Era yavala totolo sara na tacida e Orenburg, e Rusia mera lai vukei ratou o Brother Aleksey Budenchuk, Gennadiy German, Roman Gridasov, Feliks Makhammadiyev, kei Aleksey Miretskiy, ni oti nodratou mokulaki vakaca e valeniveivesu. Eratou gole mai Saratov na lima na tacida qori, e rauta ni 800 na kilomita na kena yawa mai Orenburg.

E tabaki ena ika15 ni Feperueri 2020, na nodratou mokulaki ena kau vei ira na ovisa ni valeniveivesu ena Penal Colony Nb. 1 e Orenburg. Nira wilika oti ga qori eso na tacida, era gole sara e valeniveivesu, era doudou ni kaya nira iVakadinadina i Jiova ra qai sega ni via kauaitaka ke kau tani na nodra galala. Era lai tarogi iratou na yadra me baleta na kedratou ituvaki na lima na tacida qori. Nira rogoca ni mavoa vakaca o Brother Makhammadiyev qai curu e valenibula, era via kila sara ga ke se bula tiko se mate. Voleka ni rua na aua na nodra veitalanoa tiko kei ira na vakailesilesi.

Era tuvanaka tale ga na tacida e Orenburg me so me lai vukei iratou tiko ga na tacida eratou vesu qori, na dui watidratou, kei na nodratou dui loya. Era dau volavola na tacida me ratou vakayaloqaqataki, era cau ilavo tale ga me rawa ni ratou volia kina na kakana e bulabula e sega ni tu e valeniveivesu.

E dua na ivakadinadina levu vei ira na cakacaka tiko ena valeniveivesu qori na nodra loloma kei na nodra vakuai ira na mataveitacini. Era raica na vakailesilesi na nodra kauai dina na iVakadinadina i Jiova vei ira na tacidra, vei ira mada ga na tu mai vakayawa era se bera vakadua ni sota.

E veiuqeti dina nida rogoca nira muria tiko na tacida na ka e kaya na Iperiu 13:3: “Ni dau nanumi ira na tu e valeniveivesu me vaka sara ga oni vesu tu kei ira,ni nanumi ira tale ga na vakacacani, ni oni se bula tiko e vuravura.”