FEPERUERI 9, 2024
RUSIA

Ratou Yaloqaqa Qai Nuitaki Jiova

SARAVA/ROGOCA

Ena vakarau tauca na mataveilewai na Blagoveshchensk City Court of the Amur Region mai Rusia, na lewa me baleti Sister Kristina Golik, Sister Yekaterina Olshevskaya, Sister Mariya Myasnikova, kei Sister Valentina Yermilova. E se bera ni tukuna na dauveibeitaki na kedratou itotogi.

Kedratou iTukutuku

Kristina Golik

Sucu: 1992 (Ukraine)

Me baleti koya: Vulica na droini (graphic) kei na caka website

E ikalima ni itabatamata ena nona vuvale me iVakadinadina i Jiova. Papitaiso ena 2006

Rau vakamau kei Dmitriy ena 2012. Ena June 2021, e beitaki ni cala qai vesu tiko me ono na yabaki, rua na vula

Ka e Tukuna

E bau dua na tikinivolatabu e vukei iko mo marau tiko ga?

Gauna keirau sa veitalatala kina kei Dmitriy, au veilecayaki sara ga ena veika tawadodonu e yaco qo. Dua na ka noqu vakasamataka vakalevu na nona dau vakacegui au, kei na nona veitokoni. Au masuti Jiova me vukei au. Dua na siga au wilika tiko na Same 17, e tarai au sara ga na tikina e 15, e kaya: “Ia o yau, au na raica na matamuni ena yalododonu, au lomavakacegu e matamuni niu yadra mai.” Gauna qo niu yadra ena veimataka, au dau vakasamataka ni Kalou o Jiova e kila vinaka sara na sala me veivakacegui qai vakayaloqaqataki au. Dina niu sotava na ituvaki dredre, ia au saga tiko ga meu mamarau.

Yekaterina Olshevskaya

Sucu: 1984 (Blagoveshchensk)

Me baleti koya: Rau vakamau kei Anton ena 2010. E dua na luvedrau tagane, e yabaki va

Ena Tiseba 2022, e beitaki ni cala o Anton kei tamana o Sergey Afanasiyev, rau qai vesu tiko qo me sivia e ono na yabaki

Ka e Tukuna

E vaqaqacotaki vakacava nomu veiwekani kei Jiova ena ituvaki dredre qo?

Ena lima na yabaki sa oti, au sa bau oca dina ena rogoci ni kisi ni veilewai me baleti tamaqu, o watiqu, kei na noqu kisi. Ke mani yaco meu vesu ena sega ni dua ena qaravi luvei keirau e yabaki va. Ia se mani cava e yaco, au duavata kei na ka e tukuni ena Jope 42:5: “Na daligaqu sa dau rogoca tu me baleti kemuni, ia qo au sa raici kemuni ena mataqu.” E dredre sara ga na ituvaki au sotava qai sega ni tiko vata kei au o watiqu, ia au vakila ni volekati au tu ga o Jiova. Dua na gauna a kaya vei au o Anton: “Kevaka au vesu qai sega ni vakarautaka na ka o gadreva, o na raica ni o Jiova na ulunivuvale vinaka duadua. Ena vukei iko.” E vakaraitaka sara ga vei au o Jiova na loloma qori. E sega ni vakarogoci au wale ga, ia e vakarautaka na ka au gadreva qai vakacegui au ni bera mada ga niu kerea vua.

Mariya Myasnikova

Sucu: 1994 (Chernigovka, Yasayasa Amur)

Me baleti koya: E manidia ena dua na kabani

E vulica na iVolatabu o Mariya vei tinana. E tarai koya na vakayacori ni parofisai ena iVolatabu kei na inuinui ni bula tawamudu. Papitaiso ena 2006

Rau vakamau kei Nikolay ena 2021

Ka e Tukuna

Cava e vukei iko me donu tiko ga nomu rai ena ituvaki dredre o sotava qo?

Na ituvaki dredre au sotava au saga meu vakavinakataka kina noqu itovo vaKarisito. Ena vakamai na koula me rawa ni savasava. Na veika dredre au sotava qo e vukei au meu bucina na itovo e mareqeta o Jiova, ena vukei au tale ga ena gauna mai muri. E uqeti au tale ga na 1 Joni 2:17, e kaya: “Sa takali tiko yani na vuravura kei na kena gagadre, ia o koya e cakava na loma ni Kalou ena tu ga me sega ni mudu.” E lekaleka wale na veika e yaco tu qo. Qori e vukei au meu yalodina tiko ga vei Jiova.

Eda vakavinavinakataka na nodratou ivakaraitaki ni nuitaki Jiova na tacida yalewa qo. Eda kila tale ga ni o Jiova ena tokoni ratou tiko, qai vakalougatataki ratou.—⁠Same 27:⁠3.

Veitaravi ni Gauna

Julai 20, 2018

Caka na vaqaqara e nodratou vale
Julai 22, 2021

Ratou beitaki na tacida yalewa qo ni ratou daubasulawa
Julai 27, 2021

Vakatabui o Kristina kei Mariya me rau gole ina dua tale na vanua
Okosita 3, 2021

Vakatabui o Yekaterina me gole ina dua tale na vanua
Okosita 4, 2021

Vakatabui o Valentina me gole ina dua tale na vanua
Me 26, 2023

Ratou tekivu veilewaitaki

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU