina e levu na nona taro. Na veika e mai vulica qori e veisautaka na nona itovo, e mamarau tale ga na nona vuvale. Qori e uqeti Tatyana me vulica na iVolatabu me dua tale ga na iVakadinadina i Jiova

Ena ika11 ni June 2019, era curuma vakaukaua na nodra vale e 22 na iVakadinadina i Jiova na ovisa ena yasana o Bryansk e Rusia. Rau mani vesu o Sister Tatyana Shamsheva kei Olga Silaeva. Rau vesu tu vakawawa me 245 na siga ni bera ni rogoci tale nodrau kisi. Rau sereki ena vula o Me 2020, ia rau se waraka tiko ga nodrau veilewai.

Ena ika16 ni Okosita 2019, e tekivu vaqaqai kina na nodrau kisi o Brother Vladimir Khokhlov kei Brother Eduard Zhinzhikov. Sa qai rogoci vata na nodrau kisi kei rau o Sister Shamsheva kei Sister Silaeva. Ni oti e vitu na siga, e vakataulewataki me ratou lai wawa veilewai tu e loma, eratou se vesu tiko ga me yacova mai qo.

Rau vakatarogi tiko na tacida yalewa qo ena ika5 ni iRogo ni iLawalawa Dauvakatulewa ni 2020. E kaya o Sister Silaeva ni gauna e vesu tu kina me walu na vula, e vulica “ni se mani dredre vakacava na ituvaki, ena tokoni keda tu ga o Jiova ena nona yalo tabu meda vosota kina na ituvaki qori.” E vakadeitaka tale ga o Sister Shamsheva: “O Jiova ena volekati keda tu ga, ena vakaukauataki keda, ena vukei keda tale ga.”

Eda nuidei ni na tokoni ira tiko ga na tacida e Rusia o Jiova. Ke ra mani vesu tu se era wawa veilewai tu e loma, ena tokoni ira tiko o Jiova mera vosota tiko ga ena marau, mera vakila tale ga na vakacegu.—1 Korinica 10:13.