Ena ika23 ni Epereli 2021, e vakataulewataka na Industrial District Court of Smolensk mai Rusia, ni ratou cala o Brother Yevgeniy Deshko, Brother Ruslan Korolyov, kei Brother Valeriy Shalev. Rau vakatatabutaki o Brother Korolyov kei Brother Shalev me ono veimama na yabaki. O Brother Deshko e vakatatabutaki me ono na yabaki.

Yevgeniy Deshko

• Sucu: 1989 (Sochi)

• Me baleti koya: E dau veibobo, dau draiva, e daunilivaliva tale ga. Susu ena vuvale iVakadinadina i Jiova. Nona muria na ivakatagedegede ena iVolatabu e uqeti koya me kua ni curu ina mataivalu. Papitaiso ena 2012. Ena 2012 me yacova na 2014, a cakacaka ena nodra valenibula na itabaqase

Ruslan Korolyov

• Sucu: 1982 (Smolensk)

• Me baleti koya: Ni se gone e taleitaka me vakavinakataka na iyaya vakalivaliva. Oti e mekeniki sara. Lewena tu na mataivalu ni Rusia. E vakacegui koya na itukutuku veivakacegui e vulica ena iVolatabu kei ira na iVakadinadina i Jiova. Papitaiso sara ena 2004

Viktor Malkov

• Sucu: 1959 (Smolensk)

• Me baleti koya: E mekeniki, e matai, e dau tara dokanivale tale ga. Rau vakamau kei Vera ena 1992. Ni se itabagone, e taleitaka na qito soka. Dau vukei tacina e mataboko

  A bala e valeniveivesu me vitu na yabaki ni dau voravora nona itovo. A voleka sara ni rau veisere kei watina. Ia oti nona vulica na iVolatabu kei ira na iVakadinadina i Jiova e veisau vakadua nona itovo. E yalomalua, e muria na lawa ni matanitu qai vinaka na nona ivakarau. Papitaiso sara ena 2008. A takali ena ika25 ni Epereli 2020

Valeriy Shalev

• Sucu: 1977 (Yartsevo)

• Me baleti koya: Ni se gonetagane e vulica na vosa vakavalagi. Tauri vola mai na koronivuli ni mataivalu. Toki sara ina tokalau kei Rusia me qarava na ka vakailavo ni mataivalu. Ni cegu mai na mataivalu, e lai daunivakasala ni bisinisi. A sotavi Svetlana ni rau se vuli vata tiko, e dua na luvena tagane. Oti rau vakamau sara ena 1999. E taleitaka na qito soka, e dau cici tale ga

  A vulica o tinana na iVolatabu kei ira na iVakadinadina i Jiova, qai wasea vei Valeriy na ka e vulica. E saga o Valeriy me vakacalai koya, ia e qai kila ni ya sara ga na ka dina. Papitaiso ena 2002

A tekivu na veivakacacani e Smolensk, ni bera ni vakatabuya na Mataveilewai Cecere ena 2017 nodra cakacaka na tacida e Rusia. Ena ika18 ni Tiseba 2016, era tarova e 15 na ovisa era vakaiyaragi tu na nodra soqoni tiko e rauta ni 60 na tacida ena Vale ni Soqoni mai Smolensk.. Nira vaqaqara tiko na ovisa era biuta lo ena so na vanua na noda ivola e okata na matanitu o Rusia ni vakavuna na “tikoyavavala.” Era qai lasutaka nira kunea na noda ivola qori ena Vale ni Soqoni.

Oti qori e veitaravi na nodra vaqaqai, kei na nodra vesu na tacida ena 2018 kei na 2019. Ena ika25 ni Epereli 2019, era curuma vakaukaua na ovisa nodra vale e levu na tacida, ratou qai vesu o Brother Ruslan Korolyov, Brother Valeriy Shalev, kei Brother Viktor Malkov. E tarogi ratou na ovisa o Viktor: “Dua na gauna au vesu me vitu na yabaki ni voravora na noqu itovo, oti au mai iVakadinadina i Jiova. Ia qo dou via vesuki au . . . niu vunautaka na itukutuku vinaka?”

Ni oti nodratou vesu na tacida qori, sa qai vesu me vica vata na siga o Brother Yevgeniy Deshko. E kaya: “Au sa kidava tiko niu na rawa tale ga ni vesu, au sa mani vakavakarau tu.” E dau vakayaloqaqataki au vakalevu na ka e kaya o Jiova vei Josua: “Mo yaloqaqa mo kaukaua. Mo kua ni domobula se rere ni tokoni iko o Jiova na nomu Kalou ena vanua kece o lakova.” (Josua 1:9) E kaya o Yevgeniy ni kaya tiko o Jiova ena tikinivolatabu qori meda yaloqaqa, ena tokoni keda tale ga.

E kaya o Ruslan ni dau vakasamataka vakatitobu ena gauna e vesu tu kina na ka e kaya o Jisu ena Maciu 6:34. E sega ni dau lomaleqataka na ka e rawa ni yaco, e kaya ga: “Au dau vakaogai au vakalevu ena vola ivola, wili iVolatabu kei na noqu dau wasea na ka dina vei ira na vo ni kaivesu. Au sega kina ni lomaleqa.”

Ena Maji 2020, e vakalailaitaka na nodratou vakatatabu na va na tacida qo o G. P. Bezrukov na dauveivaqaqai ni Federal Security Service (FSB). E vakadonui tale ga me ratou veilakoyaki. Ia sa voleka ni dua na yabaki nodratou vesu, e vakatabui tale ga me ratou biuta nodratou vale. E caka na veisau qori ena vuku ni nodratou itovo vinaka na tacida yalodina qo. E nuidei o G. P. Bezrukov ke soli vei ratou na galala, ratou na sega ni siova na veivaqaqai se me kaukaua na nodratou itovo ke ratou vakatarogi tale.

Ka ni rarawa ni oti ga vakalailai qori e mai takali o Viktor. E levu era kaya ni a tauvimate vakalevu o Viktor qai mate, ena ituvaki ni valeniveivesu kei na nona vakasamataka vakalevu na veivaqaqai.

Ratou vakadeitaka o Ruslan, Valeriy, kei Yevgeniy me ratou muria nona ivakaraitaki o Viktor kei na levu tale era yalodina tiko ga me yacova na mate. Ratou kaukaua tiko ga vakayalo, qori e vukei ratou me ratou vosota na veivakacacani qai marau tiko ga.

E kaya o Valeriy: “Sa qai volekati au tiko ga o Jiova ena gauna au vesu kina. E duatani sara neirau veivolekati ena gauna qo. Au wilika wasoma na iVolatabu. Eso mada ga era sega ni qaravi Jiova era rawata na dredre ni bula e valeniveivesu. Ia ni tokoni keda o Jiova, macala ga nida na vosota.”

Sa qai vakadinadinataka ga o Yevgeniy nona dauveivuke o Jiova. E kaya: “Au vakadeitaka ni dau tokoni keda na Tamada vakalomalagi, vakauasivi ena gauna eda sotava kina na veivakatovolei dredre. Au sega gona ni leqataka vakalevu na veivakatovolei ena rawa ni yaco.”

Se mani lewa cava e tau, e kaya o Yevgeniy: “Au na cakava tiko ga na ka kece au rawata meu vosota kina na veika dredre, qai yalodina tiko ga.”

Ena veivuke i Jiova eda kila ni ratou na marau, qai vosota tiko ga na veika dredre na tacida tagane qo kei na nodratou vuvale.—2 Cesalonaika 3:5.