22 JULAI, 2022
RUSIA

Ratou Vosota na Tacida na Veika Tawadodonu

SARAVA/ROGOCA

Ena vakarau tauca na mataveilewai na Shuya City Court of the Ivanovo Region mai Rusia, na lewa me baleti Brother Aleksey Arkhipov, Sister Svetlana Ryzhkova, Sister Svetlana Shishina, Brother Dmitriy Mikhaylov kei watina o Yelena. E se bera ni kerea na dauveibeitaki na kedratou itotogi.

Veitaravi ni Gauna

21 Seviteba, 2017

Vakadonuya na turaganilewa me vakarogoci tiko nona qiri o Mikhaylov
15 Janueri, 2018

Vakadonuya na turaganilewa me vakarogoci nona qiri o Sister Svetlana Ryzhkova, me biu tale ga e nona vale na vidio
20 Epereli, 2018

Vaqaqara na ovisa ena nodratou vale e lima na tacida
29 Me, 2018

Vesu o Dmitriy qai beitaki ni cala nona vakailavotaka na isoqosoqo e vakavuna na tikoyavavala. E vesu tu vakawawa
22 June, 2018

Beitaki o Aleksey ni cala, qai vakatabui me biuta na nona itikotiko
27 June, 2018

Beitaki tale ga ni cala o Sister Yelena Mikhaylova, Sister Svetlana Ryzhkova, kei Sister Svetlana Shishina
15 Noveba, 2018

Vakarota na mataveilewai levu me sere o Dmitriy ni oti e voleka ni ono na vula nona vesu tu
10 Okosita, 2021

Ratou tekivu veilewaitaki
16 Seviteba, 2021

Dikeva tale na dauveibeitaki na nodratou kisi
25 Me, 2022

Ratou veilewaitaki tale

Kedratou iTukutuku

Aleksey Arkhipov

Sucu: 1960 (Arkhangelsk, Yasayasa o Arkhangelsk)

Me baleti koya: A lewena tu na mataivalu. Toso na gauna e draiva ni basi

Rau vakamau kei Natalya ena 1984. E rua na luvedrau. Ni cegu mai na nona cakacaka, ratou toki i Shuya me ratou lai qaravi rau na itubutubu nei Natalya

Vulica na ka dina vua e dua rau cakacaka vata. Papitaiso me iVakadinadina i Jiova ena 2017

Ka e Tukuna

Tikinivolatabu cava e vukei iko me donu tiko ga nomu rai ena gauna dredre qo?

E vukei au vakalevu na ivakasala ena 1 Korinica 10:24. E kaya: “Me kua ni dua e qara na ka e yaga ga vua, me qara tale ga na ka e yaga vei ira tale eso.” Au vulica kina meu kua ni vakasamataka vakalevu na ituvaki dredre au sotava, ia meu dau kauaitaki ira ga eso tale.

E uqeti au tale ga vakalevu na vosa i Jisu ena Maciu 5:10-12: “Era marau o ira era vakacacani ena vuku ni ka e dodonu . . . Moni marau ni oni . . . vosavakacacataki ena vukuqu. Ni marau, io moni marau vakalevu, ni na levu na kemuni isau mai lomalagi, nira vakacacani tale ga va qori na parofita era liu vei kemuni.” Na tikinivolatabu qo e vukei au meu yaloqaqa, vosota, qai nuidei tiko ga.

Dmitriy Mikhaylov

Sucu: 1977 (Kupchanovka, Kazakhstan)

Me baleti koya: E vulica na ka vakalivaliva. A cakacaka ena tabana ni kompiuta. Taleitaka na veitaba kei na caka vidio

Kila na ka dina ni se itabagone. Papitaiso ena 1993. Rau vakamau kei Yelena ena 2003

Ka e Tukuna

Dina ni drau dui tutu kei watimu, na cava drau cakava me rawa ni drau veivakayaloqaqataki kina?

Gauna au vesu tu kina, e vakayaloqaqataki au vakalevu na ivola nei watiqu. Au mareqeta nona ivola ni vola mai e dua keirau veivolekati vakalevu, ia koya e bibi sara e vaqaqacotaka noqu lomani Jiova kei na noqu yalodina vua. E qaqaco tale ga kina na noqu vakabauta kei na inuinui. E vaka ga e uqeti Yelena o Jiova me vola mai na vosa e vakayaloqaqataki au, e veivakacegui tale ga. Au sa qai kila na vuna e va kina qori na ka e vola. Ni bera ni volavola mai ena masu vagumatua vei Jiova, vakekeli, e dau dikeva tale ga na ka e kaya na iVolatabu.

Au dau vakayaloqaqataki Yelena tale ga niu vola vua eso na ka au wilika ena iVolatabu. Au dau tukuna vua na sala e vakaukauataki au kina o Jiova, kei na nona veivakalougatataki. Au vakavinavinakataki koya tale ga ena nona loloma, nona dau vakuai koya, qai yalodina tu ga vei Jiova se ituvaki cava e sotava.

Yelena Mikhaylova

Sucu: 1983 (Shuya)

Me baleti koya: Oti nona tauri vola e qasenivuli sara ni fika kei na physics

Ni yabaki ciwa, sa mate o tamana. E via kila ke bula dina tiko na Kalou, kei na ka ena yacovi keda nida mate. E kunea na isau ni nona lomatarotaro ena iVolatabu, e papitaiso sara ena 1999. Rau vakamau kei Dmitriy ena 2003

Ka e Tukuna

Na dredre cava o sotava ni vesu tu o watimu?

E vinakati meu cakacaka vakalevu me rawa niu qaravi tinai Dmitriy, e yabaki 80. E tauvimate bibi tale ga ena gauna e vesu kina o Dmitriy. Na vanua tale ga e lai vesu kina e rauta ni 22 na maile na kena yawa mai vale. Ena vinakati vakalevu kina na gauna, kei na kaukaua ena sala ni veilakoyaki e kea. Era vakaroti au tale ga na dauveivaqaqai meu sota kei ira, era vakasaurarataki au, ra qai vakarerei au. Toso na gauna, au beitaki tale ga niu cala.

Cava e vukei iko mo vosota?

Au dau masu vei Jiova qai kerea me solia vei au na kaukaua meu vosota kina na ka kece e yaco tiko. Au dau sega ni moce vinaka ena levu ni noqu lomaleqa. Ia niu yadra ena veimataka, au kila ni levu na ka meu cakava. Nona veitokoni o Jiova, au cakava rawa kina na ka au nanuma niu na sega ni cakava rawa.

Svetlana Shishina

Sucu: 1975 (Orenburg, Yasayasa o Orenburg)

Me baleti koya: E dau caka sasauni kei na uku

E vakamau ena 1995. E dua na luvedrau yalewa, kei na luvedrau tagane

A dua na nona iVolatabu ni se yabaki ono. Toso na gauna, e kila ni tiko na yaca ni Kalou, e mani vakatulewataka me vulica na iVolatabu kei ira na iVakadinadina i Jiova. Papitaiso ena 2002

Ka e Tukuna

E sega ni tiko ena dina o watimu, ia e tarai koya vakacava na nomu veilewaitaki?

Ni caka na vaqaqara e vale, au leqataka de na cudruvi au vakalevu. Ia kila na cava, au kurabui ni mokoti au, qai kaya: “Kua ni leqataka e dua na ka. Au na tokoni iko.” E sega ni kila o koya na vuna era tusaqati au kina na vakailesilesi. Ia na nona tokoni au ena gauna qori, au vakila sara ga na vakacegu. E vaka ga e taluva vei au e dua na icolacola levu.

Cava nona rai o watimu nira tokoni iko na mataveitacini?

O Jiova e uqeti ira mera vukei keitou vakayago ena levu na gauna. Era dau vakauta mai na kateni na iyaya. E sega ni kila o watiqu na vuna era cakava kina qori, keitou sega tale ga ni sauma kina e dua na ka! Au marautaka niu rawa ni tukuna vua ni o Jiova ga e vakavuna. E raica na ka keitou gadreva, e kauaitaki ira tale ga na nona dauveiqaravi.

E vaka vu marau vei keda nida raica nodratou yaloqaqa, kei na nodratou vosota na tacida qo e Rusia.—1 Cesalonaika 2:20.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU